Yanyantik-a te bin-utʼil ya yilik te yuchʼel trago te ants winiketike. Ay machʼatik te ma spisiluk-ora ya yuchʼik. Ay yantik te jkʼaxel ma xyuchʼik. Sok ay yantik te jkʼaxel ya xyakubike. ¿Bin ya yalbotik te Biblia ta swenta te yuchʼel tragoe?

1. ¿Lekbal te ya kuchʼtik trago?

Te Biblia ma xyal te ma lekuk ta uchʼel te tragoe. Bayal majtanil yakʼojbotik te Jehová, jich bitʼil «te vino te ya yacʼ stseʼejin yoʼtan» te ants winiketik (Salmo 104:14, 15). Ta Biblia jaʼnix jich ya jtabeytik skʼoplal ants winiketik te jun yoʼtanik ta stojol Dios te la yuchʼik vinoe (1 Timoteo 5:23).

2. ¿Bin ya yal te Biblia ta stojol te machʼatik ya smulanik yuchʼel jtebuk?

Te Jehová ma jaʼuknax ma lek ya yil te yakubele, jaʼnix jich ma lek ya yil teme bayal ya kuchʼtike (Gálatas 5:21). Te Biblia jich ya yal: «Ma me xajoquin te machʼatic bayel ya yuchʼic vino» (Proverbios 23:20). Jich yuʼun, teme ya jtatik ta nopel te ya kuchʼtik—ta jtukeltik o sok joʼtaktik—, mame skʼan te ya schʼaytes kʼinal kaʼiytik te ma jnaʼtikix te bin ya kaltik o te bin ya jpastik. Jaʼnix jich ma jkʼantik te ya stsakotik chamel yuʼune. Teme ma jnaʼtik stsajtayel te jayeb ya kuchʼtike, jaʼ lek te jkʼaxel ya kijkitaytike.

3. ¿Bin-utʼil ya kichʼtik ta wenta te bin ya staik ta nopel te yantike?

Ta jujuntul ya jtatik ta nopel teme ya kuchʼtik jtebuk o maʼuk. Mame ayuk bin ya kaltik ta swenta te machʼa ya skʼan ya yuchʼ jtebuke. Sok mame jsujtik ta yuchʼel te machʼa ma skʼane (Romanos 14:10). Jaʼnix jich maba ya kuchʼtik teme ay machʼa maba lek ya yile (kʼopona Romanos 14:21). Melel, te j-abat yuʼun Dios ma «stuquel nax ya sle yutsil slequil» jaʼ ya «slehbe yutsil slequil te yantique» (kʼopona 1 Corintios 10:23, 24).

 JNOPTIKXAN TA LEK

4. Jaʼatme ya anop teme ya awuchʼ o maʼuk

¿Bin yilel la yil te Jesús te yuchʼel trago? Swenta ya jnaʼtik, kiltik te sbabial milagro la spase. Kʼoponaik Juan 2:1-11 sok albeyaik skʼoplal ini:

• Jich bitʼil la jkʼopontikixe, ¿bin yilel la yil Jesús te vino sok bin la snop ta stojol te machʼatik la yuchʼike?

• Te Jesús maba la yal te ma lek ta uchʼel vino, jich yuʼun te j-abatotik yuʼun Dios, ¿bin yilel ya skʼan ya kiltik te machʼatik ya smulanik yuchʼel jtebuke?

Te bitʼil ya xjuʼ ya kuchʼtik jtebuke ma jaʼuk ya skʼan ya yal te lek te spisil-ora ya kuchʼtike. Kʼoponaik Proverbios 22:3 sok ilbeyaik skʼoplal bin-ora ya skʼan ya anop ta lek teme ya awuchʼe:

• Kʼalal ya atij carro o jun máquina.

• Teme ay yikʼoj o swoloj yal te antse.

• Teme la yalbat te doctor te ma xjuʼ ya awuchʼe.

• Teme wokol ya awaʼiy stsajtayel te jayeb ya awuchʼe.

• Kʼalal te j-aʼtel patanetik ya yalbatik te ma xjuʼ ya awuchʼe.

• Kʼalal ajokinej aba sok te machʼa wokol la yaʼiy yijkitayel te tragoe.

¿Lekbal te ya awakʼ ta uchʼel trago ta jun kʼin yuʼun nujpunel o ta yan kʼin? Swenta ya anaʼ bin ya apas, ilawilik te VIDEO.

Kʼoponaik Romanos 13:13 sok 1 Corintios 10:31, 32. Kʼalal ya xlaj awoʼtanik ta skʼoponel te jujun textoe, albeyaik skʼoplal ini:

• ¿Bin-utʼil ya skoltayat te texto ini yuʼun jaʼ ya apas te bin lek ya yil te Jehovae?

 5. Tsajtaya te jayeb ya awuchʼ

Manchukme te Jehová lek ya yil te ya kuchʼtike, jaʼ ma lek ya yil teme ya xjelawotik ta yuchʼele. ¿Bin yuʼun? Kʼoponaik Oseas 4:11, 18 sok albeyaik skʼoplal ini:

• ¿Bin ya xjuʼ ya xkʼot ta pasel te kʼalal ay machʼa ya xyakube?

¿Bin ya skʼan ya jpastik yuʼun ma xjelawotik ta yuchʼel? Ya skʼan ayuk jpʼijiltik ta snaʼel te jayeb ya xkujch kuʼuntike. Kʼoponaik Proverbios 11:2 sok albeyaik skʼoplal ini:

• ¿Bin yuʼun ya skʼan ya anaʼ te jayebnax ya xkujch awuʼun yuchʼele?

6. Ijkitaya te yakubele

 ¿BINTIK LA JNOPTIK?

Te trago o te vino jaʼ yakʼojbotik te Jehová yuʼun ya jmulantik, pero ma smulan te ya xyakubotik sok te ya xjelawotik ta yuchʼele.

¿Jilbal ta awoʼtan into?

• ¿Bin ya yal te Biblia ta swenta te yuchʼel trago?

• ¿Bin ya spas te machʼa bayal ya yuchʼe?

• ¿Bin-utʼil ya kichʼtik ta wenta te machʼa ya sta ta nopel teme ya yuchʼ jtebuk o maʼuk?