LECCIÓN 41
¿Bin ya yal te Biblia ta swenta te ya sjokin sbaik ta wayel?
Bayal machʼatik ya xkʼexawik te kʼalal ay ya yalbeyik skʼoplal te ya sjokin sbaik ta wayel jtul ants sok jtul winik. Pero te Biblia jamal sok stojil ya yalbey skʼoplal. Ya xtuun kuʼuntik te bin ya yale, melel jaʼ lokʼem tal ta yoʼtan te Jehová te Jpaswanej kuʼuntik te ya snaʼ te bin lek ta jtojoltike. Ya yalbotik te bin ya skʼan ya jpastik yuʼun ya kakʼbeytik stseʼelil yoʼtan sok ya jmulantik te jkuxlejaltik ta sbajtelkʼinal.
1. ¿Bin yilel ya yil Jehová te kʼalal ay machʼatik ya sjokin sbaik ta wayel?
Jaʼ majtanil yuʼun Jehová te ya sjokin sbaik ta wayel jtul ants sok jtul winik te nujpunemike. Te majtanil ini ma jaʼuknax yuʼun te ya x-alnichʼnajik, jaʼnix jich ya xjuʼ ya yakʼbey sba yilik te skʼuxul yoʼtanik sok te ya skʼan sbaike. Jichnix ya yal-a te sKʼop Diose: «Tseʼeluc me awoʼtan soc awihnam ta aqueremil» (Proverbios 5:18, 19). Te Jehová ma skʼan te ya sloʼlay sbaik te machʼatik nujpunemike. Jaʼ yuʼun, te j-abat yuʼun Dios ma skʼan ya sjokin ta wayel te machʼa maba nujpunem soke (kʼopona Hebreos 13:4).
2. ¿Bin-a te mulwej?
Te Biblia ya yal te maba ya «yichʼic te cuentahinel yuʼun Dios [...] te jpas-muliletic» (1 Corintios 6:9, 10). Te machʼatik la stsʼibayik te Biblia la stuuntesik te kʼopil pornéia te ay ta griego kʼop te kʼalal la yalbeyik skʼoplal te mulwej o yalel ta mulil. Te kʼopil ini smakojbey skʼoplal 1) te ya sjokin sbaik ta wayel te machʼatik ma jaʼuk nujpunemik soke, a 2) te machʼatik sjoy sbaik ta winikil o antsil te ya sjokin sbaik ta wayel sok 3) te machʼatik ya skuch sbaik sok chambalametik. Kʼalal ya jpʼajtik te mulwej, ya kakʼbeytik stseʼelil yoʼtan te Jehová sok bayal bintik ya jmulanbeytik yutsilal (1 Tesalonicenses 4:3).
JNOPTIKXAN TA LEK
Kiltik bin ya xjuʼ ya apas yuʼun maba ya xyalat ta mulil sok bin ya xjuʼ ya amulanbey yutsil teme maba ya apas te bin ilobtik sba.
3. Anan lokʼel ta swenta te mulwej
Jtul winik te José sbiil-ae la spas tulan yuʼun maba yal ta mulil. Kʼoponaik Génesis 39:1-12 sok albeyaik skʼoplal ini:
-
¿Bin yuʼun lokʼ ta anel te José? (Ilawilik te versículo 9).
-
¿Lekbal te bin la spas te José? ¿Bin yuʼun?
¿Bin-utʼil ya xjuʼ ya stʼunbeyik stalel José te jchʼieletik swenta ma xyalik ta mulil? Ilawilik te VIDEO.
Te Jehová ya skʼan te jpisiltik ya jpʼajtik te yalel ta mulil. Kʼoponaik 1 Corintios 6:18 sok albeyaik skʼoplal ini:
-
¿Bin-utʼil-a te ay machʼa ya xyal ta spasel mulwej?
-
¿Bin ya xjuʼ ya apas yuʼun maba ya xyalat ta mulwej?
4. Ya xjuʼ awuʼun spʼajel te mulwej
¿Bintik ya yakʼ te tulan ya kaʼiytik spʼajel te yalel ta mulile? Ilawilik te VIDEO sok albeyaik skʼoplal ini:
-
¿Bin la spas te hermano kʼalal la sta ta ilel te ay bin yak ta spasel sok snopel te ya xjuʼ x-ikʼot bael ta sloʼlayel te yiname?
Te j-abatetik yuʼun Jehová te jun yoʼtanike, jaʼnix jich ya skʼan ya spasik tulan swenta ma x-och ta yoʼtanik te bin ma leke. ¿Bin ya xjuʼ ya apas yuʼun ya alokʼes te bin ma lek ya xtal ta apensare? Kʼoponaik Filipenses 4:8 sok albeyaik skʼoplal ini:
-
¿Bintik-a te ya skʼan ya jnaʼulantike?
