LECCIÓN 32
¡Jajchix ta aʼtel te Wentainel yuʼun te Diose!
Te Wentainel yuʼun te Diose jajch ta aʼtel ta chʼulchan ta 1914. Ta jaʼbilnix-abi jajch te slajibal kʼajkʼal yuʼun te ajwaliletik ta Balumilal. ¿Bin-utʼil ya jnaʼtik? Yame kiltik bin yalojix-a te Biblia te ya xkʼot ta pasel, bin yak ta kʼoel ta pasel ta Balumilal sok bin yilel stalel te ants winiketik jaʼto tal ta 1914.
1. ¿Bin yalojix-a te Biblia te ya xkʼot ta pasel?
Te libro yuʼun Daniel yalojix-a te ya xjajch ta aʼtel te Wentainel yuʼun te Dios te kʼalal kʼaxemix-a te «huqueb haʼbil» (Daniel 4:16, 17). Bayal jaʼbil ta patil, te Jesús jaʼnix jich la yalbey skʼoplal te tiempo-abi te kʼalal la yal «te yorahil yuʼun te jyanlumetique», sok la yakʼ ta nopel te mato kʼaxem te jaʼbiletik-abi (Lucas 21:24). Jich te bin-utʼil yato kiltike, te jukeb jaʼbil tsʼakaj ta 1914.
2. ¿Bin yak ta kʼoel ta pasel ta Balumilal sok bin yilel stalel te ants winiketik jaʼto tal ta 1914?
Te jnopojeletik jich la sjojkʼoybeyik te Jesús: «¿Bin señahil yuʼun te ya xtalat soc yuʼun te slajibal cʼahcʼal?» (Mateo 24:3). Te Jesús la yal bintik ya xkʼot ta pasel te kʼalal ya x-och ta Ajwalil ta chʼulchan ta Wentainel yuʼun te Diose. La yal te ya xjajch guerraetik, wiʼnal sok nijkel (kʼopona Mateo 24:7). Te Biblia jaʼnix jich ya yal te «ya xtal yorahil wocol» ta skaj te ma lek stalelik te ants winiketik «ta slajibal cahcal» (2 Timoteo 3:1-5). Jaʼto tal ta 1914, jich yak ta kʼoel ta pasel.
3. ¿Bin yuʼun te batsʼej te wokolil jaʼto tal te kʼalal jajch ta aʼtel te Wentainel yuʼun te Diose?
Te kʼalal ochelto ta Ajwalil-a te Jesuse, jajch guerra ta chʼulchan, la stsak sba sok te Satanás sok te pukujetik yuʼune. Ma juʼ yuʼun tsalaw te Satanás, jaʼ yuʼun «chʼojot cohel ta bahlumilal soc te aʼbatetic yuʼune» (Apocalipsis 12:9,10,12). Kʼax ilinem te Satanás, melel snaʼoj te nopolix ya yichʼ lajinel, jaʼ yuʼun bayal ya yakʼbey swokol te ants winiketik. Jaʼme smul te jich ay te balumilal ta ora ini, pero te Wentainel yuʼun te Diose yame slajin spisil te wokoliletike.
JNOPTIKXAN TA LEK
Kiltik bin-utʼil ya jnaʼtik te jajch ta aʼtel ta 1914 te Wentainel yuʼun te Diose sok kiltik bin ya stij koʼtantik ta spasel.
4. Te jaʼbil ya yalbey skʼoplal te Biblia tsʼakaj ta 1914
Te Dios ay bin la yakʼbey swayichin te Nabucodonosor, te ajwalil yuʼun Babilonia, yuʼun ya yakʼ ta naʼel te bin ya xkʼot ta pasel ta pajel chaʼbej. Ta Biblia ya jtatik bin-a te la swayichtay sok bin ya skʼan ya yal. Te bin la swayichtay jaʼ skʼoplal te ajwalil Nabucodonosor soknix te Wentainel yuʼun te Diose (kʼoponaik Daniel 4:17). a
Kʼoponaik Daniel 4:20-26. Ta patil tuuntesaik te recuadro te ay ta página 133 swenta ya atabeyik sujtib te jojkʼoyeletik ini:
-
A) ¿Bin la yil ta swayich te Nabucodonosor? (Ilawilik te versículo 20 sok 21).
