LECCIÓN 53
Lekuk ya yil Jehová te bin ya akʼases kʼajkʼal-ae
Te Jehová jaʼ te «Dios te tseʼel yoʼtane» (1 Timoteo 1:11, TNM). Ya skʼan te tseʼeluk koʼtantik sok te ya jmulantik te jkuxlejaltike. Ya smulan te ya jkux koʼtantik sok te ya jlokʼestik tiempo ta spasel te bin ya jmulantike. Ta lección ini, ya kiltik bin-utʼil ya xjuʼ ya jmulantik te bin ya jkʼasestik kʼajkʼal-ae, sok te jaʼuk ya jtsatik te bin lek ya yil te Jehovae.
1. ¿Bin ya skʼan ya kichʼtik ta wenta kʼalal ay bin ya jkʼasestik kʼajkʼal-ae?
¿Bin ya amulan spasel te kʼalal ya akux awoʼtane? Ay machʼatik ya smulanik te ya xjilik ta snaik ta skʼoponel jun libro, ta yaʼiyel música, ta yilel película o ya x-ochik ta Internet. Ay machʼatik ya smulanik te ya xbajtik ta mukʼul jaʼ sok te yamigotakik, o ya yaʼiyik tajimal. Chikan bin-a te ya jmulantik spasele, ya skʼan jaʼ ya jtsatik te «bin lec yoʼtan yuʼun te Cajwaltique» (Efesios 5:10). Mukʼ skʼoplal te ya xkʼot ta koʼtantik-abi, melel bayal te bin ya skʼasesik kʼajkʼal-a te ants winiketike ya yilay te Jehovae, jich bitʼil te majtamba, te mulwej o te espiritismo (kʼopona Salmo 11:5). ¿Bin ya skoltayotik ta stsael te bin ya jpastik o ya kiltik?
Jtsatik ta lek te kamigotaktik. Teme kʼux ta yoʼtanik te Jehová, ya skoltayotik ta spasel te bin lek sok ta stsael ta lek te bin ya jkʼasestik kʼajkʼal-ae. Jich bitʼil la jnoptikix ta lección 48, «te machʼa ya sjoquin te machʼatic pʼij yoʼtanic, ha nix hich pʼij ya xcʼoht». Pero te machʼa ya sjokin te machʼa ma xchʼuun te mantaliletik yuʼun Jehová, «ya me sta swocol» (Proverbios 13:20).
2. ¿Bin yuʼun ya skʼan te pʼisbiluk te tiempo ya kakʼbeytik te bin ya jkʼasestik kʼajkʼal-ae?
Manchukme lek te bin ya jkʼasestik kʼajkʼal-ae, ya skʼan ya jtsajtay jbatik yuʼun ma bayaluk tiempo ya kakʼbeytik. Melel, ya xjuʼ ya spojbotik te tiempo ta spasel te bin mukʼxan skʼoplale. Te Biblia ya yalbotik te akʼa jnaʼtik «stuhunel ta lec te tiempo» (kʼopona Efesios 5:15, 16).
JNOPTIKXAN TA LEK
Kiltik bin ya xjuʼ ya apas swenta ya anaʼ stsael ta lek te bin ya akʼases kʼajkʼal-ae.
3. Mame xa akʼases kʼajkʼal-a te bin ya yutsʼinat
¿Bin yuʼun ya skʼan ya jtsatik ta lek te bin ya jkʼasestik kʼajkʼal-ae? Ilawilik te VIDEO sok albeyaik skʼoplal ini:
-
¿Bin yuʼun te majtamba la spasik ta namey pajal sok te bin ya skʼasesik kʼajkʼal-a ta ora-ini?
-
Jich bitʼil la kiltik ta video, ¿bin kʼot ta yoʼtan te Danny ta swenta te bin ya skʼases kʼajkʼal-ae?
Kʼoponaik Romanos 12:9 sok albeyaik skʼoplal ini:
-
¿Bin-utʼil ya skoltayotik te versículo ini ta stsael te bin ya jkʼasestik kʼajkʼal-ae?
