Te machʼatik nujpuneliktoe jaʼ ya skʼanik te maʼyuk bin-ora ya xlaj te stseʼelil yoʼtanike. Ya xjuʼ jich ya xkʼot ta pasel. Jich yilojik te machʼatik bayalix jaʼbil nujpunemik sok te spasojik tulan ta stʼunel te bin ya yal te Biblia.

1. ¿Bin ya yal te Biblia ta stojol te mamalalile?

Te Jehová la yakʼbey yaʼtel ta jolal ta yutil na te mamalalile (kʼopona Efesios 5:23). Sok ya skʼan te lekuk te bin ya spas ta stojol te sfamiliae. Te Biblia jich ya yalbey te mamalaliletik: «Cʼux me xawaʼiy ta awoʼtanic te awihnamic» (Efesios 5:25). ¿Bin-utʼil ya spas-abi? Jaʼ te kʼux ta yoʼtan te yinam ta komonsitil sok te kʼalal stukel ayik. Ya skanantay, ya yakʼbey te bin ya xtuun yuʼun sok ya xkʼot ta yoʼtan te bin yaʼiyel ya yaʼiy sba (1 Timoteo 5:8). Pero te bin mukʼxan skʼoplale, jaʼ te ya skanantaybey te schʼuunel yoʼtane (Mateo 4:4). Ya xjuʼ ya sjokin ta skʼoponel te Dios sok te Biblia. Te winik te ya skanantay sok skʼuxul yoʼtan te yiname, lekme ya yil sba sok te Jehová (kʼopona 1 Pedro 3:7).

2. ¿Bin ya yal te Biblia ta stojol te inamile?

Te Biblia jich ya yal: «Te antse acʼa yichʼ ta cuenta te smamalale» (Efesios 5:33). ¿Bin-utʼil ya spas-abi? Jaʼ te ya yil te lekil talelil ay yuʼun te smamalal sok te mukʼ skʼoplal ya yil te bitʼil ya xkanantayot sok te snichʼnabe. Jaʼnix jich ya yichʼ ta mukʼ kʼalal ma skontrain te bin ya sta ta nopel spasel, leknax ya skʼopon sok lek bin ya yal ta stojol manchukme ma Testigouk.

3. ¿Bin-utʼil ya xjuʼ lekxan ya yil sbaik te machʼatik nujpunemike?

Te Biblia ya yal te machʼatik nujpunemik «junax sbaqʼuetal ya xcʼoht schebalic» (Mateo 19:5). Jaʼ yuʼun ya spasik tulan yuʼun maʼyuk bin ya xnamajtesotik. Ya slokʼesik tiempo yuʼun ya sjokin sbaik sok ya yalbey sbaik ta jamal te bin ya snopik sok te bin-utʼil ya yaʼiy sbaike. Jaʼnix jich, mukʼ skʼoplal ya yil sbaik jich bitʼil mukʼ skʼoplal ya yilik te Jehovae. Sok ya stsajtay sbaik yuʼun maʼyuk machʼa yan ya xjajch smulan sbaik sok.

 JNOPTIKXAN TA LEK

4. Mamalalil, kʼuxuk ta awoʼtan sok kanantaya te awinam

5. Inamil, kʼuxuk ta awoʼtan sok ichʼa ta mukʼ te amamalal

Te Biblia ya yalbey te inamiletik te akʼa yichʼik ta mukʼ te smamalalik chikan teme ya yichʼik ta mukʼ te Jehová o maʼuk. Kʼoponaik 1 Pedro 3:1, 2 sok albeyaik skʼoplal ini:

• Ya jnaʼtik te ya akʼan te yakuk yichʼ ta mukʼ Jehová te amamalale. Pero, ¿jaʼbal ya akoltay-a teme spisil-ora ya acholbey skʼop Dios, o jaʼ teme ya awakʼ ta ilel lek atalel sok ya awichʼ ta mukʼ? ¿Bin yuʼun jich ya awal?

Te mamalalil sok te inamil ya xjuʼ te lek ya xkʼot ta lokʼel te bin ya staik ta nopele. Pero te antse ayniwan ma acuerdo ay sok te smamalale.  Teme jiche, ya xjuʼ ya yalbey sok slamalil yoʼtan te bin ya snope. Pero mame skʼan ya xchʼay ta yoʼtan te jaʼ akʼbot yaʼtel yuʼun Jehová te mamalalil ta stael ta nopel te bin lek ta stojol te sfamiliae. Ya skʼan ya spas tulan ta skoltayel te bin ya sta ta nopel te smamalale, jichme tseʼel yoʼtanik ta yutil na. Kʼoponaik 1 Pedro 3:3-5 sok albeyaik skʼoplal ini:

• ¿Bin yaʼiyel ya yaʼiy sba te Jehová kʼalal ya yil te ya yichʼ ta mukʼ te smamalal te antse?

6. Ya xjuʼ ta chajpanel te kʼopetik ya xjajche

 ¿BINTIK LA JNOPTIK?

Te mamalalil sok te inamil ya xjuʼ ya sta stseʼelil yoʼtanik teme kʼux ya yaʼiy sbaik, ya yichʼ sbaik ta mukʼ sok ya spas ta skuxlejalik te bin ya yal te Bibliae.

¿Jilbal ta awoʼtan into?

• ¿Bin ya skʼan ya spas te mamalalil yuʼun tseʼel yoʼtan sok te yinam?

• ¿Bin ya skʼan ya spas te inamil yuʼun tseʼel yoʼtan sok te smamalal?

• Teme nujpunemate, ¿bin textoetik ta Biblia ya xjuʼ ya skoltayat yuʼun tseʼel awoʼtanik?