LECCIÓN 42
Te machʼatik nujpunemik sok te machʼatik maʼyuk snujpʼik
Ay tsʼumbaliletik te ya yalik te jaʼlaj tseʼel koʼtantik-a teme ya xnujpunotike. Pero ma spisiluk te machʼatik nujpunemik tseʼel yoʼtanik sok ma skʼan ya yal te ma tseʼel yoʼtanik spisil te machʼatik maʼyuk snujpʼik. Teme ya xnujpunotik o maʼuk, te Biblia ya yal te jaʼ jun majtanil.
1. ¿Bin lekilal ya sta te machʼa maʼyuk snujpʼ?
Te Biblia jich ya yal: «Te machʼa ya xnujpune lek te jich ya spase, pero te machʼa ma xnujpune kʼax lekxan-a» (kʼopona 1 Corintios 7:32, 33; 7:38, TNM). ¿Bin ya skʼan ya yal te jaʼ «kʼax lekxan-a» te machʼa ma xnujpune? Te machʼa ma nujpunem ma jaʼuk ya xbajt ta yoʼtan skanantayel te yinam o te smamalal. Jich yuʼun, jaʼ bayalxan bin ya xjuʼ ya spasik. Jich bitʼil te ya xbajtik ta scholel skʼop Dios ta yan lugar o ay yantikxan te bintik tʼujbil ya xjuʼ ya spasik ta stojol te Jehová. Sok te bin lekxan ya staike, jaʼ te ayxan stiempoik ta stulantesel te schʼuunel yoʼtanik.
2. ¿Bin lekilal ya sta te machʼa nujpunem ta juez?
Ay bin lek ya staik-euk te machʼatik nujpunemik. Te Biblia ya yal te «ha lec xan te cheb te bin utʼil jtuhl nax» (Eclesiastés 4:9). Jaʼ jich ya xkʼot ta pasel ta stojol te machʼatik ya spas ta skuxlejalik te mantaliletik yuʼun te Bibliae. Te machʼatik nujpunemik ta juez la yalik ta jamal te talel kʼaxel kʼux ya yaʼiy sbaik, ya yichʼ sbaik ta mukʼ sok te ya skanantay sbaik. Jaʼ yuʼun, jun yoʼtan ya xkuxinik ma spaj te machʼatik jichnax yikʼoj sbaike. Jaʼnix jich, te yal snichʼnabik jun yoʼtanik sok leknax ya xkuxinik.
3. ¿Bin-utʼil ya yil Jehová te machʼatik nujpunemik?
Kʼalal te Jehová la snujpuntes te sbabial ants sok te sbabial winik, jich la yal: «Te winic ya yihquitay hilel te stat soc snan» sok «ya yicʼ sba soc te yihnam» (Génesis 2:24). Te Jehová jaʼ ya skʼan te talel kʼaxel kʼuxuk ya yaʼiy sbaik sok te manchuk ya yijkitay sbaik. Jaʼnax ya yakʼ ta lajinbeyel sjunal te nujpunel teme ay machʼa yal ta mulwej. Te Jehová jaʼ ya yakʼbey stsa te machʼa maba la spas te mulwej teme ya slajinbey sjunal te snujpunel o maʼuk (Mateo 19:9). a Sok ma lek ya yil teme ay chaʼoxtul yinam o smamalal te j-abatetik yuʼune (1 Timoteo 3:2).
JNOPTIKXAN TA LEK
Kiltik bin-utʼil ya xjuʼ ya ata stseʼelil awoʼtan sok ya awakʼbey stseʼelil yoʼtan te Jehová chikan teme nujpunemat o maʼuk.
4. Mulaname ta lek te awachʼix keremil
Te Jesús jich la yil te yichʼojik jun majtanil te machʼatik ma nujpunemike (Mateo 19:11, 12). Kʼoponaik Mateo 4:23 sok albeyaik skʼoplal ini:
-
Te bitʼil ma nujpun te Jesuse, ¿bin-utʼil la stuuntes te skuxlejal ta abatinel ta stojol te sTat sok ta skoltayel te yantike?
Te j-abatetik yuʼun Dios te maba nujpunemik te ya skʼayinbeyik stalel te Jesús ay stseʼelil yoʼtanik. Ilawilik te VIDEO sok albeyaik skʼoplal ini:
-
¿Bintik ya xjuʼ ya spasik te machʼatik ma nujpunemik?
¿Anaʼojbal-a?
Te Biblia ma xyal jayeb yaʼbilal ya skʼan ya xnujpun te achʼix kerem. Pero ya yal te yakuk smaliy te kʼalal kʼaxemix-a te yachʼix keremil, te jaʼ yorail te jaʼnax ya skʼan te ay machʼa ya xway soke, melel mato yijuben te snopojibal yuʼune (1 Corintios 7:36).
5. Tsaa ta lek te machʼa ya xnujpunat soke
Jun te bin kʼax mukʼ skʼoplal ya jtatik ta nopel jaʼ te machʼa ya xnujpunotik soke. Kʼoponaik Mateo 19:4-6, 9 sok albeyaik skʼoplal ini:
-
¿Bin yuʼun te j-abat yuʼun Dios ya skʼan ya snop ta lek te machʼa ya xnujpun soke?
