LECCIÓN 36
Spisiluk-ora smelelil te bin ya kaltike
Maʼyuk machʼa ya smulan te ya xloʼlaywan te yamigotake, ni jaʼuk te Jehová ya smulan. Pero wokol ya kaʼiytik te ma xloʼlaywanotik teme bayal machʼatik jich ya spasike. ¿Bin lekilal ya jtatik teme ma xloʼlaywanotike?
1. ¿Bin yuʼun te kʼax mukʼ skʼoplal te ma xloʼlaywanotike?
Teme maba ya jloʼlaytik te yantik, ya kakʼbeytik yil te kʼux ta koʼtantik te Jehová sok te ya kichʼtik ta mukʼ. Mame xchʼay ta koʼtantik te ya snaʼ te Jehová spisil te bin ya jnoptik sok ya jpastik (Hebreos 4:13). Ya yil te kʼalal ya jpastik tulan te ma xloʼlaywanotik sok kʼax mukʼ skʼoplal ya yil. Jich ya yakʼ jnaʼtik ta Biblia: «Como Jehová ya yihlay te machʼa chopol yoʼtan, pero jun yoʼtan sba soc te machʼatic toj yoʼtan» (Proverbios 3:32).
2. ¿Bin-utʼil ya kakʼtik ta ilel ta jujun kʼajkʼal te ma xloʼlaywanotik?
Te Jehová ya skʼan te «talel cʼaxel smelelil» ya jkʼopon jbatik (Zacarías 8:16, 17). ¿Bin ya skʼan ya yal-abi? Jaʼ te ma jlotiytik te jfamiliatik, te joʼtaktik ta aʼtel, te hermanoetik ta congregación ni jaʼuk te j-aʼtel patanetike. Jaʼnix jich ma xkaʼiytik elekʼ sok ma xloʼlaywanotik (kʼopona Proverbios 24:28 sok Efesios 4:28). Ya jtojtik spatanul te bintik ay kuʼuntike (Romanos 13:5-7). Ya jkʼantik te lek spisil te bintik ya jpastik ta jkuxlejaltike (Hebreos 13:18).
3. ¿Bin lekilal ya jtatik teme maba ya xloʼlaywanotike?
Te kʼalal ya kichʼtik naʼbeyel jbatik te maba ya xloʼlaywanotik, ay smukʼul yoʼtanik ta jtojoltik te yantike. Jaʼnix jich, ya kakʼtik te jun yoʼtan ya yaʼiy sbaik ta congregación jich bin-utʼil ta jun familia. Sok ma xkʼopoj koʼtantik teme lek te bin ya jpastike. Teme ma xloʼlaywanotik sok ma xkaʼiytik lot, lek skʼoplal ya xkʼot kuʼuntik te nojptesel yuʼun te Diose sok ayniwan machʼatik ya skʼan ya x-abatinik ta stojol te Jehová te bitʼil lek te jtaleltike (Tito 2:10).
JNOPTIKXAN TA LEK
Kiltik bin-utʼil ya yilotik te Jehová teme maba ya xloʼlaywanotik, sok bin-utʼil ya kakʼtik ta ilel ta jujun kʼajkʼal te lek te jtaleltike.
4. Te Jehová lek ya yil te machʼatik maba ya xloʼlaywanik
Kʼoponaik Salmo 44:21 sok Malaquías 3:16, sok albeyaik skʼoplal ini:
-
¿Yabal xjuʼ ya jmuktik te smelelile? ¿Bin yuʼun jich ya awal?
-
Teme spisil-ora smelelil ya xkʼopojotik manchukme ay wokol ya kaʼiytik, ¿binwan yaʼiyel ya yaʼiy sba te Jehovae?
Kʼalal ma xyaʼiyik lot te alaletike, tseʼel yoʼtan te smeʼ statike. Kʼalal ma xkaʼiytik lot, tseʼel yoʼtan kuʼuntik te Jehová.
5. Mame ayuk bin-ora ya xloʼlaywanotik
Manchukme bayal ants winiketik ya yalik te maʼyuk bin lek ya xlokʼ kuʼuntik-a teme maba ya xloʼlaywanotike, bayal bin lek ya xlokʼ-a teme ma jpastike. ¿Bintik-a? Ilawilik te VIDEO.
Kʼoponaik Hebreos 13:18 sok albeyaik skʼoplal bin-utʼil maba ya xlotiywanotik...
-
... ta familia.
-
... ta kaʼteltik o ta escuela.
-
... ta spisil te bin ya jpastik.
6. Ya jtatik lekilal teme maba ya xloʼlaywanotik
Ayniwan ya jtatik wokol te kʼalal maba ya xloʼlaywanotik, pero ta patil bael ay bin lek ya jtatik yuʼun. Kʼoponaik Salmo 34:12-16 sok albeyaik skʼoplal ini:
-
¿Bin-utʼil ya xlekub skuxlejalik te machʼatik maba ya yaʼiyik lot?
-
Te mamalalil sok te inamil lekxan ya yil sbaik.
-
Lek ya x-ilot yuʼun te spatronik.
-
Lek skʼoplal ya xkʼotik ta stojol te j-aʼtel patanetik.
AY MACHʼATIK JICH YA YALIK: «Maʼyuk skʼoplal teme maba mukʼul lotil ya kaltike».
-
¿Yabal yilay spisil ta chajp lotil te Jehová? ¿Bin yuʼun te jich ya awale?
¿BINTIK LA JNOPTIK?
Te Jehová ma skʼan te ya xloʼlaywanik sok te ya yalik lot te yamigotake.
¿Jilbal ta awoʼtan into?
-
¿Bintik-utʼil ya kakʼtik ta ilel te ma xloʼlaywanotik?
-
¿Bin yuʼun te ma xjuʼ ta mukel te smelelile?
-
¿Bin yuʼun te spisil-ora smelelil ya akʼan ya xkʼopojat?
YA XJUʼ YA ANOPXAN INI
¿Bin-utʼil ya xjuʼ ya snojptesik te yal snichʼnabik te meʼil tatiletik swenta ma xyaʼiyik lot?
¿Bin lekilal ya staik te machʼatik ya skʼotesik ta pasel te bin ya yalike?
Yame ata lekilal teme ya akʼotes ta pasel te bin ya awale (9:09)
Ilawil teme snujpʼ ya jtojtik te patanil manchukme ma lek ya yichʼ tuuntesel te takʼine.
«¿Yabal skʼan tojel te patanil?» (Te J-ilkʼinal ta toyol, 1 yuʼun septiembre 2011)
¿Bin-utʼil juʼ yuʼun sjeltayel skuxlejal jtul winik te bayal machʼa la yelkʼanbey stakʼin?
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
