LECCIÓN 50
¿Bin-utʼil ya ata stseʼelil awoʼtan sok te afamilia? (parte 2)
Te alnichʼanetik jaʼ majtanil yuʼun Jehová sok jaʼ ya skʼan te yakuk skanantayik ta lek te smajtanik te meʼil tatiletike. Jaʼ yuʼun ya spʼijubtes te meʼil tatiletik sok te alnichʼanetik swenta ya xkoltaywanik ta yakʼel lamalkʼinal ta yutil na.
1. ¿Bin ya yal te Jehová ta stojol te meʼil tatiletike?
Te Jehová ya skʼan te kʼuxuk ta yoʼtan te yal snichʼnab te meʼil tatiletike sok te yakuk slokʼesik tiempo ta sjokinele. Jaʼnix jich ya skʼan te yakuk skanantayik ta swenta te bin ya xjuʼ ya x-utsʼinotik yuʼun sok te yakuk spʼijubtesik ta swenta te Biblia (Proverbios 1:8). Te Dios jich ya yalbey te tatiletik: «Chʼitesaik ta swenta te [...] tsitsel yuʼun te Jehová» (kʼopona Efesios 6:4). Te Jehová tseʼel yoʼtan kʼalal te meʼil tatiletik ya snojptes te yal snichʼnabik jich te bitʼil ya skʼan stukele sok te maʼyuk machʼa yan ya yakʼbeyik spas te aʼtelil-abi.
2. ¿Bin ya yal te Jehová ta stojol te alnichʼanetike?
Te Jehová ya yalbey te alnichʼanetik te akʼa schʼuunbeyik smantal te smeʼ statike (kʼopona Colosenses 3:20). Teme ya x-ichʼawanik ta mukʼ sok ya schʼuunik mantal, tseʼelme yoʼtan te smeʼ statik soknix te Jehová (Proverbios 23:22-25). Te Jesús la yakʼ ta ilel lekil ejemplo; manchukme jmulawiletik-a te smeʼ state, la schʼuunbey smantal sok la yichʼtiklan ta mukʼ (Lucas 2:51, 52).
3. ¿Bin-utʼil ya xjuʼ ya xnoptsaj ta stojol Jehová te afamiliae?
Teme ay awal anichʼnabe, yaniwan akʼan te kʼuxuk ta yoʼtanik te Jehová jich bitʼil te jaʼate. ¿Bin ya xjuʼ ya apas? Jaʼ te ya «awalulambe yaʼiyic te awal-anichʼnab [te skʼop Jehová], soc ya me awalbe scʼoblal cʼalal ayat ta ana, cʼalal ya xbehenat ta be» (Deuteronomio 6:7). ¿Mabal jichuk te ya skʼan ya awalulanbey te awal anichʼnab te bin ya skʼan ya spasike? Te texto-abi ya skʼan ya yal te jujun kʼajkʼal ya skʼan ya ale bin-ora ya awalbey te skʼop Jehová. Jaʼnix jich, spisil te afamilia ya skʼan ya stsob sbaik ta snopel te Biblia ta jujun semana. Manchukme maʼyuk awal anichʼnab, yame skoltayat snopel te Biblia ta jujun semana.
JNOPTIKXAN TA LEK
KIltik bintik textoetik ta Biblia ya xjuʼ ya skoltayat yuʼun jun yoʼtan sok tseʼel yoʼtan te afamiliae.
4. Nojptesa sok skʼuxul awoʼtan te awal anichʼnabe
Kʼax wokol ta nojptesel te alnichʼanetike. ¿Bin-utʼil ya xjuʼ ya skoltayat te Biblia? Kʼoponaik Santiago 1:19, 20 sok albeyaik skʼoplal ini:
-
¿Bin-utʼil ya yakʼ ta ilel skʼuxul yoʼtan te meʼil tatil kʼalal ya xkʼopoj sok te yal snichʼnabe?
-
¿Bin yuʼun te ma skʼan ilinem-a te tatil te kʼalal ya stojobtes te yal snichʼnabe? a
5. Kanantaya te awal anichʼnab
Swenta ya akanantay te awal anichʼnabe mukʼ skʼoplal te ya acholbey yaʼiy bitʼil-a te ya sjokin sbaik ta wayel jtul ants sok jtul winik. Ayniwan kʼexlaltik sba ta alel-abi. Ilawilik te VIDEO sok albeyaik skʼoplal ini:
-
¿Bin yuʼun ay meʼil tatiletik te wokol ya yaʼiyik yalbeyel te yal snichʼnabik bitʼil-a te ya sjokin sbaik ta wayel jtul ants sok jtul winik?
-
¿Bin koltaybilik te meʼil tatiletik ta yalbeyel skʼoplal-abi te yal snichʼnabike?
Jich bitʼil yalojix-a te Biblia, te balumilal yuʼun te Satanás kʼaxtoxan ta bolobel. Kʼoponaik 2 Timoteo 3:1, 13 sok albeyaik skʼoplal ini:
-
Te bin ya yal te versículo 13 tey ochem skʼoplalik-a te machʼatik ya stsakik te alaletik yuʼun ya yutsʼinik. Jich yuʼun, ¿bin yuʼun te meʼil tatiletik ya skʼan ya yalbey te yal snichʼnabik bitʼil-a te ya sjokin sbaik ta wayel jtul ants sok jtul winik? ¿Bin-utʼil ya xjuʼ ya skanantayik ta stojol te j-utsʼinwanejetike?
¿Anaʼojbal-a?
