Te Biblia ya yalbey skʼoplal chaʼtsojb winiketik te jaʼ ay ta swentaik yilel te bintik ya skʼan pasel ta congregacione, te stestigotak te Jehová ya sbiilintesik ancianoetik sok «siervo ministerialetik» (Filipenses 1:1, Traducción del Nuevo Mundo). Te hermanoetik te yichʼojik yaʼtelik jich bitʼil ini ayme bayal ta jujun congregación. ¿Bintik aʼtelil ya spasik te siervo ministerialetik swenta yuʼun jlekilaltik?

Jaʼ ya skoltayik te ancianoetike. Te siervo ministerialetik jaʼ hermanoetik te tulan schʼuunel yoʼtanik ta stojol Dios, te ya xjuʼ smukʼulin koʼtantik sok te lek ya spasik te yaʼtelike, ay machʼatik te jchʼieliktoe sok ay yantik te ayix yaʼbilalike. Manchukme ma swentauk pʼijubtesel sok yulaʼtayel hermanoetik te aʼtelil ya spasike, jaʼukmeto bayal skʼoplal te bintik ya spasik ta congregacione. Jichme jochol ayik te ancianoetik swenta ya xpʼijubteswanik sok ya xbajtʼ yulaʼtayik te hermanoetike.

Ya yakʼik koltayel te bayal skʼoplale. Ay chaʼoxtul siervo ministerialetik te jaʼ ya sleik te naktijibaletik sok te jaʼ ya yikʼik ochel te machʼatik ya xkʼotik ta tsoblejetik. Ay yantik te jaʼ ay ta swentaik te aʼtejibaletik yuʼun te sonidoe, ya spukik te junetik sok te yantikxan bintik lokʼem ta Bibliae, ay ta swentaik yajtayel te takʼine, soknix jaʼ ya yalbeyik te hermanoetik te banti ya skʼan ya yichʼ cholel te skʼop Diose. Jaʼnix jich ya spasik aʼtelil ta swenta slekubteselxan te sNail Tsobleje sok ya skoltayik te hermanoetik te meʼel mamalikixe jich bitʼil te ya x-albotik yuʼun te ancianoetike. Manchukme biluk aʼtelil ya spasik te siervo ministerialetik, ya yichʼik ichʼel ta mukʼ ta swenta te bitʼil jun yoʼtan ya yakʼ sbaik ta abatinele (1 Timoteo 3:13).

Ya yakʼik ta ilel te lek stalelik ta stojol Dios. Te siervo ministerialetik ya yichʼik tsael ta skaj te kʼax lek ya yakʼik ta ilel te stalelik ta stojol te Diose. Te bintik ya xkʼax yalik ta plataformae ya yakʼbotikxan yip te schʼuunel koʼtantike, sok te bitʼil ya scholik skʼop Dios ya stijbotik koʼtantik ta spasel euk, soknix te bitʼil junax yoʼtan ya x-aʼtejike ya yakʼ sbujtsʼ oʼtanil sok ya yakʼ te junax ayotike (Efesios 4:16). Jich ta patil, ya xjuʼ xkʼotik ta ancianoetik euk.

• ¿Bin yilel stalelik te siervo ministerialetike?

• ¿Bin utʼil ya xkoltaywanik te siervo ministerialetik swenta jich lek ay-a te congregacione?