LECCIÓN 57
¿Bin ya skʼan ya apas teme ay la apas tulan mulile?
Manchukme kʼux ta awoʼtan te Jehová sok ya apas tulan yuʼun maba ya awakʼbey smel yoʼtan, ya sta yorail te ay ya xchʼayate. Pero naʼame te ay tulan muliletike (1 Corintios 6:9, 10). Teme ay la apas jun tulan mulile, maba ya yijkitayat te Jehová, yoʼtan ya spasbat perdón sok ya skoltayat.
1. ¿Bin ya skʼan ya jpastik yuʼun ya spasbotik perdón te Jehovae?
Te kʼalal ya spas tulan mulil te machʼa kʼux ta yoʼtan te Jehovae, kʼax ma lek ya yaʼiy sba. Pero te Jehová ya yakʼbey smukʼul yoʼtan ta swenta te bin la yalbey te lum yuʼune: «Aunque hich amulic te bin utʼil buen tsaj, buen sac ya xhilic hich te bin utʼil meʼsic» (Isaías 1:18). Teme ya jsujtes koʼtantik ta smelelil, yame spasbotik perdón sok spisil yoʼtan te Jehová. ¿Bin smakbeyoj skʼoplal te ya jsujtes koʼtantike? Jaʼ te ma lek ya kaʼiy jbatik yuʼun te bin la jpastike, te ma jchaʼpastikix sok te ya jkʼanbeytik perdón te Jehová. Ya jpastik tulan ta sjeltayel te jpensartik sok ya kijkitaytik spasel te bin la yakʼotik ta chʼayel, sok ya jpas ta jkuxlejaltik te mantaliletik yuʼun te Jehová (kʼopona Isaías 55:6, 7).
2. ¿Bin koltayel ya yakʼbotik te Jehová ta swenta te ancianoetike?
Te Jehová ya yalbey te machʼa la spas tulan mulil te «acʼa yicʼ tal te ancianohetic» (kʼopona Santiago 5:14, 15). Te winiketik ini te akʼbil yaʼtelik yuʼun te chʼul espíritu kʼux ta yoʼtanik te Jehová sok te tuminchijetik, sok lek pʼijubtesbilik yuʼun ya skoltayotik swenta lek ya jchaʼkil jbatik sok te Jehová (Gálatas 6:1).
¿Bin-utʼil ya skoltayotik te ancianoetik teme la jpastik tulan mulile? Chaʼtul o oxtul ancianoetik ya yakʼ kiltik ta Biblia te ma lek te bin la jpastike. Ya yakʼbotik lekil tsitsel sok smukʼul koʼtantik yuʼun maba ya jpastikix yan buelta-a. Yaniwan yalbotik te ancianoetik te ay bintik ma xjuʼ ya jpastikix ta congregación jaʼto te kʼalal ya xlekub te schʼuunel koʼtantike. Pero teme ay machʼa la spas jun tulan mulil te maba la sujtes yoʼtane, te ancianoetik ya slokʼesik ta congregación yuʼun maba ya yutsʼin-a te yantike.
JNOPTIKXAN TA LEK
Kʼotuk ta awoʼtan sok ayuk skʼoplal ta awoʼtan te bin ya spas te Jehová yuʼun ya skoltayotik teme ay ya jpastik tulan mulile.
3. Teme ya kaltik te jmultike lek ya yilotik yan buelta te Jehová
Biluk mulil te ya jpastike ya yutsʼinbey skʼoplal te Jehová, jaʼ yuʼun ya skʼan ya kalbeytik. Kʼoponaik Salmo 32:1-5 sok albeyaik skʼoplal ini:
-
¿Bin yuʼun te jaʼ lek te ya kalbeytik te jmultik te Jehová sok te ma jmuktike?
Ma jaʼuknax ya skʼan ya kalbeytik jmultik te Jehová, jaʼnix jich ya kalbeytik-euk te ancianoetik yuʼun jich ya jtatik slamalil kʼinal kaʼiytik-a. Ilawilik te VIDEO sok albeyaik skʼoplal ini:
-
¿Bin-utʼil koltayot yuʼun te ancianoetik te Canon yuʼun ya sujt tal ta stojol te Jehovae?
Kʼax mukʼ skʼoplal te ya kalbeytik ta jamal te ancianoetik te bin kʼot ta pasele, melel jaʼ ay ta swentaik te ya skoltayotike. Kʼoponaik Santiago 5:16 sok albeyaik skʼoplal ini:
-
Teme ya kalbeytik ta jamal te jmultik te ancianoetike, ¿jaʼbal jich ma wokol ya yaʼiyik te ya skoltayotike? ¿Bin yuʼun?
