LECCIÓN 2
Te Rebeca la yakʼbey stseʼelil yoʼtan te Jehová
Te Rebeca kʼux la yaʼiy ta yoʼtan te Jehová. Te sbiil te smamlale jaʼ Isaac. Jaʼnix jich kʼux la yaʼiy ta yoʼtan euk te Jehovae. Ta aʼyej ini yame kiltik bael ta swenta te Rebeca sok te Isaac te bin utʼil la snaʼbey sbaik ta schebalik sok te bin yuʼun la yakʼbey bayal stseʼelil yoʼtan Jehová te Rebecae.
Te sbiil te smeʼ stat te Isaac jaʼ Abraham sok Sara. Te Abraham jaʼ la skʼan te ya xnujpun te snichʼan sok jtul ants te kʼuxuk ta yoʼtan euk te Jehovae. Jaʼnax yuʼun te yakik ta nainel ta Canaán-a te banti ma xyichʼik ta mukʼ Jehová te ants winiketike. Jich yuʼun te Abraham la stikun bael jtul j-abat yuʼun ta lum Harán, te jaʼniwan te Eliezer. ¿Bin yuʼun te la stikun bael tey-ae? Melel tey yakik ta nainel-a te jayeb machʼatik ay yuʼun te Abrahame, yuʼun jich te Eliezer tey ya slebey tal jtul lekil ants te Isaac yuʼun ya xnujpun sok.
Aʼtej bayal te Rebeca ta yakʼbeyel yuchʼ jaʼ te camelloetike
Jich yuʼun te Eliezer lokʼ bael ta namal beel soknix yantik j-abatetik yuʼun te Abrahame. La yikʼik bael lajuneb ta jkojt camelloetik te skuchojik bael bayal weʼelil sok majtʼaniletik. Jaʼukmeto, ¿bin utʼil ya xjuʼ ya snaʼ te Eliezer te machʼa ya xjuʼ ya yinamin te Isaac? Snaʼoj ta lek-a te Eliezer te ya xlokʼik ta slikel jaʼ ta jun poso te antsetik yuʼun te lume. Jaʼ yuʼun te kʼalal kʼotik ta Harán tey bajtʼik ta banti te posoe. Jich yuʼun te Eliezer la skʼopon te Jehová sok jich la yal: «Te achʼix te ya yakʼbon jaʼ kuchʼ soknix te camelloetik kuʼune, jaʼme te ants te ya atsa yuʼun ya xnujpun sok te Isaac».
Te kʼalal jich yak ta yalel-a te Eliezer, kʼot ta poso te Rebecae. Te Biblia ya yalbey skʼoplal te jaʼ tʼujbil achʼix. Te Eliezer la skʼambey jaʼ yuchʼ, jich la yal te Rebecae: «Yame kakʼbat te jaʼ awuchʼe soknix yame kakʼbey jaʼ yuchʼ euk te camelloetik awuʼune». Jich bitʼil te bayal ya yuchʼ jaʼ te camelloetike, te Rebecae la slokʼes bayal jaʼ ta poso. ¿Mabal jichuk te bayal buelta been ta slikel lokʼel tal te jaʼe? ¿Yabal awil te bin yak ta spasel te Rebeca ta banti te lokʼombae?... Chamnax la yil te Eliezer te kʼalal la yil te aʼtej bayal te Rebecae. Jichme sutbot skʼop yuʼun te Jehovae.
Te Eliezer la yakʼbey tʼujbil majtʼaniletik te Rebecae. Te Eliezer sok te yantik j-abatetike la yichʼik ikʼel bael yuʼun te Rebeca ta banti te sna state. Te Eliezer la scholtiklambey yaʼiy te bin yuʼun la yichʼ tikunel yuʼun Abraham ta banti te Harán soknix la yalbey yaʼiyik te bin utʼil sutbot skʼop yuʼun te Jehovae. Te kʼalal la yaʼiyik stojol-abi te jayeb machʼatik ay yuʼun te Rebecae akʼbotik bayal stseʼelil yoʼtanik yuʼun. Jaʼ yuʼun jich la yalbeyik te Eliezer: «Lek ya kaʼiykotik te ya xnujpun sok te Isaac».
Te Rebeca bajtʼ sok te Eliezer ta Canaán yuʼun ya xnujpun sok te Isaac
¿Labal skʼan akuy te Rebeca te ya xnujpun sok te Isaac?... Te kʼalal la yichʼ jojkʼoybeyel yuʼun te jayeb machʼatik ay yuʼune, la yal te ya skʼane. ¿Bin yuʼun te la skʼane? Melel yuʼun kʼot ta yoʼtan te yuʼunix jaʼ tikumbil yuʼun Jehová-a te Eliezere. Jaʼ yuʼun la schʼuun bael te bajtʼ ta lum Canaán, te kʼalal kʼotik tey-ae jich nujpun sok te Isaac.
Te Rebeca la schʼuumbey smantal te Jehová, jaʼ yuʼun akʼbot bayal utsilal. Ma jaʼuknax-abi jaʼnix jich tey tal stsʼumbal-a te Jesuse. Jaʼnixme jich ya yakʼbat utsilal te Jehová teme ya achʼuumbey te smantal jich bitʼil te Rebecae. Sok yame awakʼbey stseʼelil yoʼtan.
