¿Yabal anaʼ machʼa-a te tut achʼix te ay ta lokʼombae?... Te Biblia ma xyalbey te sbiile, jaʼukmeto ya yalbey skʼoplal stukel te sbiil te state, jaʼ Jefté. Te Jehová sok te Jefté akʼbotik bayal stseʼelil yoʼtanik yuʼun te bin la spas te achʼixe. ¿Yabal akʼan ya anaʼbeyxan skʼoplal ta swenta te Jefté sok te yantsil nichʼane?

Te Jefté jaʼ jtul lekil winik stukel. Jaʼnix jich la slokʼes bayal stiempo ta snojptesel te yantsil nichʼan ta swenta te Jehovae. Soknix jaʼ tulan winik te la snaʼ bin utʼil la swentain te lume. Jaʼ yuʼun jich albotik yuʼun te israeletike: «¿Yabal akʼan ya x-ochat ta jwolwanej kuʼunkotik ta guerra?».

Te Jefté la skʼopon te Jehová yuʼun yakuk xkoltayot ta tsalaw ta guerra. La yalbey ta jamal teme ya xkoltayot ta tsalawe, ya yakʼbey te machʼa nail ya xlokʼ tal ta tael yuʼun te kʼalal ya sujt tal ta snae. ¿Bin ya skʼan ya yal-abi? Jaʼ te ya xkuxin sok ya x-aʼtej ta Nailpakʼ templo yuʼun Dios ta spisil ora te machʼa  ya xlokʼ ta tael yuʼune. Te Nailpakʼ temploe jaʼme te banti te ya xbajtʼ te ants winiketik ta yichʼel ta mukʼ te Jehovae. ¿Juʼbal yuʼun tsalaw ta guerra te Jefté? Juʼ yuʼun. Te kʼalal sujt tal ta snae, ¿yabal anaʼ machʼa-a te nail lokʼ tal ta tael yuʼune?...

¡Jaʼ te yantsil nichʼane! Te jip jtul-ae, jich yuʼun yananixme stikun bael ta kuxinel ta Nailpakʼ templo-a. Ta swenta-abi bayal la smel yoʼtan yuʼun, jaʼukmeto ay bin yalojbeyix ta jamal-a te Jehovae, ¿yatobal xjul ta awoʼtan te bin-ae? Jaʼ yuʼun jich albot yuʼun te yantsil nichʼane: «Jtat, te bin la awalbey ta jamal te Jehovae, yame skʼan ya akʼotes ta pasel».

Jaʼnix jich la smel yoʼtan ta sjajchibal euk te achʼixe. ¿Bin yuʼun? Melel te bin ora ya xbajtʼ ta kuxinel ta Nailpakʼ temploe, ma xjuʼ ya xnujpun sok te ya sta yalatake. Jaʼukmeto la yal te ya skʼan skʼotes ta pasel te bin jamal la yal te stat ta stojol te Jehovae. Jaʼnix jich la skʼan te ya yakʼbey stseʼelil yoʼtan te Jehovae. Jaʼ kʼax bayal skʼoplal ayin ta yoʼtan-abi, ma jaʼuk te ya xnujpune sok te ya sta yalatake. Jaʼ yuʼun la schʼuun te bajtʼ ta Nailpakʼ templo sok te ya xkuxin tey-a te jayeb kʼajkʼal kuxule.

Ta swenta te bin la spas te achʼixe, ¿akʼbotbal stseʼelil yoʼtan ya akuy te Jehová sok te Jefté?... ¡Akʼbotik stseʼelil yoʼtan! Yame xjuʼ jich ya apas euk te bitʼil te yantsil nichʼan te Jefté. Teme ya achʼuun mantale sok teme kʼux ta awoʼtan te Jehová, yame awakʼbey bayal stseʼelil yoʼtan. Jaʼnixme jich ya awakʼbey stseʼelil yoʼtan te ameʼ atate.