Te religión te banti ayonkotike maʼyuk sacerdoteetik tey-a te ya yichʼik tojele. Melel ya yichʼ tsael winiketik te yichʼojik pʼijubtesel ta lek yuʼun ya skanantayik te tuminchijetik yuʼun te Diose, jich bitʼil la spasik te sbabial jchʼuunjeletike (Hechos 20:28). Te ancianoetik ini tulan schʼuunel yoʼtanik ta stojol te Diose, melel jaʼ ya xwolwanik sok ya skanantayik te congregacione, maba ta swenta sujel, jaʼ ta swenta skʼanojel yoʼtanik, ma jaʼuk ta swenta stael takʼin te ma stojiluke, ya spasik sok spisil yoʼtanik (1 Pedro 5:1-3). ¿Bin ya spasik ta jwentatik?

Ya yilotik sok ya skanantayotik. Te ancianoetike ya yakʼbeyik tojobtesel sok ya skanantaybeyik te schʼuunel yoʼtan te swinkilel te congregacione. Jich bitʼil te snaʼojik te jaʼ akʼbilik yaʼtel yuʼun te Diose, maba ya spasotik ta mantal, jaʼ ya skoltayotik swenta yuʼun lek ayotik sok te ayuk stseʼelil koʼtantike (2 Corintios 1:24). Jich bitʼil ya spas jtul jkanan tuminchij te ya spas tulan ta yilel ta jujunkojt te tuminchijetik yuʼune, te ancianoetike ya spasik tulan ta snaʼbeyel sba ta jujuntul te jayeb machʼatik tuminchijetik yuʼun te Diose (Proverbios 27:23).

Ya spʼijubtesotik ta spasbeyel skʼanojel yoʼtan te Diose. Ta jujun semana, te ancianoetik jaʼ ya xwolwanik ta spasel te tsoblejetik te ya yichʼ pasel ta congregacione, swenta jich ya xmukʼubxan te schʼuunel koʼtantike (Hechos 15:32). Te ancianoetik te slokʼesoj sba ta yoʼtanike, jaʼnix jich ya yilik te aʼtelil yuʼun te scholel skʼop Diose, ya sjokinonkotik ta scholel skʼop Dios, jaʼnix jich ya yakʼik chaʼoxchajp pʼijubtesel ta swenta te aʼtelil-abi.

Ya smukʼubtes koʼtantik ta jujuntul. Swenta jich lek ayotik ta stojol te Dios ta jujuntul, te ancianoetike ya yulaʼtayotik ta jujun jnatik jaʼnix jich ya skʼoponotik ta sNail Tsoblej. Ya yakʼbotik koltayel sok ya smukʼubtes kʼinal kaʼiytik te kʼalal ya yakʼbotik kiltik te bin ya yal te sJun Diose (Santiago 5:14, 15).

Te ancianoetike, ma jaʼuknax ay yaʼtelik ta congregación, jteb ma spisilukik ay yaʼtelik sok ay yinamik, yal snichʼnabik te ya skʼan ya yilik euke. Te hermanoetik ini tulan ya x-aʼtejik, jaʼ yuʼun ya skʼan ya kichʼtik ta mukʼ (1 Tesalonicenses 5:12, 13).

• ¿Bintik koltayel ya yakʼik te ancianoetik ta congregacione?

• ¿Bin utʼil ya yakʼik ta ilel te ay skʼoplal ta yoʼtanik ta jujuntul te swinkilel te congregacione?