Swenta ya yichʼ pukel te «lec yachʼil cʼop [...] [ta] spisil nacionetic, tsʼumbaliletic, cʼopiletic soc pueblohetic» ya jlokʼeskotik junetik lokʼem ta Biblia kʼaxem ta setecientos cincuenta ta chajp kʼopiletik (Apocalipsis 14:6). ¿Bin utʼil ya jpaskotik te mukʼul aʼtelil ini? Jaʼ ta swenta te koltayel ya yakʼik te jtsojb hermanoetik ta yanyantik nación te ya stsʼibajike sok ay machʼatik ya skʼasesik ta yan kʼopil te junetike, spisilik jaʼik testigoetik yuʼun Jehová.

Nail ya yichʼ tsʼibayel ta inglés te bintik ya xlokʼe. Te Jtsojb Jwolwanejetike jaʼ ya yilik te aʼteliletik te ya yichʼ pasel ta Departamento yuʼun Tsʼibajel. Te departamento-abi jaʼ ya yil te jayeb ta chajp aʼtelil yuʼun te machʼatik ya stsʼibajik ta Estados Unidos sok ta yantikxan Betel. Ta swenta te jtsojb hermanoetik ini jich ya xjuʼ ya yalbeyik skʼoplal temaetik ta swenta yanyantik tsʼumbalil, jich yuʼun te bintik ya yichʼ tsʼibayel ta junetik te ya jlokʼeskotike ya smulanik te ants winiketik ta yanyantik nacionetike.

Te bin la yichʼix tsʼibayele ya yichʼ tikumbeyel te machʼatik ya skʼasesik ta yan kʼopile. Te kʼalal juʼemix ta pasel-a te bin la yichʼ tsʼibayel sok te kʼalal la yichʼix alel-a te ya xjuʼix ta tuuntesele, ya yichʼ tikunel bael ta computadoraetik te banti ayik te jujun tsojb te machʼatik ya skʼasesik ta yan kʼopil te ayik ta swolol Balumilale, jaʼ ya skʼasesik ta skʼopik, ya yilik ta lek sok ya slekubtesik te bin la skʼasesik ta skʼopike. Te machʼatik ya skʼasesik ta yan kʼopile ya spasik tulan ta sleel kʼopetik te snujpʼ ya xkʼot swenta ya skʼasesik ta lek te binix utʼil ya yal ta inglés-ae (Eclesiastés 12:10).

Te computadoraetik jaʼ ya yakʼ xbeen ta ora te aʼtelile. Te jun computadorae ma xjuʼ ya spas te aʼtelil yuʼun te machʼa ya stsʼibaj o te machʼa ya skʼases ta yan kʼopil te junetike. Jaʼukmeto, ya xjuʼ ta paselxan ta ora te aʼtelil te kʼalal ya yichʼ tuuntesel diccionarioetik, sok te bintik ya xjuʼ ya skoltayotik te ayik ta computadorae. Te stestigotak te Jehová spasojik te Sistema Electrónico de Edición Plurilingüe (MEPS, te siglas ay ta inglés). Ta swenta ini jich ya xjuʼ ya stsʼibayik te junetik ta bayal ta chajp kʼopiletik sok ya xjuʼ ya yakʼik tey-a te bin la yichʼix tsʼibayele soknix te lokʼombaetik yichʼoje, jichme chapal ya xjil yuʼun ya yichʼ lokʼesel ta máquina te junetike.

¿Bin yuʼun te ya jpaskotik tulan ta spasel te aʼtelil manchukme ay chaʼoxmilnax ta jtul te ants winiketik te yan kʼopil ya xkʼopojike? Jaʼ yuʼun te jich skʼanojel yoʼtan te Jehová te «yoʼtanuc ya xcol spisil ants-winiquetic soc te yacuc xcʼoht ta yoʼtanic te smelelil-cʼope» (1 Timoteo 2:3, 4).

• ¿Bin aʼtelil smakoj te stsʼibayel te junetik kuʼunkotike?

• ¿Bin yuʼun te bayal ta chajp kʼopiletik ya jkʼaseskotik te junetike?