JOJKʼOYEL 7
¿Bin ya jpas teme ay machʼa ya sujon yuʼun ya skʼan ya xwayon soke?
¿BIN YA APAS TE JAʼUKATE?
Nopa awaʼiy ini: te Heather sok Mike aytonax cheb u te yakik ta lokʼel ta paxial, te Heather jich ya yaʼiy te namey jun ayikixe. Jujun ajkʼ ya stikunbey sbaik mensaje sok bayal ora ya skʼopon sbaik ta telefono sok snaʼojikix-a te bin ya yalbey sbaik te kʼalal mato xlaj yoʼtan ta kʼop-a te yane. Pero, te Mike ma jaʼukxanix ya skʼan ya xkʼopojik, ay bin yan ya skʼan ya spas.
Te Mike sok te Heather jaʼnax ya stsakbey sba skʼabik sok cheʼoxebnax ujtsʼiyel yakʼojbey sbaik. Te achʼixe maba ya skʼan ya spas te bin chopole, pero ma skʼan te ya x-ijkʼitayot jilel yuʼun te slekole. Melel kʼax tʼujbil ya yaʼiy sba sok bayal skʼoplal ya yaʼiy sba yuʼun. Te Heather jich ya snop: «Maʼyuk bin ya spas, melel te joʼon sok te Mike, bayal ya jkʼan jba sok».
Teme ayix awaʼbilal yuʼun ya ale alekol sok teme ay jich ya xkʼot ta atojol te bitʼil Heather, ¿binwan ya apas?
NOPA NAILUK
Te sjokinel sbaik ta wayel te machʼatik nujpunemikixe, jaʼ jun mukʼul majtʼanil akʼbil yuʼun te Diose. Teme ya xyalat ta mulil te kʼalal mato xnujpunat-ae jich kʼoem te la apʼaj te mukʼul majtʼanil-abi. Jaʼme pajal sok te ay machʼa ya skʼebanbat yachʼil kamisa, pero ya atuuntes ta skusojibal abak.
Teme ya xwilat koel tal ta jpejt teʼ jich bitