Ilawil te winiketik te ayik ta lokʼombae. Jaʼ Mateo, Marcos, Lucas, Juan, Pedro, Santiago, Judas sok te Pabloe. Ta spisilik ini, kuxinik ta skʼajkʼalel te Jesuse sok jaʼiknix te machʼatik la stsʼibaybeyik skʼoplal te Jesuse. Spisil te bintik la stsʼibayike soknix te cartaetike ay ta Biblia. ¿Yabal akʼan ya anaʼtiklambey sba te winiketik ini?...

Ay oxtul te la sjokinik ta scholel skʼop Dios te Jesuse, jaʼ te Mateo, Juan sok te Pedro, jaʼik te jpuk kʼopetike. ¿Yabal xjuʼ ya awakʼ ta ilel ta banti te lokʼombae?... Te Mateo sok te Juan la  stsʼibayik jujun libro ta swenta te skuxlejal te Jesuse. Te Juane jaʼnix la stsʼibay te sjun Apocalipsis sok oxeb cartaetik te ya sbiilin, Sbabial sjun Juan, Schebal sjun Juan sok Yoxebal sjun Juan. Te jpuk kʼop Pedro la stsʼibay cheb carta te ya sbiilin Sbabial sjun Pedro sok Schebal sjun Pedro. Ta banti te schebal carta la stsʼibaye, la yalbey skʼoplal te ay bin chajpnax kʼot ta pasele. Jaʼ te kʼalal la yaʼiybey skʼop te Jehová kʼalalto ta chʼulchan, sok te kʼalal jich la yal ta stojol te Jesuse: «Jaʼ jnichʼan ini. Te kʼax kʼux ta koʼtan sok te ya yakʼbon stseʼelil koʼtane».

Te yantik winiketik te ya xchiknaj ta lokʼombae, jaʼnix jich la stsʼibaybeyik skʼoplal ta swenta te Jesuse. Ay jtul te Marcos sbiile. Laniwan yil te bin kʼot ta pasel te kʼalal la yichʼ tsakel bael te Jesuse. Te yane Lucas sbiil. Te yaʼtel-ae jaʼ jpoxtaywanej, jich yaʼiyel te och ta jnopojel te kʼalal lajemix-a te Jesuse.

Jaʼnix jich ay chaʼtul yijtsʼinab te Jesús te la stsʼibaybeyik skʼoplal euk te Jesuse. ¿Yabal anaʼtiklambey te sbiile?... Chikanik ta ilel ta banti te lokʼombae, Santiago te sbiile sok Judas sbiil te yane. Ta sjajchibal maba la schʼuunik te bin la yakʼ ta nopel te Jesuse. ¡La skuyik te yuʼun sojkem jtebuk sjol te Jesuse! Jaʼukmeto patil la yakʼ schʼuunel yoʼtanik ta stojol, jich ochik ta jnopojeletik.

Ta ora ini jaʼme ya kilbeytik skʼoplal ta swenta te Pabloe. ¿Yabal awil ta banti te lokʼombae? Te kʼalal mato ochemuk ta jchʼuunjel yuʼun Cristo-ae, Saulo sbiil-a. Kʼax maba lek yiltiklanoj-a te jchʼuunjeletik yuʼun te Jesuse, jaʼ yuʼun la yutsʼinlan. ¿Yabal akʼan ya anaʼ stojol te bin utʼil och ta jnopojel yuʼun Jesús te Pabloe?... Ta jun buelta te kʼalal yak ta bael ta be-a te Sauloe, oranax la yaʼiy te ay machʼa kʼoponot yuʼun ta chʼulchane. ¿Machʼa-a te kʼoponot yuʼune? ¡Jaʼnix te Jesuse! Jich jojkʼoybot yuʼun: «¿Bin yuʼun te kʼax ma lekuk ya awil te machʼatik ya schʼuunonike?». Te Pablo kʼot ta yoʼtan te ya skʼan ya sjel te stalele, jaʼ yuʼun och ta jchʼuunjel yuʼun Cristo. Ta patil la stsʼibay chanlajuneb libroetik te ay ta Bibliae, te ya jajch ta carta yuʼun Romanos kʼalalto ta carta yuʼun Hebreos.

¿Mabal jichuk te ya jmulantik skʼoponel ta jujun kʼajkʼal te Bibliae?... Te Bibliae bayal bintik ya xjuʼ ya jnoptik ta swenta te Jesuse. ¿Mabal jichuk te ya akʼan ya anopbeyxan skʼoplal te Jesuse?...