¿Yabal akʼan ya anaʼxan ta lek te bintik ya yal te Bibliae? ¿Yabal akʼan ya anaʼbeyxan lek skʼoplal ta swenta jun versículo, ta swenta jtul ants winik, o ta swenta jun lugar o te bintik kʼot ta pasel te ya yalbey skʼoplal te sJun Diose? ¿Aybal ajojkʼoybeyoj aba teme ya xjuʼ ya skoltayat te bintik ya yal te Biblia ta swenta schajpanel te kʼopetik ataoje? Teme jiche, yame xjuʼ ya atuuntes te libroetik sok yantikxan junetik te ay ta sNail Tsobleje.

Te banti ay te libroetik sok te junetike ayme bintikxan ya xjuʼ ya skoltayat ta sleel te bintik ya akʼane. Maniwan ayuk awuʼun spisil te junetik te lokʼemik ta Biblia te slokʼesoj te stestigotak te Jehová te ay ta akʼope, yan stukel te banti sNail Tsobleje jteb ma spisiluk tey ay-a te libroetik sok yantikxan junetik te lokʼeliktoe. Sok ayniwan yanyantik Bibliaetik tey-a, ay lekil diccionario sok yantikxan junetik te ya skoltayate. Junukme awoʼtan ya atuuntes te libroetik sok te junetik te ay ta sNail Tsoblej te kʼalal mato xjajch-a o te kʼalal lajemix-a te tsobleje. Teme ay jun computadora te banti yichʼojniwan te programa yuʼun Watchtower Library, te tey ay-a te bintik tulan skʼoplal ta swenta junetik kuʼunkotik soknix ma wokoluk ya yakʼ jletik temaetik, kʼopetik sok versiculoetik.

Ya xtuun yuʼunik ta lek te machʼatik ya yichʼik Pʼijubtesel ta tsoblej Jkuxlejaltik sok Kaʼteltik ta swenta Dios. Teme awotsesojix abiil ta Pʼijubtesele, yame xjuʼ ya atuuntes te libroetik sok te junetik ta swenta schajpanel te asignasion awuʼune. Te machʼa ay ta swenta yilel te libroetik-abi, jaʼme te superintendente yuʼun tsoblej Jkuxlejaltik sok Kaʼteltik ta swenta Dios. Jaʼme ya yil teme ay spisil tey-a te junetik te lokʼeliktoe sok te lekuk chajpanbile. Jaʼme ya yakʼbat awil bin utʼil ta leel te bin ya akʼan ya anaʼ o jaʼ ya yakʼbat awil te machʼa yak ta snojptesbelate. Naʼame te ma xjuʼ ta ichʼel bael te libroetik te ay ta sNail Tsobleje, jaʼnix jich ya skʼan kanantayel sok mame xjuʼ ta kitsel.

Te Biblia ya yal teme ya jkʼan ya jnaʼbeytik sba te Diose yame skʼan te chapalukotik ta sleel jich bitʼil nakʼbil kʼulejalil (Proverbios 2:1-5). Te libroetik sok te yantikxan junetik te ay ta sNail Tsobleje jaʼme te banti ya xjuʼ ya jletik ta lek te bin ya jkʼantike.

• ¿Bintikxan ya skoltayat ta sleel te bintik ya akʼan te banti ay te libroetik sok junetik te ay ta sNail Tsobleje?

• ¿Machʼa ya xjuʼ ya skoltayat ta stuuntesel ta lek te libroetik sok te yantikxan junetik te ay sNail Tsobleje?