Te Jehová * Dios la yakʼ nujpunuk te sbabial ants winike. Te Biblia ya yal te jaʼnix te Dios la spas te antse sok «la yicʼ tal ta stojol te winique». Kʼax tseʼel yoʼtan la yaʼiy te Adán te jich la yale: «¡Haʼix jbaquel te sbaquele, soc jbaqʼuetal te sbaqʼuetale!» (Génesis 2:22, 23). Te Jehová jaʼnix jich ya skʼan te tseʼeluk yoʼtanik te machʼatik nujpunemik ta ora ini.

Te kʼalal ya xnujpun jtul ants sok jtul winik, yaniwan skuyik te lek spisil te bitʼil ya x-ayin te skuxlejalike. Jaʼukmeto te bin smelelile jaʼ te ya yil swokolik euk te machʼatik skʼanoj sbaik ta leke (1 Corintios 7:28). Liʼ ta folleto ini, yame ata tojobtesel ta Biblia teme ya apas ta akuxlejalik te bin ya yale, yame ataik tseʼel oʼtanil sok te awal anichʼnabike (Salmo 19:8-11).

TE BIN YA YAL TE BIBLIAE: Te winike jaʼ jolol yuʼun te machʼatik ay ta yutil snae (Efesios 5:23).

Winik te nujpunematixe, te Jehová ya skʼan te ya akanantay sok skʼuxul awoʼtan te awiname (1 Pedro 3:7). Te Jehová la spas te ants yuʼun jaʼ anujpʼ ya xkʼot soknix ya skoltayat, jaʼ yuʼun ya skʼan te kʼux ta awoʼtan sok te ayuk skʼoplal ta awoʼtane (Génesis 2:18). Ya skʼan te kʼax kʼux ta awoʼtan sok ya skʼan te jaʼ mukʼxan skʼoplal ta awoʼtan te bin ya skʼan te awiname (Efesios 5:25-29).

Ants te nujpunematixe, te Jehová ya skʼan te ya awichʼ ta mukʼ te amamlale sok te yakuk akoltay ta spasel te yaʼtele (1 Corintios 11:3; Efesios 5:33). Yame skʼan te junuk awoʼtan yuʼun te bin ya sta ta nopele koltaya sok yutsil awoʼtan (Colosenses 3:18). Te kʼalal jich ya apase, mukʼme akʼoplal ya kʼoat ta yoʼtan te amamlale soknix te Jehovae (1 Pedro 3:1-6)

TE BIN YA XJUʼ YA APASE:

• Jojkʼoybeya te awinam o te amamlal te bin ya xjuʼ ya apas yuʼun ya xlekubxan-a te atalele. Chʼama awaʼiy ta lek te bin ya yalbate sok pasa tulan ta spasel ta akuxlejal

• Yame yichʼ bael tiempo ta yilel te bin utʼil ya awakʼbey stseʼelil yoʼtan te ajoye, jich yuʼun naʼame smaliyel

TE BIN YA YAL TE BIBLIAE: Ya skʼan te bayalukme skʼoplal ta awoʼtan te bin ya skʼan yoʼtan te ajoy, o anujpʼe (Filipenses 2:3, 4). Lekukme awoʼtan ta stojol te awinam o amamlale, julukme ta awoʼtan te Jehová jaʼ ya skʼan te lamaluk awoʼtan spisil orae (2 Timoteo 2:24). Nopame nailuk te bin utʼil ya xkʼopojate, melel te Bibliae jich ya yalbotik: «Ay machʼa te hich ya xʼehchenteswan te bin utʼil espada te scʼopique, yan te scʼop te machʼa pʼij yoʼtan ya xpoxtaywan stuquel» (Proverbios 12:18). Jaʼme ya skoltayat te espíritu yuʼun te Jehová yuʼun jich sok slekil sok yutsil awoʼtan ya xkʼopojat (Gálatas 5:22, 23; Colosenses 4:6).

TE BIN YA XJUʼ YA APASE:

• Te kʼalal ay bin tulan skʼoplal ya achapike, kʼambeyame te Dios yuʼun ya skoltayat te manchuk ya x-ilinat ta orae sok mame tikʼuknax-a te bin ya anop ta atukele

• Nopame nailuk te bin ya awale sok te bin utʼil ya awale

TE BIN YA YAL TE BIBLIAE: Te kʼalal ay machʼa ya xnujpune, «junax sbaqʼuetal ya xcʼoht schebalic» (Mateo 19:5). Jaʼukmeto aynanix-a te bin ma pajaluk ya xlokʼ ta nopel awuʼunike. Jich yuʼun yame skʼan te ya akʼaytes abaik te junuknax apensarik sok te pajaluk te bin ya awaʼiy ta awoʼtanike (Filipenses 2:2). Te kʼalal ay bin ya ataik ta nopele tulanme skʼoplal te pajaluk awoʼtanike. ¿Bin utʼil? Te Biblia jich ya yal: «Te bintic ya yichʼ chapel, tulan ya xcʼoht yuʼun lequil jʼacʼ-oʼtanil» (Proverbios 20:18). Leaik tojobtesel ta Biblia te kʼalal ay bin tulan skʼoplal ya anopik spasele (Proverbios 8:32, 33).

 

TE BIN YA XJUʼ YA APASE:

• Mame jaʼuknax xawalbey skʼoplal sok ajoy te bintik maʼyuk lek skʼoplale, albeyame te bin yaʼiyel ya awaʼiy te awoʼtane

• Te kʼalal ay machʼa ay bin ya achap soke, jojkʼoybeyame nailuk te ajoye