¿Bintik ya yilay te Jehová? Kʼoponaik Proverbios 6:16, 17 sok Gálatas 5:19-21. Te kʼalal la akʼoponikix-a te jujun textoe, albeyaik skʼoplal ini:
-
Ta spisil te bintik ma lek ta pasel ya yalbey skʼoplal te textoe, ¿bintik yichʼoj te bin ya skʼasesik kʼajkʼal-a te ants winiketik ta ora ini?
Tsaa ta lek te bin ya akʼases kʼajkʼal-ae
Jojkʼoybeya aba:
-
¿Bin yichʼoj? ¿Jaʼbal te bintik ya yilay te Jehová?
-
¿Bin-ora ya jpas? ¿Yabal spojbon jtiempo ta spasel te bin mukʼxan skʼoplale?
-
¿Machʼatik sok? ¿Yabal yakʼ jokin jba sok te machʼatik maba kʼux ta yoʼtanik te Jehová?
Jich te bitʼil ma xnoptsajotik bael te banti ya xjuʼ ya jta jwokoltik, jaʼnix jich ma jkʼasestik kʼajkʼal-a te bin ya kiltik te ya xjuʼ ya yutsʼinotike.
4. Tuuntesa ta lek te atiempo
Ilawilik te VIDEO sok albeyaik skʼoplal ini:
-
Te bin yak ta yilel te hermano ta video manix yuʼunuk ma lek-a, pero ¿bin-utʼil yak ta akʼbeyel schʼay te stiempoe?
Kʼoponaik Filipenses 1:10 sok albeyaik skʼoplal ini:
-
¿Bin-utʼil ya xjuʼ ya skoltayotik te versículo ini ta spʼisel te jayeb tiempo ya kakʼbeytik te bin ya jmulantik spasele?
5. Lekuk te bin ya akʼases kʼajkʼal-ae
Melelnix-a te ay bintik ma smulan te Jehová te ya jkʼasestik kʼajkʼal-ae, pero ay yantikxan te bintik ya xjuʼ ya jmulantik spasele. Kʼoponaik Eclesiastés 8:15 sok Filipenses 4:8, sok albeyaik skʼoplal ini:
-
¿Bintik-a te ya amulan skʼasesel kʼajkʼal-a te jaʼate?
Ya xjuʼ ya jmulantik skʼasesel kʼajkʼal-a te bin leke.
AY MACHʼATIK JICH YA YALIK: «Maʼyuk bin spas teme jaʼ ya jkʼasestik kʼajkʼal-a te bin yichʼoj espiritismo, majtamba o mulwej, melel ma yak jpasbeltik te joʼotike».
-
¿Bin ya awal te jaʼate?
¿BINTIK LA JNOPTIK?
Te Jehová ya skʼan te yakuk jmulantik sok lekuk te bin ya jkʼasestik kʼajkʼal-ae.
¿Jilbal ta awoʼtan into?
-
¿Bintik-a te ma jkʼasestik kʼajkʼal-a te j-abatotik yuʼun te Diose?
-
¿Bin yuʼun ya skʼan te pʼisbiluknax te jayeb tiempo ya kakʼbeytik te bin ya jkʼasestik kʼajkʼal-ae?
-
¿Jaʼbal ya akʼan ya akʼases kʼajkʼal-a te bin lek ya yil te Jehová? ¿Bin yuʼun?
YA XJUʼ YA ANOPXAN INI
Ilawil machʼa ay ta swenta stsael te bin ya jkʼasestik kʼajkʼal-ae.
Ilawil bin-utʼil ya xjuʼ ya atsa ta lek te bin ya akʼases kʼajkʼal-ae.
«¿Lekbal te bin ya jkʼasestik kʼajkʼal-ae?» (Te J-ilkʼinal ta toyol, 15 yuʼun octubre 2011)
Ilawil bin yuʼun jtul winik la yijkitay te bin ya skʼases kʼajkʼal-ae, kʼopona te bin kʼax ta skuxlejal: «Maba pʼajawanonix».
«Jelontesbot skuxlejalik yuʼun te Biblia» (Te J-ilkʼinal ta toyol, 1 yuʼun febrero 2010)
Ilawil bin la spas jtul ants te kʼalal jaʼ kʼan skʼases kʼajkʼal-a te bin yichʼoj espiritismo.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