Te Biblia ya skoltayat ta snaʼel te bin talelil ya skʼan ay yuʼun te mamalalil sok te inamil. Jaʼ xa ale te machʼa kʼux ta yoʼtan te Jehová. b Kʼoponaik 1 Corintios 7:39 sok 2 Corintios 6:14. Patil albeyaik skʼoplal ini:
-
Teme jtul j-abat yuʼun Dios ya skʼan ya xnujpun, ¿bin yuʼun jaʼ ya skʼan ya stsa te machʼa pajal te bin schʼuunej soke?
-
Teme ya xnujpunat sok te machʼa ma kʼux ta yoʼtan te Jehová, ¿binwan yaʼiyel ya yaʼiy sba yuʼun te Jehovae?
Teme ya kakʼtik ta aʼtel chaʼkojt chambalametik te ma pajal smukʼulik, ya sta swokolik. Jaʼnix jich te machʼa ya xnujpun sok te machʼa ma kʼux ta yoʼtan te Jehová ya sta swokol yuʼun.
6. Jichuk xa awil te nujpunel te bin-utʼil ya yil te Jehová
Ta nameyix tal ta lum Israel, ay winiketik te jichnax ya slajinbey sjunal te snujpunelik. Kʼoponaik Malaquías 2:13, 14, 16 sok albeyaik skʼoplal ini:
-
¿Bin yuʼun jkʼaxel ma smulan te Jehová te ay machʼa jichnax ya slajinbey sjunal te snujpunel?
Te kʼalal ay machʼa ya xyal ta mulwej sok ya xlaj skʼoplal te snujpunel, bayal ya yakʼbey swokol te sjoy soknix te yal snichʼnab.
Ilawilik te VIDEO sok albeyaik skʼoplal ini:
-
Teme nujpunemat sok te machʼa ma j-abatuk yuʼun Dios, ¿bin ya xjuʼ ya apas yuʼun ayuk stseʼelil awoʼtanik?
7. Chʼuuna te bin ya yal te Jehová ta swenta te nujpunel
Ay machʼatik wokol ya yaʼiyik te ya schʼuunbeyik te smantal te Jehová ta swenta te nujpunel. c Pero te Jehová ya yakʼtiklanbey bendición te machʼatik ya spasik tulan. Ilawilik te VIDEO.
Kʼoponaik Hebreos 13:4 sok albeyaik skʼoplal ini:
-
¿Tulanbal ta pasel ya awil te mantaliletik yakʼoj te Jehová ta swenta te nujpunele? ¿Bin yuʼun te jich ya anope?
Te Jehová jaʼ ya skʼan te ayuk sjunal te snujpunelik te j-abatetik yuʼune sok te ayuk sjunal teme ay ya yijkitay sbaike, melel ta bayal lugaretik ay leyetik te ya yal te jich ya skʼan pasele. Kʼoponaik Tito 3:1 sok albeyaik skʼoplal ini:
-
Teme nujpunemate, ¿aybal sjunal te nujpunel awuʼune?
AY MACHʼATIK JICH YA SJOJKʼOYIK: «¿Puersabal ya xnujpunotik ta juez?».
-
¿Bin sujtib ya awakʼbey?
¿BINTIK LA JNOPTIK?
Te machʼatik nujpunemik sok te machʼatik maʼyuk snujpʼik yichʼojik jun majtanil te yakʼoj te Jehová. Chikan teme nujpunemotikix o maʼuk ya xjuʼ ay stseʼelil koʼtantik teme jich ya xkuxinotik te bitʼil ya skʼan te Jehová.
¿Jilbal ta awoʼtan into?
-
¿Bin-utʼil ya xjuʼ ya stuuntesik ta lek te skuxlejalik te machʼatik maʼyuk snujpʼik?
-
¿Bin yuʼun ya yal te Biblia te jaʼnax ya xjuʼ ya xnujpunotik sok te machʼa pajal bin jchʼuunejtik soke?
-
Jich bitʼil ya yal te Biblia, ¿bin-ora ya xjuʼ ta lajinbeyel sjunal te nujpunele?
YA XJUʼ YA ANOPXAN INI
¿Bin ya skʼan ya yal te jaʼnax ya xnujpunotik «ta scuenta te Cajwaltique»?
Kiltik cheb videoetik te ya xkoltaywan ta swenta te nujpunel sok te machʼatik snovio sbaik.
Ilawil bintik lekilal staoj jtul hermano ta swenta te bintik la yijkitay jilel.
¿Bin ya skʼan ya yichʼik ta wenta te machʼatik ya skʼan ya yijkitay sbaike?
«Akʼa kichʼtik ta mukʼ te ‹bin junax la yacʼ te Diose›» (Te J-ilkʼinal ta toyol, diciembre 2018)
a Ta nota 4 yame atabeyxan skʼoplal ta swenta te machʼatik ya yijkitay sbaik (manchukme maʼyuk machʼa la spas mulwej).
b Ay tsʼumbaliletik te banti te meʼil tatiletik jaʼ ya stsaik te machʼa ya xnujpun sok te yal snichʼnabik. Te meʼil tatiletik-abi jaʼ ya stsaik te machʼa kʼux ta yoʼtan te Jehová, melel jaʼ mukʼxan skʼoplal ya yilik ma jaʼuk teme ay stakʼine.
c Teme ma nujpunemat ta juez sok te machʼa yakat ta nainele, jaʼatme ya ata ta nopel teme ya xnujpunat o teme ya awijkitay abaike.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
