¿Tulanbal ta pasel te bin ya skʼambotik te Jehovae?... Jteb ma spisiluk te ants winiketik ya skuyik te kʼax tulan ta pasele. Jaʼukmeto ma jichuk ya yakʼ ta nopel te Bibliae, melel jich ya yakʼ ta ilel ta swenta te Josías te jaʼ jtul kerem te la spas tulan yuʼun la yakʼ sba ta abatinel ta stojol te Jehovae, te bin koltayot yuʼun-abi, jaʼ te la snaʼ stsael te machʼatik la sjokin sba soke. Akʼa jnopbeytikxan skʼoplal te Josías sok te lekil amigoetik yuʼune.

Te sbiil te stat te Josiase, jaʼ Amón sok jaʼ ajwalil ta lum yuʼun Judá-a. Te Amón kʼax chopol sok la yichʼ ta mukʼ lokʼombaetik. Te kʼalal laj te Amón jaʼ och jilel ta ajwalil te Josías ta lum Judá. ¿Yabal anaʼ jayeb yaʼbilal-a te Josías te kʼalal la yotsesik ta ajwalil? ¡Waxakebtonax yaʼbilal-a! ¿Labal spas euk te bintik chopol jich bitʼil te state?... Maʼuk, ma jichuk la spas.

Ta yalalilto te Josiase la skʼan la yakʼ sba ta abatinel ta stojol te Jehovae. Jaʼ yuʼun jaʼ la sjokin sba sok te machʼatik kʼux ta yoʼtanik te Diose. Sok jaʼ koltayotik yuʼun ta schʼuumbeyel smantal te Jehovae. ¿Machʼatik-a te la sjokin sba sok te Josiase?

Te jtule jaʼ te j-alwanej Sofonías. Te Sofonías jich la yalbey te ants winiketik yuʼun  Judá: «Teme maba ya awijkʼitayik ta yichʼel ta mukʼ te lotil diosetike, yame ata awokolik yuʼun». ¿Bin la spas te Josiase? ¿Labal yichʼ ta wenta te bin la yal te j-alwaneje? Laj, la yichʼ ta wenta, melel spisil ora jaʼ la yichʼ ta mukʼ te Jehovae, ma jaʼuk te lokʼombaetike.

Te machʼa yan la sjokin sba sok te Josiase, jaʼ te Jeremiase. Jteb ma pajaluk te yaʼbilalike sok nopol ayik ta nainel-a te kʼalal jchʼieletikto-ae. Te Jeremías sok te Josías pajal la skoltay sbaik yuʼun jich la yakʼ sbaik ta abatinel ta stojol te Jehovae. Kʼax lek la yil sbaik, jich yuʼun te kʼalal laj te Josiase, te Jeremías la schajpan jun kʼayojil te banti la yakʼ ta naʼel te kʼaxto ay ta mel oʼtan-ae.

¿Mabal jichuk te bayal bintik ya xjuʼ ya jnoptik ta swenta te stalel te Josiase?... Ta yalalilto la skʼan la schʼuumbey smantal te Diose. Swenta juʼ yuʼun spasel-abi, jaʼ la sjokin sba sok te machʼatik kʼux ta yoʼtanik euk te Jehovae. ¿Mabal jichuk te ya akʼan ya awakʼ aba ta abatinel ta stojol euk te Jehovae? Jaʼ yuʼun bayalme skʼoplal te jaʼ ya skʼan ya ajokin aba sok te machʼatik kʼux ta yoʼtanik te Jehovae.