LECCIÓN 47
¿Chapalatixbal yuʼun ya awichʼ jaʼ?
Ya anaʼbeyix sba ta lek te Jehová ta swenta te yakat ta snopel te Bibliae. Sok ayniwan yakatix ta spasel ta akuxlejal te bin yakat ta snopel ta Bibliae. Pero ayniwan bin ya smakat yuʼun ya awakʼ aba ta stojol te Jehová sok te ya awichʼ jaʼe. Ta lección ini ya kiltik bin-utʼil juʼ yuʼunik stsalel te makel te machʼatik la yichʼikix jaʼ sok te bin ya xjuʼ ya apas-euk yuʼun ya awichʼ jaʼ.
1. ¿Bayalbal bin ya skʼan ya anop ta Biblia swenta ya awichʼ jaʼ?
Swenta ya awichʼ jaʼ, ya skʼan kʼoemuk ta awoʼtan te smelelil kʼope (1 Timoteo 2:4). Jaʼ-abi ma skʼan ya yal te puersa ya skʼan ya anaʼ sujtesel spisil te bin ya awichʼ jojkʼoybeyel ta swenta te Bibliae, melel jaʼnix jich te machʼatik ayix jaʼbil la yichʼik jaʼe ya skʼan ya snopikxan-euk te bin ya yal te sKʼop Diose (Colosenses 1:9, 10). Pero te bin ya skʼan kʼoemuk ta awoʼtane: jaʼ te bintik nail ya skʼan nopbeyel skʼoplal ta Bibliae. Te ancianoetik jaʼme ya yilik teme ayix apʼijil ta swenta te Biblia.
2. ¿Bintik ya skʼan ya apas yuʼun ya awichʼ jaʼ?
Te Biblia ya yal: «Suhtesa awoʼtanic soc suhtanic tal» (kʼopona Hechos 3:19). Jaʼme te bin ya skʼan ya apas te kʼalal mato awichʼoj jaʼ-ae. Pero, ¿bin ya skʼan ya yal-abi? Jaʼ te kʼaxto ya amel awoʼtan yuʼun te biluk mulil apasoj sok te ya akʼanbey perdón te Jehová. Soknix te jkʼaxel ya apʼaj spisil te bintik maba lek ta pasel sok te ya awakʼ ta awoʼtan te jich ya xkuxinat te bin-utʼil lek ya yil te Diose. Jaʼnix jich, ya skʼan ya yal te ya xbaat ta spisil te tsoblejetik sok te ya xlokʼat ta scholel skʼop Dios sok te congregación.
3. ¿Bin yuʼun ma skʼan ya smakat ta yichʼel jaʼ te xiwele?
Ay machʼatik jaʼ ya xiʼik te ma xkʼot ta pasel yuʼunik te bin jamal ya yalbeyik te Jehovae. Aynix bin-ora ya xchʼayat, jich bitʼil te j-abatetik yuʼun Dios te ya yalbey skʼoplal te Bibliae. Pero julukme ta awoʼtan te ma jaʼuk ya smaliy te Jehová te kʼax tojotike (kʼopona Salmo 103:13, 14). Tseʼelme yoʼtan te Jehová teme ya apas tulan te ban kʼalal ya xjuʼ awuʼune. ¡Jaʼme ya skoltayat! Te Jehová jamal ya yalbotik te maʼyuk bin ya slokʼesotik ta stojol te skʼuxul yoʼtan (kʼopona Romanos 8:38, 39).
JNOPTIKXAN TA LEK
Kiltik cheb te bin ya skoltayat yuʼun maʼyuk bin ya smakat ta yichʼel jaʼ: te ya anaʼbey sba ta lek te Jehová sok te ya awichʼ te koltayel ya yakʼbate.
4. Naʼbeya sba ta lek te Jehová
¿Jayebto ya skʼan ya anaʼbey sba te Jehová swenta ya awichʼ jaʼ? Chikan jayeb, jaʼnax teme kʼuxix ta awoʼtan te Jehová sok ya akʼan ya achʼuunbey te smantale. Ilawilik te VIDEO swenta ya anaʼ te bin spasojik te machʼatik yakik ta snopel te Biblia. Ta patil albeyaik skʼoplal ini:
-
¿Bin koltayotik yuʼun ya yichʼik jaʼ te machʼatik la kiltik ta video?
Kʼoponaik Romanos 12:2 sok albeyaik skʼoplal ini:
-
¿Aybal bin ya yakʼ ta nopel te Biblia te ma mero schʼuunej awoʼtane? ¿Schʼuunejbal awoʼtan te jaʼ ya yakʼik ta nopel te bin smelelil te testigoetik yuʼun Jehová?
-
Teme ay bin ma mero schʼuunej awoʼtan, ¿bin ya xjuʼ ya apas?
