Te kʼalal ya anop te Biblia sok jtul testigo yuʼun Jehová, nailniwan ya achajpan aba ta swenta te lección ya yichʼ nopele. Swenta yuʼun ya xkʼotxan lek ta awoʼtan-a, jaʼnix jich ya skʼan pasel ta swenta te tsoblejetike. Yame anopxan ta lek teme ya atʼun jun programae.

Ilawil te bin ora, sok banti ya xjuʼ ya anop te skʼop Diose. ¿Jayeb ora ta kʼajkʼaleltik te ya xjuʼ ya anop te skʼop Diose? ¿Ta sajbal te kʼalal mato xjajchat ta aʼtel-ae, o ta yijkʼubelix kʼinal te kʼalal wayalikix-a te alaletike? Jaʼnix jich teme ma jocholukat ta leke, ilawil te jayeb tiempo ya xjuʼ ya anop te skʼop Diose, mame xawakʼ te ay bin ya smakate. Lea te banti atukel ya xjuʼ ya x-ayinate, sok tupʼa te bintik ya xjuʼ ya xchʼaybat awoʼtane, jich bitʼil te radio, televisión, teléfono, o te celulare. Te skʼoponel Dios te kʼalal mato xjajchat ta snopel-a te skʼop Diose yame xjuʼ ya skoltayat te manchuk ay bin ya snaʼulan awoʼtan ta swenta te kʼajkʼal-abi, jichme jun awoʼtan ya xjuʼ ya anop te skʼop Diose (Filipenses 4:6, 7).

Kitsa te kʼopetik te bayal skʼoplale, jichme chapalat yuʼun ya awalbey skʼoplal. Nail ya skʼan ya awil ta spisil te bin swentail te bin ya yichʼ nopele. Ilbeya te stituloil o scapituloil te bin ya yichʼ nopele, sok ilawil te bin utʼil te jujun subtítulo snitoj sba skʼoplal sok te temae, ilawil te lokʼombaetik sok kʼopona te jojkʼoyeletik yuʼun schaʼnaʼel te ya yakʼ ta ilel te bintik bayal skʼoplale. Ta patil kʼopona te jujun párrafo sok lebeya te sujtib te jojkʼoyel ta párrafo-abi. Lea te textoetik yuʼun Biblia te maba yichʼoj tsʼibayel tey-ae sok ilawil te bin utʼil snitoj sba skʼoplal sok te bin yak yichʼbel nopele (Hechos 17:11). Te kʼalal ataojbeyix-a te sujtib te jojkʼoyele, kitsa o bona chaʼoxpʼaluknax te kʼopetik te bayal skʼoplal te ya skoltayat yuʼun jich ma xchʼay ta awoʼtan-a. Jichme ya xjuʼ ya atoy akʼab yuʼun ya awalbey skʼoplal chaʼoxpʼaluk ta tsoblej te bin kʼot ta awoʼtane, teme jich ya skʼan awoʼtane.

Te kʼalal ya achajpan aba ta swenta te bintik ya yichʼ nopel ta tsoblejetik yuʼun jujun semanae, yame awil te ya anopxan ta lek te bin ya yal te Bibliae (Mateo 13:51, 52).

• ¿Bin utʼil ya xjuʼ ya x-ayin jun programa awuʼun swenta ya achajpan aba yuʼun te bintik ya yichʼ ilel ta tsoblejetike?

• ¿Bin utʼil ya xjuʼ ya achajpan te bin ya awalbey skʼoplal ta tsobleje?