LECCIÓN 38
Mukʼuk skʼoplal ya kiltik te kuxlejalil
Manchukme ay ya xkʼax jwokoltik bayal bin ya xjuʼ ya jmulantik te bitʼil kuxulotike. ¿Bin-utʼil ya kakʼbeytik yil te Jehová te mukʼ skʼoplal ya kiltik te majtanil ini? ¿Sok bin yuʼun ya skʼan ya kakʼtik ta ilel te mukʼ skʼoplal ta koʼtantik?
1. ¿Bin yuʼun mukʼ skʼoplal ya skʼan ya kiltik te jkuxlejaltike?
Mukʼ skʼoplal ya skʼan ya kiltik te jkuxlejaltike, melel jaʼ jun majtanil te la yakʼbotik te jTatik Jehová. Jaʼ «sloqʼuib-haʼ yuʼun cuxlejal», melel jaʼ la spas spisil te bintik kuxajtik (Salmo 36:9). «Ha nix te ya yaʼbe scuxlejal [te] ants-winiquetic soc te ya yaʼbe yichʼic icʼ soc spisil bintic ya xtuhun yuʼunique» (Hechos 17:25, 28). Te Jehová ya yakʼbotik te bintik ya jtuuntestik yuʼun jich ya jmulantik-a te jkuxlejaltike (kʼopona Hechos 14:17).
2. ¿Bin-utʼil ya kakʼbeytik yil te Jehová te mukʼ skʼoplal ya kiltik te jkuxlejaltike?
Te Jehová la yilat jaʼto te kʼalal jajchat ta chiknajel ta schʼujt te amamae. Ta jun buelta jtul j-abat yuʼun Dios te David sbiil jich la yal ta oración: «La yil asit te hahch ta chicnajel te jbaqʼuetal» (Salmo 139:16). Bayal skʼoplal ta sit Jehová te akuxlejale (kʼopona Mateo 10:29-31). Kʼax kʼux ya yaʼiy te kʼalal ay machʼa ya smil jtul ants winik ta spasemal yoʼtan, o teme jaʼnix ya smil sbae (Éxodo 20:13). a Jaʼnix jich kʼux ya yaʼiy teme maba ya jkanantaytik te jkuxlejaltik sok te skuxlejal te yantike. Teme ya jkanantay jbatik sok ya jkanantaytik te yantik, ya kakʼtik ta ilel te mukʼ skʼoplal ta koʼtantik te kuxlejalil.
JNOPTIKXAN TA LEK
Kiltik cheʼoxeb te bin-utʼil ya kakʼtik ta ilel te mukʼ skʼoplal ta koʼtantik te jkuxlejaltike.
3. Kanantaya aba yuʼun ma stsakat chamel
Te machʼatik kakʼojix jkuxlejaltik ta stojol te Jehová spisil-ora jaʼ ya jpastik te bin ya skʼane. Jich kʼoem te ya kakʼtik ta chikʼbil majtanil te jbakʼetaltike, jaʼ yuʼun ya skʼan ya jkanantaytik. Kʼoponaik Romanos 12:1, 2 sok albeyaik skʼoplal ini:
-
¿Bin yuʼun ya skʼan ya akanantay aba yuʼun ma stsakat chamel?
-
¿Bin-utʼil ya xjuʼ ya akanantay aba?
4. Kanantaya aba sok kanantaya te yantike
Te Biblia ya yal te ma skʼan ya jpastik te bin ya xjuʼ ya yakʼ jwokoltik. Ilawilik te VIDEO sok ilawilik bintik ya xjuʼ ya jpastik yuʼun ma jtatik wokol-a.
Kʼoponaik Proverbios 22:3 sok albeyaik skʼoplal bin-utʼil ya xjuʼ ya jkanantay jbatik...
-
... ta jnatik.
-
... ta kaʼteltik.
-
... kʼalal ya kaʼiytik tajimal.
-
... kʼalal ya jtijtik o ya xmootik ta carro o ta yantikxan.
5. Mukʼuk skʼoplal ta awoʼtan te skuxlejal te alal te mato ayineme
Te David la yal ta tʼujbil kʼopetik te bin yilel ya yil Jehová te skuxlejal te alal sok te bitʼil ya xchʼi talel ta schʼujt snane. Kʼoponaik Salmo 139:13-17 sok albeyaik skʼoplal ini:
-
¿Bin-ora ya xjajch ta kuxinel ta sit Jehová te alale: jaʼbal te kʼalal ay ta schʼujt te snan o jaʼto te kʼalal ya x-ayine?
