LECCIÓN 52
¿Mukʼbal skʼoplal te bitʼil ya jchajpan jbatike?
Ta jujuntul yanyantik-a te bitʼil ya jmulan ya jchajpan jbatike. Teme ya jtʼuntik te bin ya yal te Bibliae, ya xjuʼ ya kakʼbeytik stseʼelil yoʼtan te Jehová ta swenta te bitʼil ya jchajpan jbatike. Kiltik cheʼoxeb textoetik ta swenta-abi.
1. ¿Bin ya yal te Biblia ta swenta te bitʼil ya skʼan ya jchajpan jbatike?
Te j-abatetik yuʼun Dios ya skʼan te lekuk ta ilel te skʼuʼ spakʼik, te stojiluk, te tsajtaybiluk ta lek sok te maʼyuk yabakul, yuʼun jich ya xchiknaj ta ilel-a te «schʼuhunejic te Diose» (1 Timoteo 2:9, 10). Ilawil bin ya skʼan ya yal-abi. 1) Lekuk ta ilel te jkʼuʼ jpakʼtik. Jich bitʼil awiloj ta tsoblejetik, yanyantik-a te bitʼil ya jmulan ya jchajpan jbatik, pero te jkʼuʼ jpakʼtik sok te bitʼil ya jtes te joltike ya skʼan ya yakʼ ta ilel te ya kichʼtik ta mukʼ te Diose. 2) Stojiluk ya jlaptik te jkʼuʼ jpakʼtike, te maba chajpnax ta ilel o te ay bin ma lek ya xtal ta spensar yuʼun te yantike. 3) Yakuk jtsajtay jbatik ta stuuntesel te bintik ya xlokʼ ta moda. 4) Te bin kileltik ya skʼan ya yakʼ ta ilel te jchʼuunejtik te Diose (1 Corintios 10:31).
2. ¿Bin yilel ya xjuʼ ya yilik te hermanoetik te bitʼil ya jchajpan jbatike?
Melelnix-a te libre ayotik ta stsael te bin ya jlaptike, pero ya skʼan ya kichʼtik ta wenta teme maba ya yutsʼinbey yoʼtan te yantike. Ya jpastik tulan yuʼun lekuk ya yaʼiy sba kuʼuntik te yantike. Ya jchʼuuntik te bin ya yal te Biblia: «Acʼa jlehbetic te bin lec yoʼtan yuʼun te jpat-xuhctic, [...] yuʼun hich ya yichʼ yipic a» (kʼopona Romanos 15:1, 2).
3. ¿Bin-utʼil ya jkoltaytik te yantik ta swenta te bitʼil ya jchajpan jbatike?
Ya jpastik tulan te spisil-ora lek ta ilel te jkʼuʼ jpakʼtike, pero kʼaxtoxan-a te kʼalal ya xbootik ta tsoblej sok ta scholel skʼop Dios. Jaʼme ya jkʼantik te ya yaʼiyik te skʼop Diose, ma jaʼuk te ya xchʼaytesbot yoʼtanik te bitʼil jchajpanoj jbatike. Yame jkʼantik te ayuk yutsil kuʼuntik te «pʼijubtesel yuʼun te Diose» (Tito 2:10, TZOXCH).
JNOPTIKXAN TA LEK
Kiltik bin-utʼil ya skʼan ya jchajpan jbatik sok bin yilel te jkʼuʼ jpakʼtik swenta ya xchiknaj ta ilel te j-abatotik yuʼun Diose.
Ta swenta te bin kileltik ya xchiknaj ta ilel te ya kichʼtik ta wenta te j-aʼtel patanetik. Melelnix-a te jaʼ ya yil te koʼtantik te Jehovae, pero te bin yilel ya jchajpan jbatik ya skʼan ya yakʼ ta ilel te ya kichʼtik ta mukʼ.
4. Te jkʼuʼ jpakʼtik ya yakʼ ta ichʼel ta mukʼ te Jehová
¿Bin yuʼun bayal skʼoplal ta koʼtantik te bitʼil ya jchajpan jbatike? Kʼoponaik Salmo 47:2 sok albeyaik skʼoplal ini:
-
¿Bin yilel ya skʼan ya jchajpan jbatik te bitʼil jnaʼojtik te kichʼojtik te sbiil te Diose?
