Te banti ya jtsojb jbakotik ta yichʼel ta mukʼ te Diose, sNail Tsoblej sbiil kuʼunkotik, te banti ya yichʼ albeyel skʼoplal ta swenta te Ajwalinel yuʼun te Dios te ya yal te Bibliae. Te jaʼ bajtʼ yoʼtan ta yalbeyel skʼoplal te Jesús te kʼalal la schol te skʼop Diose (Lucas 8:1).

Naetik te banti ya yichʼ ichʼel ta mukʼ te Dios ta jlumaltik. Teyto ya yichʼ chajpanel-a te aʼtelil yuʼun scholel te lek yachʼil kʼope (Mateo 24:14). Te sNail Tsoblejetik ma pajaluk smukʼulik sok ma pajaluk te bitʼil pasbilike, jaʼukmeto ma chajpuknax te bitʼil pasbilike, ay chaʼoxwol sNail Tsoblej te kʼaxem ta jun congregación ya stsob sbaik tey-a. Mato ayuk bayal jaʼbil te jpasojkotik kʼax bayal ta mil sNail Tsoblejetik ta skaj te yak ta moel yajtalul te congregacionetike, ayniwan joʼwol ya yichʼ pasel ta jujun kʼajkʼal. ¿Bin utʼil juʼem kuʼunkotik ta spasel ini? (Mateo 19:26.)

Ya yichʼ pasel sNail Tsoblejetik sok te takʼin te yichʼoj tsobel yuʼun ta swenta-abi. Ta jujun sNail Tsoblej ay jun caja te banti ya yichʼ otsesel takʼin te sbiilinej Spasel sNail Tsoblejetik ta swolol Balumilal. Te takʼin ya yichʼ tsobele ya yichʼ tikunel bael ta Betel te banti wentaimbilik yuʼune, swenta ya yakʼbey smajan te congregación te ya xtuun yuʼun ta spasel yachʼil sNail Tsoblej o ta slekubteselxan, ta swenta te takʼin ini maba ya yichʼ kʼambeyel sjol.

Ma tojbil te machʼatik ya spasik te sNail Tsoblejetike jaʼik ini yanyantik stsʼumbalik sok stalelik. Bayal ta pam nacionetik ay Grupoetik yuʼun Spasel sNail Tsoblejetik. Te jujun grupo ini soknix te machʼatik jichnax yakʼoj sbaik ta abatinele ya xbeenik ta yanyantik congregación ta bantinix te nación yuʼunike, manchukme kʼax namal te banti ya xbajtʼik ta yilel te aʼtelile sok ta spʼijubtesel te Testigoetik te tey ayik-ae. Ta yantik nacionetik ay yantik comiteetik te yichʼoj yaʼtelik ta yilel te bin utʼil ya yichʼ pasel sok ta slekubteselxan te sNail Tsoblejetik te banti kʼinalil smakojike. Te congregacionetike ya yichʼik koltayel yuʼun te ancianoetik yuʼun comiteetik te pʼijubenik ta lek ta swenta spasel sNail Tsoblejetik sok ya yichʼik koltayel yuʼun ants winiketik te ya snaʼik ta lek ta swenta te aʼtelile, te ma skʼan stojolike. Jaʼukmeto jteb ma spisiluk te machʼatik ya spasik jun sNail Tsobleje jaʼiknix te hermanoetik yuʼun te congregación te ya stuuntes te yachʼil sNail Tsobleje. Juʼem ta pasel spisil ini ta swenta te schʼul espíritu te Jehová sok te bitʼil kʼax yakʼojbey yipal te lum yuʼun ta spasel ini (Salmo 127:1; Colosenses 3:23).

• ¿Bin ya yichʼ albeyel skʼoplal ta sNail Tsoblejetik kuʼunkotik?

• ¿Bin utʼil juʼem kuʼunkotik spasel sNail Tsoblejetik ta swolol Balumilal?