Te kʼalal ya jtsob jbatik sok te kermanotaktik, jich ya kaʼiy jbatik bitʼil te ajwalil David te la yal: «Buen lec soc bayel yutsil te jun yoʼtan sbahic te machʼatic yermano sbahique» (Salmo 133:1). Swenta jun ayotik ta spisil-ora; ya skʼan ay bin ya jpastik ta jujuntul.

1. ¿Bin-a te tʼujbilnax ta ilel ta lum yuʼun te Diose?

Teme ya xbaat ta jun tsoblej ta yan nación, maniwan ya awaʼiybey te skʼopike; pero jichniwan ya awaʼiy te ayat ta alumale. Melel chikan banti ya xbaat, te testigootik yuʼun Jehová pajal te junetik ya jtuuntestik te lokʼemik ta Biblia. Sok ya jpastik tulan ta yakʼel ta ilel skʼuxul koʼtantik. Chikan banti nainemotik, ya jkʼan ya kalbeytik sbiil te Jehová sok te jun-nax ya kichʼtik ta mukʼ (Sofonías 3:9).

2. ¿Bin ya xjuʼ ya apas yuʼun lek ya awil aba sok te hermanoetike?

«Talel cʼaxel cʼux me xawaʼiy abahic ta spisil awoʼtanic» (1 Pedro 1:22). Ya awakʼ ta ilel te kʼalal ma jaʼuk ya xbajt ta awoʼtan yilel te banti ya xchʼayike, jaʼuk xa awil te lekil talelil yuʼunike. Mame jaʼuknax xa ajokin te machʼatik pajal bin ya amulan soke; pasa tulan ta snaʼbeyel sba-euk te machʼatik yan stsʼumbalik. Teme ay ya xpʼajawanat ya awaʼiye lokʼesa ta jkʼaxel ta awoʼtan (kʼopona 1 Pedro 2:17). a

3. ¿Bin ya apas teme ay jajch kʼop awuʼun sok jtul hermano?

Melelnix-a te jun-nax ayotike; pero ta skaj te jmulawilotik, ayniwan bin ya xjuʼ ya jpastik o ya kichʼtik pasbeyel te ya jmel koʼtantik yuʼun o te kʼux ya kaʼiytike. Jaʼ yuʼun jich ya yalbotik te sKʼop Diose: «Pasbeya abaik perdón». Ya yalxan: «Sok yutsil yoʼtan la spasbeyex perdón te Jehová, jaʼnixme jich xa apasbey abaik perdón» (kʼopona Colosenses 3:13, TNM). Bayal buelta ya xjelawotik ta stojol te Jehová, pero ya spasbotik perdón. Jaʼ yuʼun ya yalbotik te yakuk jpasbeytik perdón-euk te kermanotaktike. Teme ay bin ma lek la apasbey jtul hermano, baan, chajpana te kʼope (kʼopona Mateo 5:23, 24). b

 JNOPTIKXAN TA LEK

4. Mame xpʼajawanat

Ya jkʼan ya kakʼbeytik yil skʼuxul koʼtantik spisil te kermanotaktike. Pero ayniwan wokol ya kaʼiytik te lek ya kiltik te machʼatik ya jkuytik te ma pajalotik soke. ¿Bin ya xjuʼ ya skoltayotik? Kʼoponaik Hechos 10:34, 35 sok albeyaik skʼoplal ini:

• Te Jehová ya yikʼ tal ta stojol spisil te ants winiketik te yanyantik stsʼumbalik swenta ya x-ochik ta Testigo yuʼun. Te bitʼil jich ya spas te Jehovae, ¿bin-utʼil ya skʼan ya awil te ants winiketik te ma pajalik sok te jaʼate?

• ¿Machʼatik ya spʼajik tey ta alumale? ¿Bin yuʼun te ma skʼan ya xpʼajawanat te jaʼate?

Kʼoponaik 2 Corintios 6:11-13 sok albeyaik skʼoplal ini:

• ¿Bin ya xjuʼ ya apas yuʼun ayxan skʼuxul awoʼtan ta stojol te hermanoetike?

5. Pasa perdón sok chajpana te kʼope

Te Jehová maʼyuk bin-ora ya sta smul ta jtojoltik te ya skʼan ya jpasbeytik perdón yuʼune, manchukme jich-abi ya spasbotik perdón te joʼotike. Kʼoponaik Salmo 86:5 sok albeyaik skʼoplal ini:

• ¿Bin ya yakʼ jnoptik te texto ini ta swenta te bitʼil ya spas perdón te Jehovae?

• ¿Yabal awal wokol yuʼun te ya spas perdón te Jehovae? ¿Bin yuʼun?

• ¿Binwan-ora te ay wokol ya kaʼiytik te lek ya kil jbatik sok te yantike?

¿Bin talelil ya skʼan ya jtʼunbeytik te Jehová teme ya jkʼantik te jun ayotik sok te kermanotaktike? Kʼoponaik Proverbios 19:11 sok albeyaik skʼoplal ini:

• Kʼalal ay machʼa ay bin ya spas te maba ya amulane, ¿bin ya xjuʼ ya apas yuʼun ay lamalkʼinal?

 Ayniwan joʼotik te ay bin ya jpastik te ma smulan te yantike. Teme jiche, ¿bin ya xjuʼ ya jpastik? Ilawilik te VIDEO sok albeyaik skʼoplal ini:

• ¿Bin-utʼil la schajpan te kʼop te hermana te la kiltik ta video?

 ¿BINTIK LA JNOPTIK?

Teme ya apasbey perdón te awermanotak sok ya awakʼ ta ilel te kʼux ta awoʼtan ta spisilik, jun-naxme ya x-ayin te congregación.

¿Jilbal ta awoʼtan into?

• ¿Bin ya xjuʼ ya apas yuʼun ma xpʼajawanat?

• ¿Bin ya apas teme ay jajch kʼop awuʼun sok jtul hermano?

• ¿Yabal akʼan te jich ya apas perdón bitʼil ya spas te Jehová? ¿Bin yuʼun?