-
¿Jichbal ya awil te mukʼ skʼoplal te bitʼil ya jchajpan jbatik te kʼalal ya xbootik ta tsoblejetik sok ta scholel skʼop Dios? ¿Bin yuʼun te jich ya awale?
5. ¿Bin ya skoltayotik yuʼun lekuk ta ilel te bitʼil ya jchajpan jbatike?
Ma jaʼuk mukʼ skʼoplal teme kʼax toyol stojol te jkʼuʼ jpakʼtike. Te bin mukʼ skʼoplale jaʼ te maʼyuk yabakul sok te snujpʼuk ta lapel jaʼ chikan te bin yak jpasbeltike. Kʼoponaik 1 Corintios 10:24 sok 1 Timoteo 2:9, 10. Ta patil albeyaik skʼoplal bin yuʼun maba ya jlaptik kʼuʼul pakʼal...
-
... te ay yabakul sok te ma snujpʼuk ta lapel.
-
... te pitsʼil, te ya yakʼ ta ilel te jbakʼetaltik o te ay bin ma lek ya xtal ta spensar yuʼun te yantike.
Manchukme maba ya jchʼuuntikix te ley yuʼun te Moisés, ya yakʼ jnaʼtik te bin ya snop te Jehová. Kʼoponaik Deuteronomio 22:5 sok albeyaik skʼoplal ini:
-
¿Bin yuʼun ma lek te jtul ants ya schajpan sba o ya slap kʼuʼul pakʼal te winik ta ilel yuʼune o ants ta ilel te winike?
Kʼoponaik 1 Corintios 10:32, 33 sok 1 Juan 2:15, 16, sok albeyaik skʼoplal ini:
-
Teme ta jlumaltik o te hermanoetik ma lek ya yilik te bitʼil ya jchajpan jbatike, ¿yabal skʼan ayuk skʼoplal ta koʼtantik? ¿Bin yuʼun?
-
¿Bin yilel te skʼuʼ spakʼ te ants winiketik ta alumal sok bin yilel ya schajpan sbaik?
-
¿Aybal kʼuʼul pakʼal te ma snujpʼuk te jich ya slap-euk te j-abat yuʼun te Diose? ¿Bin yuʼun?
Yanyantik bitʼil ya xjuʼ ya jchajpan jbatik, jaʼnax teme lek ya yil te Jehová.
AY MACHʼATIK JICH YA YALIK: «Ya xjuʼ ya jchajpan jba te bitʼil ya skʼan koʼtane».
-
¿Jichbal ya anop-euk te jaʼate? ¿Bin yuʼun?
¿BINTIK LA JNOPTIK?
Kʼalal ya jtsatik ta lek te bin yilel te jkʼuʼ jpakʼtik sok te bitʼil ya jchajpan jbatike, yame kakʼtik ta ilel te ya kichʼtik ta mukʼ te Jehová sok te yantike.
¿Jilbal ta awoʼtan into?
-
¿Bin yuʼun mukʼ skʼoplal ta yoʼtan te Jehová te bin yilel ya jchajpan jbatike?
-
¿Bin ya yal te Biblia te ya skoltayotik ta stsael ta lek te bitʼil ya jchajpan jbatike?
-
¿Bin-utʼil te jkʼuʼ jpakʼtik o te bin kileltik ya yakʼbey yil te ants winiketik te smelelil jchʼuunjelotike?
YA XJUʼ YA ANOPXAN INI
Ilbeya skʼoplal bin ya snopik te yantik ta swenta te bin yilel te akʼuʼ apakʼe.
Ilawil bin yuʼun nail ya skʼan ya anop ta lek teme ya apasbey aba jun tatuaje.
Ilawil yantik tojobtesel ta Biblia te ya skoltayat ta stael ta nopel te bin ya apase.
Ilawil bin koltayot jtul ants te pekʼel yoʼtan swenta ma xchebajtesbot yoʼtan te bitʼil ya schajpan sbaik te yantike.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
