Ta Escrituras Griegas Cristianas bayal buelta ya yalbey skʼoplal te Bernabé sok te jpuk kʼop Pabloe. Te winiketik ini superintendenteetik-a, jaʼ la yulaʼtayik te congregacionetik ta kʼajkʼal-abi. ¿Bin tijbot yoʼtanik yuʼun? Jaʼ te bitʼil kʼax bayal skʼoplal ta yoʼtanik te yermanotakik te pajal schʼuunel yoʼtanik soke. Te Pablo la yal te yoʼtanuk ya schaʼsujt ta yulaʼtayel te hermanoetike, yuʼun jich ya snaʼ-a te bin utʼil ayike. Ma jaʼuk makot yuʼun te jayebto kilómetro been ta swenta yakʼbeyel yip yoʼtanik te hermanoetike (Hechos 15:36). Jaʼnix jich ya xtijbot yoʼtanik euk te superintendenteetik te ya x-ulaʼtaywanik ta kʼajkʼal ini.

Ya xtal smukʼubtes kʼinal kaʼiytik. Jtul superintendente yuʼun circuito ayniwan jtab ta chajp congregación ya yulaʼtay sok ya sjokin jun semana ta cheb buelta ta jun jaʼbil te jujun congregacione. Jtul superintendente yuʼun distrito ayniwan lajuneb ta chajp circuito ya yulaʼtay ta jun jaʼbil, te kʼalal ay ta ulaʼtaywaneje ya yil cheʼoxebuk congregacionetik sok jaʼ ya sjach te mukʼul tsoblej yuʼun cheb kʼajkʼale, jaʼme ya yil te lek ya xlokʼ te programa yuʼun te mukʼul tsobleje. Bayal bintik lek ya jnoptik ta stojol te hermanoetik ini soknix ta swenta te yinamik teme nujpunemike. Jaʼnix jich ya spasik tulan ta snaʼbeyel sba te jchʼieletik sok te machʼatik ayix yaʼbilalike, soknix tseʼelnax yoʼtanik ya skʼan ya xjokinwanik ta scholel skʼop Dios sok ta yulaʼtayel te ants winiketik te ya yichʼik nojptesel yuʼun te Bibliae. Te superintendenteetik ini ya xbajtʼik ta ulaʼtaywanej sok te ancianoetik ta smukʼubtesbeyel kʼinal yaʼiyik te hermanoetike, jaʼnix jich ya yakʼik kʼax lek discursoetik ta tsoblej sok ta mukʼul tsoblej swenta ya smukʼubtes kʼinal kaʼiytik (Hechos 15:35).

Jpisiltik ay jkʼoplaltik ta yoʼtanik. Te superintendenteetik kʼax bayal skʼoplal ta yoʼtanik te bin yilel ay te congregacionetik ta stojol te Diose. Ya stsob sbaik sok te ancianoetik sok te siervo ministerialetik swenta ya yilik te bitʼil lek yak ta pasel te aʼtelile sok ya x-akʼbotik tsitsel ta swenta te bin utʼil ya skʼan ya spas te yaʼtelike. Jaʼnix jich ya skoltayik te precursoretik ta spaselxan ta lek te yaʼtelike, soknix ya x-akʼbot bayal sbujtsʼ yoʼtanik ta snaʼbeyel sba te machʼatik yakikix ta talel ta tsoblej ta congregacione sok te kʼalal ya snaʼik te yak ta mukʼubel te schʼuunel yoʼtanike. Ta jujuntul te hermanoetik ini slokʼesoj sba ta yoʼtanik sok jaʼ jkoltaywanejetik ta swenta jlekilaltik (2 Corintios 8:23). Akʼa jnopbeytik te bitʼil ay te schʼuunel yoʼtanike sok te bitʼil ya yichʼik ta mukʼ te Diose (Hebreos 13:7).

• ¿Bin swentail te ya yulaʼtayik congregacionetik te superintendenteetike?

• ¿Bintik lekilal ya ata te kʼalal ya xtal te ulaʼe?