LECCIÓN 10
Spisil ora la schʼuun mantal te Jesús
¿Aybal tulan ya kaʼiytik schʼuumbeyel smantal te jmeʼ jtatike?... Aynix tulan ya kaʼiytik schʼuunel. Jaʼukmeto, ¿yabal anaʼ te bin ya xjuʼ ya skoltayat yuʼun ya achʼuun te mantale? Jaʼ te ya anop te bintik la spas te Jesuse. ¿Anaʼojbal te spisil ora la schʼuumbey smantal te Jehová soknix te smeʼ state?... Yame jnoptikxan bael ta swenta te Jesuse.
Te kʼalal mato xtal ta Balumilal-a te Jesuse ay ta chʼulchan sok-a te sTate, te jaʼ te Jehovae. Jaʼukmeto te kʼalal kuxin ta Balumilal te Jesuse ay smeʼ stat te chʼitesot yuʼune, te sbiil te state jaʼ José, te sbiil te smeʼ jaʼ María. ¿Yabal akʼan ya anaʼ te bin utʼil ayin ta Balumilal te Jesuse?...
Swenta ayin ta Balumilal te Jesuse, te Jehová la spas jun milagro. La yakʼbey ta schʼujtʼ María te skuxlejal te sNichʼan te kʼalal ayto ta chʼulchan-ae. Baluneb u chʼi ta schʼujtʼ smeʼ te Jesuse, patil ayin, jichnix bitʼil te ya x-ayin te alaletike. Jichme la sta jtul yal te Mariae. Te María sok te José, jaʼ la schʼitesik te Jesuse.
Te kʼalal aytonax lajchayeb yaʼbilal-a te Jesuse ay bin la spas te jich la yakʼ ta ilel te kʼax bayal kʼux ta yoʼtan te sTat te ay ta chʼulchan, te jaʼ te Jehovae. Te bin la spase jaʼ te kʼalal bajtʼ te Jesús sok te jayeb machʼatik ay yuʼun ta namal beel ta Jerusalén. Tey bajtʼik ta yichʼel ta mukʼ-a te Jehovae. Te kʼalal yakikix ta sujtel tal ta snaik-ae, te José sok te Mariae la snaʼik stojol te maba jokimbilik tal yuʼun te Jesuse. ¡Ma la staik ta leel tey-a! ¿Yabal anaʼ te bin la spas te José sok te Mariae?...
¿Bin yuʼun te ay ta templo te Jesuse?
Oranax sujtik bael ta Jerusalén ta sleel te Jesuse. Oxeb kʼajkʼal la sleik ta bayuk. ¡Bayal ayik ta mel oʼtan-a! Ta patil la staik ta leel. ¿Yabal anaʼ te banti la staik te Jesuse?... Ay ta templo-a. ¿Bin yuʼun te tey ay-ae? Melel jaʼ te banti bayal bintik ya xjuʼ ya snop ta swenta te Jehovae. Te Jesuse kʼax bayal kʼux ta yoʼtan te sTate, jich yuʼun jaʼ la spas te bintik ya xjuʼ ya yakʼbey stseʼelil yoʼtane. Te kʼalal winikix-a te Jesuse, mananix la yijkʼitay ta schʼuumbeyel smantal-a te Jehovae. Spisilnanix ora la schʼuun mantal-a, manchukme ay tulan la yaʼiy ta spasel ta swenta te bitʼil ay ants winiketik te akʼbot swokol yuʼune. ¿Labal schʼuumbey smantal euk te José sok te Mariae?... Laj, la schʼuumbey te smantale, melel jich ya yal te Bibliae.
¿Labal awil te spisil ora la schʼuun mantal te Jesuse?... Jaʼ ini ay bin tulan skʼoplal ya yakʼ jnoptik: jaʼ te spisil ora ya jchʼuumbeytik smantal te jmeʼ jtatike, manchukme ay tulan ya kaʼiytik spasel. ¿Jichbal ya xbajtʼ apas euk te bitʼil te Jesuse?...
