Jich bitʼil te la awilix liʼ ta folleto ini, te Biblia bayal mantaliletik yichʼoj te ya skoltayat sok te jayeb machʼatik ay awuʼune. Te Jehová ya skʼan te tseʼeluk awoʼtanike. Jaʼnix jich ya yal teme jaʼ ya xbajtʼ ta awoʼtanik yichʼel ta mukʼe, ya x-akʼbotex «spisil te bila ya xtuun awuʼunique» (Mateo 6:33, XCD). Te Diose ya skʼan te jun awoʼtan aba soke, jich yuʼun naʼame stuuntesel te tiempo swenta ya anaʼbeyxan sba te Jehovae, melel jaʼme te bin kʼax mukʼ skʼoplal te maʼyuk jich yan banti ya xjuʼ ta taele (Mateo 22:37, 38).

TE BIN YA YAL TE BIBLIAE: «Hoʼon Atatonic ya xcʼohon, haʼex achʼix queremetic cuʼun ya xcʼohex, xchi te Cajwaltic [Jehová]» (2 Corintios 6:18). Te Dios ya skʼan ya yamigoinat, te kʼalal ya akʼopone jaʼme ya skoltayat yuʼun ya xnoptsajat ta stojol. Jaʼnix te Jehová ya yalbotik: «Aʼtelinahic me scʼoponel Dios» (1 Tesalonicenses 5:17). Te Jehovae ya smulan te kʼalal ya acholbey yaʼiy bintik-a te ya amel awoʼtan yuʼune sok te bintik ay ta skʼubulil awoʼtane (Filipenses 4:6). Teme ya akʼopon Dios sok te afamiliae, yame yilik te achʼuunej te bitʼil aynix-a te Diose.

Mame jaʼuknax te ya akʼopon Diose, jaʼnix jich ya skʼan te ya achʼam awaʼiy te bin ya yalbate. ¿Bin utʼil? Jaʼ te kʼalal ya anopbey te sJune sok te yantik junetik te lokʼemik ta Bibliae (Salmo 1:1, 2). Nopilana ta awoʼtan te bin ya anope (Salmo 77:11, 12). Jaʼnix jich tulanme skʼoplal te ya xbaat ta tsoblejetik swenta ya achʼam awaʼiy te bin ya yal te Diose (Salmo 122:1-4).

Te kʼalal ya awalbey yaʼiy yantik ants winiketik ta swenta te Jehovae, jich ya xtulanajxan te bitʼil jun awoʼtan soke. Te kʼalal jich ya apasxane, jichme nopolxan ya awaʼiy aba ta stojol (Mateo 28:19, 20).

TE BIN YA XJUʼ YA APASE:

• Lokʼesbeyame stiempoil skʼoponel Dios sok skʼoponel te Biblia ta jujun kʼajkʼal

• Koltayame te afamilia te jaʼuk nail ya yakʼ ta yoʼtanik spasbeyel yaʼtel te Diose, te manchuk jaʼ ya xbajtʼ yoʼtanik-a te bintik ya skʼasesik tiempoe

TE BIN YA YAL TE BIBLIAE: «Nohpojanic ta stojol Dios, hich ya xnohpoj ta atojolic» (Santiago 4:8). Akʼbeya skʼajkʼalel sok yorail te kʼalal ya apasik te yichʼel ta mukʼ Dios ta sjunal ana spisil ora (Génesis 18:19). Mame jaʼuknax-abi, ichʼame ta wenta te Dios ta jujun kʼajkʼal soknix tulantesbeya schʼuunel yoʼtanik te afamiliae. Te Biblia jich ya yal: «Ya me awalbe scʼoblal [ta swenta te Jehová] cʼalal ayat ta ana, cʼalal ya xbehenat ta be, cʼalal ya xʼochat ta wayel soc te cʼalal ya xhahchat» (Deuteronomio 6:6, 7). Jichukme ya anop bitʼil te Josué te jich la yal: «Te hoʼon soc te machʼatic ay cuʼun ya cacʼ jbahcotic ta aʼbatinel yuʼun te Jehová» (Josué 24:15).

TE BIN YA XJUʼ YA APASE:

• Pasbeya sjunal spisil ora te bin utʼil ya apʼijubtes te machʼatik ay awuʼune, chikan te banti ya awil te ya skʼanik koltayel ta jujuntule