-
Teme ya jkʼopontik te Biblia sok jaʼ ya xbajt ta koʼtantik te abatinel ta stojol te Jehová, ¿jaʼbal ya skoltayotik yuʼun ma xyalotik ta mulil? ¿Bin yuʼun?
5. Te mantaliletik yuʼun Jehová jaʼ jlekilaltik
Te Jehová ya snaʼ bin-a te ya yakʼ jlekilaltik. Jaʼ yuʼun ya yalbotik bin-utʼil maʼyuk yabakul te jtaleltik sok te jpensartik sok bin lekilal ya jtatik yuʼun. Kʼoponaik Proverbios 7:7-27 sok ilawilik te VIDEO. Ta patil albeyaik skʼoplal ini:
-
¿Bin-utʼil-a te jaʼnix la sle swokol te kereme? (Ilawilik Proverbios 7:8 sok 9).
-
Jich bitʼil ya yal Proverbios 7:23, 26, te yalel ta mulil ya yakʼ bayal wokolil. Kʼalal ya jpastik te bin leke, ¿bintik wokolil ma jtatik?
-
Teme ma jpastik te bin ma lek, ¿bin-utʼil ya skoltayotik swenta ya jmulantik te kuxinel ta sbajtelkʼinal?
Ay machʼatik ma stojiluk ya yilik te bin ya yal te Biblia ta stojol te machʼatik sjoy sbaik ta winikil o ta antsil ya smulan sbaike. Pero te Jehová jaʼ Dios yuʼun kʼuxul oʼtanil sok ya skʼan te jpisiltik ya jmulantik te kuxinel ta sbajtelkʼinal. Swenta ya jtatik-a te majtanil-abi, ya skʼan ya jchʼuuntik te mantaliletik yuʼune. Kʼoponaik 1 Corintios 6:9-11 sok albeyaik skʼoplal ini:
-
¿Jaʼnaxbal ma lek ya yil Dios te ya smulan sbaik te machʼatik sjoy sbaik ta winikil o ta antsil?
Swenta ya kakʼbeytik stseʼelil yoʼtan te Jehová, jpisiltik ya skʼan ay bin ya jeltay ta jkuxlejaltik. ¿Aybal bin lek ya jtatik-a? Kʼoponaik Salmo 19:8, 11 sok albeyaik skʼoplal ini:
-
¿Kʼax tulanbal ta pasel te mantaliletik yuʼun te Jehová? ¿Bin yuʼun te jich ya awale?
Te Jehová bayal machʼatik skoltayoj ta schʼuunel te mantaliletik yuʼune, jaʼnix jich ya skoltayat te jaʼate.
AY MACHʼATIK JICH YA YALIK: «Teme ya skʼan sbaike, ma muliluk te ya sjokin sbaik ta wayel».
-
¿Bin ya awal te jaʼate?
¿BINTIK LA JNOPTIK?
Jaʼ majtanil yuʼun Jehová te ya sjokin sbaik ta wayel jtul ants sok jtul winik, pero jaʼnax teme jaʼ nujpunem soke.
¿Jilbal ta awoʼtan into?
-
¿Bintik smakojbey skʼoplal te yalel ta mulil?
-
¿Bin ya skoltayotik swenta ma xyalotik ta spasel mulil?
-
¿Bintik lekilal ya jtatik teme ya jchʼuuntik spasel te mantaliletik yuʼun Jehová?
YA XJUʼ YA ANOPXAN INI
Ilawil bin yuʼun te Dios ya skʼan te yakuk xnujpunik te winik sok te ants te ya skʼan jun-nax ya xnainike.
«¿Lekbal te jichnax yikʼoj sbaik jtul winik sok jtul ants?» (Ay ta jw.org)
Ilawil bin-utʼil ya jnaʼtik te maba ya yal te Biblia te akʼa jpʼajtik te antsil winiketike.
«¿Lekbal te sjoynix ta winikil o ta antsil te ya smulan sbaike?» (Ay ta jw.org)
Ilawil bin-utʼil ya skoltayotik te mantaliletik ya jtatik ta Biblia ta swenta te mulwej.
«Te slekʼbeyel skʼunil sbakʼetal ¿pajalbal sok te ya xwayik ta spasel mulil?» (Ay ta jw.org)
¿Bin-utʼil la sjeltay skuxlejal jtul winik te ya smulan-a te winiketike? Kʼopona te bin kʼax ta skuxlejal: «Maba la spʼajonik».
«Jelontesbot skuxlejalik yuʼun te Biblia» (Te J-ilkʼinal ta toyol, 1 yuʼun abril 2011)
a Te mulwej jaʼ te ya sta sbaik te kʼalal ya sjokin sbaik ta wayele, te ya slekʼbey sbaik te skʼunil sbakʼetalik o te ya stuuntes te yitik ta spasel te mulil sok te ya spiktiklanbey sbaik te skʼunil sbakʼetalik.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
