Te kʼalal nopol ya xlajix-a te Jesuse, jich la yal: «Ya me xpuhc ta halel ta swohlol bahlumilal scʼoblal te lec yachʼil cʼop yuʼun te cuentahinel yuʼun Dios, scuenta testigo-cʼop ta stojol spisil nacionetic, ha to me ya xtal a te slajibal cʼahcʼale» (Mateo 24:14). Ta swenta ini, ¿bin utʼil ya xkʼot ta pasel te scholel skʼop Dios ta swolol Balumilale? Jaʼ te kʼalal ya jtʼumbeytik te bin utʼil la yakʼ jilel ta ilel te Jesús te kʼalal xtaluk ta Balumilale (Lucas 8:1).

Ya kulaʼtaykotik te ants winiketik ta snaik. Te Jesús la snojpteslan te jnopojeletik yuʼun ta scholel te skʼop Dios ta nanatik (Mateo 10:11-13; Hechos 5:42; 20:20). Te sbabial jnopojeletik ini la yichʼik albeyel te banti lumetik ya xjuʼ ya scholik te skʼop Diose (Mateo 10:5, 6). Jaʼnix ta ora ini chajpambil ta lek te bin utʼil ya jcholkotik te skʼop Diose, ta jujun congregación akʼbilik te bantinax ya xjuʼ scholik te skʼop Diose. Jichme ya xkʼot ta pasel kuʼunkotik te mantalil la yal jilel te Jesús te ya kalbeykotik yaʼiyik te ants winiketik te skʼop Diose (Hechos 10:42).

Ya jpaskotik tulan ta sleel te ants winiketik te banti ayike. Jaʼnix jich te Jesús la yakʼ jilel ta ilel te la schol skʼop Dios ta komon sitil, jich bitʼil ta stiʼil mar, o ta komon poso (Marcos 4:1; Juan 4:5-15). Jaʼnix jich ya kaʼiykotik aʼyej sok te ants winiketik ta bayuk ta swenta te bin ya yal te Bibliae, jich bitʼil ta be, ta banti ya schombajik, ta mercado soknix ta teléfono. Jaʼnix jich ya jcholbeykotik yaʼiy te jpat jxujkotik, te joʼtakotik ta aʼtel sok ta nop jun soknix te machʼatik ay bin kutoj jbakotik soke. Ta spisil ini, jich kʼoem ta pasel te bitʼil millonetik ta jtul ants winiketik ta Balumilal yakik ta yaʼiybeyel skʼoplal te lek yachʼil kʼop yuʼun te kolele (Salmo 96:2).

Nopa awaʼiy te machʼa ya akʼan ya acholbey yaʼiy te lek yachʼil kʼop yuʼun te Ajwalinel yuʼun te Diose sok te bin swentail ya xkʼot ta skuxlejal ta pajel chaʼbeje. Mame xamuk ta awoʼtan te lek yachʼil kʼop te ya yakʼ smukʼul koʼtantike. Akʼa ta naʼel te kʼalal ya xjuʼ ta pasel ya awile.

• ¿Bintik «lec yachʼil cʼop» te ya skʼan cholbeyel skʼoplale?

• ¿Bin utʼil jtʼunojbeykotik te bitʼil la schol skʼop Dios te Jesuse?