Te leyetik te la yakʼbey te lum Israel, te Jehová la yakʼ ta kanantayel te antsetik sok te alal yikʼojike. Kʼoponaik Éxodo 21:22, 23 te ay ta nota b sok albeyaik skʼoplal ini:
-
¿Bin yilel la yil te Jehová te kʼalal ay machʼa maba ta spasemal yoʼtan ya smil jtul alal te mato ayineme?
-
Jich yuʼun, ¿bin-utʼil ya yil te kʼalal ay machʼa ya spas ta spasemal yoʼtan? c
-
Jaxan te jaʼate, ¿bin ya awal ta swenta te bin ya snop te Diose?
Manchukme mukʼ skʼoplal ya yil te kuxlejalil jtul ants te yikʼoj yale, yaniwan snop te jaʼ lek te ya skʼases te yale. Kʼoponaik Isaías 41:10 sok albeyaik skʼoplal ini:
-
Teme jtul ants ya sujot ta skʼasesel te yale, ¿machʼa ya skʼan ya skʼanbey koltayel? ¿Bin yuʼun?
AY MACHʼATIK JICH YA YALIK: «Te ants jaʼ ay ta swenta stael ta nopel teme ya skʼases te yal o maʼuk, melel jaʼ yikʼoj te alale».
-
¿Bin yuʼun ya awal te mukʼ skʼoplal ta sit Jehová te skuxlejal te ants te yikʼoj yal soknix te alal yikʼoje?
¿BINTIK LA JNOPTIK?
Te kuxlejalil jaʼ jun majtanil te yakʼojbotik te Jehová. Te Biblia ya yakʼ jnoptik te mukʼuk skʼoplal ta koʼtantik sok te yakuk jkanantaytik te jkuxlejaltik soknix te skuxlejal te yantike.
¿Jilbal ta awoʼtan into?
-
¿Bin-utʼil ya jnaʼtik te mukʼ skʼoplal ta yoʼtan Jehová te jkuxlejaltike?
-
¿Bin yilel ya yil te Jehová te kʼalal ay machʼa ya smil sba o ya smil jtul ants winik?
-
¿Bin-a te ya amulanxan ta akuxlejale?
YA XJUʼ YA ANOPXAN INI
¿Bin-utʼil ya kalbeytik wokol te Jehová yuʼun te jkuxlejaltike?
¿Yabal spasbey perdón te Jehová te machʼa ay la skʼases yal ta spasemal yoʼtan?
«¿Bin ya yal te Biblia ta swenta te skʼasesel alal?» (Ay ta jw.org)
Ilawil bin-utʼil stsakojbey sba skʼoplal te bin yilel ya yil te kuxlejalil te Diose sok te bin ya jkʼasestik kʼajkʼal-ae.
«¿Lekbal te tajimal te xiʼbantik sbae?» (¡Wikʼame asit!, 8 yuʼun octubre 2000)
¿Jaxan teme ay machʼa snopoj te ya smil sbae? Ilawil te koltayel ya yakʼ te Biblia.
«¿Yabal xjuʼ ya skoltayon te Biblia teme ay jnopoj te ya jmil jbae?» (Ay ta jw.org)
a Te Jehová ya smel yoʼtan ta stojol te machʼatik ayik ta tulan mel-oʼtane (Salmo 34:18). Ya skʼan ya skoltay sok ya xkʼot ta yoʼtan bin yaʼiyel ya yaʼiy sba te machʼa ay ta tulan mel-oʼtan te yaniwan skʼan ya smil sba yuʼune. Ilawil bin-utʼil ya skoltayat te Jehová, kʼopona te artículo «¿Yabal xjuʼ ya skoltayon te Biblia teme ay jnopoj te ya jmil jbae?», yame ata ta lección ini te banti ya yal «Ya xjuʼ ya anopxan ini».
b Éxodo 21:22, 23, TNM: «22 Teme ay winiketik te stsakoj sbaik ta majtamba-a te ya yejchentesik jtul ants te yikʼoj yal sok ya x-ayin te yal te kʼalal mato yorailuk-a, pero maʼyuk machʼa ya xlaj, te machʼa la sta smul yame yakʼ multa chikan jayeb ya skʼan te smamalal te ants sok te bin ya snop te juecetike. 23 Pero teme laj te ants o te yale, yame skʼan ya yichʼ milel-euk te machʼa milawane».
c Te machʼatik ta spasemal yoʼtanik ay la skʼases yalik ta namey, kʼaxtoniwan ya smel yoʼtanik yuʼun te bin la spasike; pero te Jehová ya xpasbotik perdón yuʼun. Yame atabeyxan skʼoplal ta artículo ini «¿Bin ya yal te Biblia ta swenta te skʼasesel alal?», yame ata ta lección ini te banti ya yal «Ya xjuʼ ya anopxan ini».
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