5. Mame ayuk bin ya smakat ta yichʼel jaʼ
Ta jpisiltik ay bin ya smakotik kʼalal ya jkʼan ya kakʼ jbatik ta stojol te Jehová sok te ya kichʼtik jaʼ. Kiltik junuk ejemplo, ilawilik te VIDEO. Ta patil albeyaik skʼoplal ini:
-
¿Bintik la yijkitay te Narangerel yuʼun ya x-abatin ta stojol te Jehovae?
-
Te bitʼil kʼux ta yoʼtan te Jehovae, ¿bin-utʼil koltayot ta yijkitayel te bin ya xmakot yuʼun-ae?
Kʼoponaik Proverbios 29:25 sok 2 Timoteo 1:7, sok albeyaik skʼoplal ini:
-
¿Banti ya jta yip koʼtantik yuʼun ma xiwotik ta stsalel te bin ya smakotike?
6. Jaʼme ya skoltayat te Jehová
Te Jehová jaʼme ya skoltayat ta spasbeyel te skʼanojel yoʼtane. Ilawilik te VIDEO sok albeyaik skʼoplal ini:
-
¿Bin yuʼun ma skʼan ya yichʼ jaʼ-a te winik la kiltik ta video?
-
¿Bin koltayot yuʼun ya smukʼulinxan yoʼtan te Jehovae?
Kʼoponaik Isaías 41:10, 13 sok albeyaik skʼoplal ini:
-
¿Bin yuʼun ya xjuʼ ya schʼuun awoʼtan te ya xjuʼ ya akʼotes ta pasel te bin ya awalbey te Jehová te kʼalal ya awakʼ aba ta stojole?
7. Mukʼuk skʼoplal ta awoʼtan te skʼuxul yoʼtan te Jehová
Kʼalal ya anopilan te kʼuxat ta yoʼtan te Jehovae, jaʼme ya stijbat awoʼtan ta yalel wokol sok te ya awakʼ aba ta abatinel ta stojol ta sbajtelkʼinal. Kʼoponaik Salmo 40:5 sok albeyaik skʼoplal ini:
-
¿Bintik yakʼojbat te Jehová te kʼax mukʼ skʼoplal ta awoʼtane?
Te j-alwanej Jeremías mero kʼux ta yoʼtan-a te Jehová sok te bin la yakʼ ta naʼele, sok kʼax mukʼ skʼoplal yiloj-a te yichʼojbey te sbiil te Diose. Jich la yal: «Ha stseʼelil coʼtan cʼoht te acʼope soc ha yutsil coʼtan cʼoht, como quichʼojbat abihil, Jehová» (Jeremías 15:16). Akʼbeya sujtib te jojkʼoyeletik ini:
-
¿Bin yuʼun te jaʼ jun mukʼul majtanil te ya x-ochotik ta testigo yuʼun Jehová?
-
¿Yabal akʼan awichʼ jaʼ yuʼun ya x-ochat ta testigo yuʼun Jehová?
-
¿Aybal bin ya smakat?
-
¿Bin ya xjuʼ ya apas yuʼun ya xjuʼ ya awichʼ jaʼ?
AY MACHʼATIK JICH YA YALIK: «Jaʼ ya jxiʼ teme ma juʼ kuʼun spasel te bin la kalbey te Jehová te kʼalal la kichʼ jaʼe».
-
¿Jichbal ya awaʼiy aba te jaʼate?
¿BINTIK LA JNOPTIK?
Yame skoltayat te Jehová ta stsalel spisil te bin ya xjuʼ ya smakat ta yichʼel jaʼ.
¿Jilbal ta awoʼtan into?
-
¿Bayalbal bin ya skʼan ya anop ta Biblia swenta ya awichʼ jaʼ?
-
¿Bintik ya skʼan ya apas yuʼun ya awichʼ jaʼ?
-
¿Bin yuʼun ma skʼan ya smakat ta yichʼel jaʼ te xiwele?
YA XJUʼ YA ANOPXAN INI
Ilawil te bin ya skʼan ya stijbat awoʼtan ta yichʼel jaʼ.
«¿Chapalatixbal yuʼun ya awichʼ jaʼ?» (Te J-ilkʼinal ta toyol, marzo 2020)
Ilawil te bin ya xjuʼ ya skoltayat ta stsalel te bin ya smakate.
«¿Bin ya smakon ta yichʼel jaʼ?» (Te J-ilkʼinal ta toyol, marzo 2019)
Ilawil bin juʼ yuʼun spasel jtul winik yuʼun ya yichʼ jaʼ.
Jtul winik te Ataa sbiile, xchebet yoʼtan-a teme ya yichʼ jaʼe. Ilawil te bin koltayot yuʼun ya yichʼ jaʼ.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