-
B) ¿Bin ya yichʼ pasbeyel te teʼe? (Ilawilik te versículo 23).
-
C) ¿Bin ya xkʼot ta pasel te kʼalal ya stsʼakaj te «huqueb haʼbil»? (Ilawilik te versículo 26).
Te mukʼul teʼ sok te Wentainel yuʼun Dios
TE BIN ALBIL SKʼOPLAL (Daniel 4:20-36)
Te wentainel
A) Te mukʼul teʼ
Kejchaj te wentainel
B) «Tsʼetahic te teʼ» sok akʼa kʼaxuk «huqueb haʼbil»
Chaʼjajch te wentainel
C) «Ya to xchaʼochat xan ta ajwalil»
Te sbabial buelta kʼot ta pasel:
-
D) ¿Machʼa skʼoplal-a te teʼe? (Ilawilik te versículo 22).
-
E) ¿Bin-ora kejchaj ta wentainwanej? (Kʼoponaik Daniel 4:29-33).
-
F) ¿Bin kʼot ta stojol te Nabucodonosor te kʼalal tsʼakaj te «huqueb haʼbil»? (Kʼoponaik Daniel 4:34-36).
TE SBABIAL BUELTA KʼOT TA PASEL
Te wentainel
D) Te ajwalil Nabucodonosor yuʼun Babilonia
Kejchaj te wentainel
E) Ta patil bael yuʼun te jaʼbil 606 m.t.C., te Nabucodonosor sojk sjol sok ma juʼix yuʼun wentainwanej jukeb jaʼbil
Chaʼjajch te wentainel
F) La snaʼ kʼinal te Nabucodonosor sok chaʼjajch ta wentainwanej
Te schebal buelta kʼot ta pasel:
-
G) ¿Machʼatik skʼoplal-a te teʼe? (Kʼoponaik 1 Crónicas 29:23).
-
H) ¿Bin-ora kejchajik ta wentainwanej? ¿Bin-utʼil ya jnaʼtik te maba yakik ta wentainwanej-a te kʼalal kʼax ta Balumilal te Jesuse? (Kʼoponaik Lucas 21:24).
-
I) ¿Banti sok bin-ora chaʼjajch ta aʼtel te wentainel ini?
TE SCHEBAL BUELTA KʼOT TA PASEL
Te wentainel
G) Te ajwaliletik ta Israel jaʼ akʼbot yaʼtelik yuʼun te Diose
Kejchaj te wentainel
H) La yichʼ lajinel te Jerusalén ta jaʼbil 607 m.t.C.; kejchajik ta wentainwanej 2,520 jaʼbil te ajwaliletik ta Israel
Chaʼjajch te wentainel
I) Ta 1914 te Jesús jajch ta aʼtel ta Wentainel yuʼun Dios ta chʼulchan
¿Jayebnix tiempo smakoj-a te jukeb jaʼbile?
Ay yantik versiculoetik ta Biblia te ya skoltayotik ta snaʼel. Jich bitʼil te Apocalipsis te ya yal te oxeb jaʼbil sok olil smakoj 1,260 kʼajkʼal (Apocalipsis 12:6, 14, te nota ya yal: 3.5 haʼbil). Jich yuʼun te jukeb jaʼbile yichʼoj 2,520 kʼajkʼal. Te Biblia ay ya yajtay te jun kʼajkʼal bitʼil jun jaʼbil (Ezequiel 4:6). Jaʼ jich ya yichʼ ajtayel te jukeb jaʼbil te ya yalbey skʼoplal te libro yuʼun Daniel: jich yuʼun smakoj 2,520 jaʼbil.