Albeya Jehová te amule, albeya ta jamal te ancianoetik sok chʼuuna te koltayel ya yakʼbat te Jehovae.
4. Te machʼa ya yichʼ lokʼesel ta congregación ya sta slekilal soknix te yantike
Teme ma skʼan ya schʼuunbey smantal te Jehová te machʼa la spas jun tulan mulil, ya yichʼ lokʼesel ta congregación. Jaʼ yuʼun maba ya jokintikix sok maba ya jkʼopontikix. Kʼoponaik 1 Corintios 5:6, 11 sok 2 Juan 9-11, sok albeyaik skʼoplal ini:
-
Jich bitʼil te levadura te ya spajubtes spisil te smatsʼul te pane, ¿yabal yutsʼin te congregación teme ya jokintik te machʼa maba ya sujtes yoʼtan yuʼun te smule? ¿Bin yuʼun?
Bayal te machʼatik yichʼojik lokʼesel ta congregación chaʼsujtikix tal, melel, manchukme kʼux la yaʼiyik te tojobtesele, jaʼ koltayotik yuʼun ya sujtik tal (Salmo 141:5). Ilawilik te VIDEO sok albeyaik skʼoplal ini:
-
¿Bin-utʼil koltayot te Sonia te la yichʼ lokʼesel ta congregacione?
Kʼalal ay machʼa ya yichʼ lokʼesel ta congregación...
-
... ¿bin-utʼil ya yichʼ ichʼel ta mukʼ te sbiil te Jehová?
-
... ¿bin-utʼil ya yakʼ ta ilel te toj yoʼtan te Jehová sok te kʼuxotik ta yoʼtane?
5. Te Jehová ya spasbotik perdón teme ya jsujtes koʼtantike
Te Jesús la yalbey skʼoplal jun lokʼombakʼop te ya skoltayotik ta snaʼel bin yaʼiyel ya yaʼiy sba te Jehová kʼalal ay machʼa ya sujtes yoʼtane. Kʼoponaik Lucas 15:1-7 sok albeyaik skʼoplal ini:
-
¿Bin ya yakʼ jnoptik ta swenta Jehová te lokʼombakʼop ini?
Kʼoponaik Ezequiel 33:11 sok albeyaik skʼoplal ini:
-
¿Bin ya skʼan ya jpastik yuʼun ya kakʼtik ta ilel te jsujtesojix koʼtantik ta smelelil?
Te Jehová jich kʼoem bin-utʼil jkanantuminchij: ya skanantay te tuminchijetik yuʼune.
AY MACHʼATIK JICH YA YALIK: «Ya xiwon ta yalbeyel te ancianoetik te bin la jpase, melel ya slokʼesonik ta congregación».
-
¿Binwan ya awalbey te machʼa jich ya yale?
¿BINTIK LA JNOPTIK?
Teme ay ya jpastik jun tulan mulil, pero ya jsujtes koʼtantik ta smelelil sok maba ya jpastikix yan buelta, yame spasbotik perdón te Jehová.
¿Jilbal ta awoʼtan into?
-
¿Bin yuʼun jaʼ lek te ya kalbeytik te jmultik te Jehová?
-
¿Bin ya skʼan ya jpastik yuʼun ya spasbotik perdón te Jehovae?
-
Teme ay la jpastik jun tulan mulile, ¿bin yuʼun ya skʼan ya jkʼanbeytik koltayel te ancianoetike?
YA XJUʼ YA ANOPXAN INI
Kiltik bin-utʼil jtul winik la yilbey te skʼuxul yoʼtan te Jehová te ya yalbey skʼoplal te Isaías 1:18.
¿Bintik lekilal ya yichʼ tael te kʼalal ay machʼa ya yichʼ lokʼesel ta congregación?
Ilawil bin-utʼil ya xjuʼ ya acholbey yaʼiy te machʼa maba Testigo te kʼalal ay machʼa ya yichʼ lokʼesel ta congregación.
Nopbeya skʼoplal bin-utʼil jtul winik jich la yaʼiy te yak ta ikʼel tal yuʼun Jehová, kʼopona te bin kʼax ta skuxlejal: «Ya jkʼan ya sujton ta stojol-a te Jehová».
«Jelontesbot skuxlejalik yuʼun te Biblia» (Te J-ilkʼinal ta toyol, 1 yuʼun abril 2012)
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