Te testigoetik yuʼun Jehová spasojik junetik sok videoetik te ya skoltay te meʼil tatiletik ta spʼijubtesel sok ta skanantayel te yal snichʼanik yuʼun ma xyichʼik utsʼinel. Jich bitʼil ini:
-
Kanantaya te awal anichʼnabike (video)
-
Jnopbeytik stalel te Lekil Jpʼijubteswanej, capítulo 10 sok 32
-
«Albeya bitʼil-a te ya sjokin sbaik ta wayel te ants sok te winik» (¡Wikʼame asit!, núm. 5 2016)
6. Ichʼa ta mukʼ te ameʼ atate
Te alaletik sok te jchʼieletik ya skʼan ya yichʼik ta mukʼ te smeʼ statike, ya yakʼik ta ilel ta swenta te bitʼil ya skʼoponike. Ilawilik te VIDEO sok albeyaik skʼoplal ini:
-
¿Bin yuʼun te jaʼ lek te stojiluk ya skʼoponik te smeʼ statik te achʼix keremetike?
-
¿Bin-utʼil ya yichʼ ta mukʼ te smeʼ stat te achʼix keremetike?
Kʼoponaik Proverbios 1:8 sok albeyaik skʼoplal ini:
-
¿Bin ya skʼan ya spas te achʼix kerem kʼalal ay bin ya x-albot spas yuʼun te smeʼ state?
7. Tsoba aba sok te afamilia ta yichʼel ta mukʼ te Jehová
Te testigoetik yuʼun Jehová ya slokʼesik tiempo jujun semana yuʼun ya yichʼik ta mukʼ te Jehová sok te sfamiliaike. ¿Bin ya spasik ta yorail-abi? Ilawilik te VIDEO sok albeyaik skʼoplal ini:
-
¿Bin ya xkoltaywan yuʼun jujun semana ya yichʼ pasel te yichʼel ta mukʼ Dios ta sjunal na?
-
¿Bin ya xjuʼ ya spasik te meʼil tatiletik yuʼun ya xkoltayotik sok ya smulanik te yichʼel ta mukʼ te Diose? (Ilawil te foto te ay ta sjajchibal te lección).
-
¿Aybal bin ya smakat ta yichʼel ta mukʼ te Jehová sok te afamiliae? ¿Bin-a te ya smakate?
Ta namey kʼinal, te Jehová jaʼ ya skʼan-a te israeletik ya stsob sbaik sok te sfamiliaik yuʼun ya yalbeyik skʼoplal te sKʼop Diose. Kʼoponaik Deuteronomio 6:6, 7 sok albeyaik skʼoplal ini:
-
¿Bin-utʼil ya xjuʼ ya apas te bin ya yal te texto ini?
Te bintik ya xjuʼ ya apas sok te afamilia ta yichʼel ta mukʼ te Dios:
-
Chajpana abaik ta swenta te tsoblej.
-
Kʼoponaik sok albeyaik skʼoplal jun ejemplo te ay ta Biblia te ya amulanike.
-
Teme ay alaletik awuʼune, pasa descargar o imprimir ta jw.org te bintik ya xjuʼ ya spas te alaletik.
-
Teme ay achʼix kerem awuʼune, tsaa junuk artículo ta jw.org ta swenta te jchʼieletik.
-
Pasbeyaik señail jun ejemplo te ay ta Biblia.
-
Ilawilik sok albeyaik skʼoplal junuk video te ay ta jw.org.
AY MACHʼATIK JICH YA YALIK: «Te Biblia kʼax chujkul, ma xjuʼ ya xkʼot ta yoʼtan te chʼin alaletike».
-
¿Bin ya awal te jaʼate?
¿BINTIK LA JNOPTIK?
Te Jehová ya skʼan te kʼuxuk ta yoʼtan yal snichʼnab te meʼil tatiletike, te ya snojptesik sok ya skanantayik; te yakuk yichʼik ta mukʼ smeʼ statik te alnichʼanetik, te ya schʼuunik mantal, sok te jun-nax ya yichʼik ta mukʼ te Jehová.
¿Jilbal ta awoʼtan into?
-
¿Bin-utʼil ya xjuʼ ya spʼijubtesik sok ya skanantayik te yal snichʼnabik te meʼil tatiletike?
-
¿Bin-utʼil ya yakʼik ta ilel te ya yichʼ ta mukʼ te smeʼ statik te alnichʼanetike?
-
¿Bin lekilal ya sta te afamilia teme jujun semana ya apasik te yichʼel ta mukʼ te Diose?
YA XJUʼ YA ANOPXAN INI
¿Bintik ya xjuʼ ya snopik te awal anichʼnab te ya xkoltayot te kʼalal mukʼikix-ae?
«6 leccionetik ta stojol te awal anichʼnabik» (¡Wikʼame asit!, núm. 2 2019)
Ilawil bin ya xjuʼ ya spasik te machʼatik ya skanantayik te machʼa ayix yaʼbilalike.
«¿Yabal skʼan Dios te ya jkanantaytik te jmeʼ jtatik te ayix yaʼbilalike?» (Ay ta jw.org)
Ilawil bin-utʼil kʼot ta lekil tatil jtul winik te ma snaʼ schʼitesel-a te yal snichʼnabe.
Te Jehová la snojptesonkotik ta spʼijubtesel te kal jnichʼnabkotike (5:58)
Ilawil bin ya xjuʼ ya spas jtul tatil yuʼun lek ya yil sba sok te snichʼnabe.
a Te kʼopil «tojobtesel», ya skʼan ya yal snojptesel sok skoltayel te alnichʼan ta sjeltayel te bin ma lek ya spase. Ma jaʼuk ya skʼan ya yal te ya yakʼbeyik tulan castigo sok te ya smilik ta majel (Proverbios 19:18).
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