5. Ta 1914 jelon te balumilal
Te Jesús la yal bin yilel ya xkʼot te balumilal te kʼalal ya xjajch ta wentainwanej. Kʼoponaik Lucas 21:9-11 sok albeyaik skʼoplal ini:
-
¿Bintik awiloj o awaʼiyojbey skʼoplal te kʼotix ta pasele?
Te jpuk-kʼop Pablo la yal bin yilel stalelik te ants winiketik te kʼalal nopol ya yichʼix lajinel-a te ajwaliletik ta Balumilal. Kʼoponaik 2 Timoteo 3:1-5 sok albeyaik skʼoplal ini:
-
¿Aybal awiloj te jich stalelik te ants winiketik ta kʼajkʼal ini?
6. Ay bin ya skʼan ya jpastik te bitʼil jajchix ta aʼtel te Wentainel yuʼun Dios
Kʼoponaik Mateo 24:3, 14 sok albeyaik skʼoplal ini:
-
¿Bin aʼtelil yak ta pasel te ya yakʼ ta ilel te yakix ta aʼtel te Wentainel yuʼun te Diose?
-
¿Bin-utʼil ya xjuʼ ya xkoltaywanat ta spasel te aʼtelil-abi?
Te Wentainel yuʼun Dios jajchix ta aʼtel sok nopolix ya swentain te Balumilal. Kʼoponaik Hebreos 10:24, 25 sok albeyaik skʼoplal ini:
-
¿Bin ya skʼan ya jpastik te bitʼil ayotikix ta slajibal kʼajkʼale?
Te ayuk bin ya anop yuʼun ya akoltay-a te yantik sok te jich ya sta skuxlejalik-a, ¿bin ya apas te jichuke?
AY MACHʼATIK JICH YA SJOJKʼOYIK: «¿Bin yuʼun te testigoetik yuʼun Jehová bayal ya yalbeyik skʼoplal te jaʼbil 1914?».
-
¿Bin ya asutbey?
¿BINTIK LA JNOPTIK?
Jajchix ta aʼtel te Wentainel yuʼun Dios, jich ya yakʼ ta naʼel te bintik tsʼibaybil ta Biblia te kʼotix ta pasele sok te bin yilel te balumilal ta kʼajkʼal ini. Kʼalal ya jcholtik skʼop Dios sok ya xbootik ta tsoblejetik, ya kakʼtik ta ilel te jchʼuunejtik te yakix ta aʼtel te Wentainel yuʼun te Diose.
¿Jilbal ta awoʼtan into?
-
¿Bin kʼot ta pasel te kʼalal tsʼakaj te jukeb jaʼbil te ya yalbey skʼoplal te libro yuʼun Daniel?
-
¿Bin yuʼun schʼuunej awoʼtan te jajch ta aʼtel ta 1914 te Wentainel yuʼun te Diose?
-
¿Bin-utʼil ya awakʼ ta ilel te ya schʼuun awoʼtan te yakix ta aʼtel te Wentainel yuʼun te Diose?
YA XJUʼ YA ANOPXAN INI
Kʼopona te bin ya yalik chaʼoxtul winiketik ta swenta te bitʼil jelon te balumilal jaʼto tal ta 1914.
«Te bin-ora jkʼaxel jin stalel te ants winiketike» (¡Wikʼame asit!, abril 2007)
Ilawil bin-utʼil jelon skuxlejal jtul winik te kʼalal la yil te yakix ta kʼoel ta pasel te bin ya yal te Mateo 24:14.
¿Bin-utʼil ya jnaʼtik te jaʼ yak ta yalbeyel skʼoplal te Wentainel yuʼun Dios te bin ya schol te capítulo 4 ta libro yuʼun Daniel?
¿Bin-utʼil ya jnaʼtik te tsʼakaj ta 1914 te «huqueb haʼbil» ya yalbey skʼoplal te capítulo 4 ta libro yuʼun Daniel?
a Kʼopona te slajibal cheb articuloetik te ay ta lección ini te banti ya yal «Ya xjuʼ ya anopxan ini».
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
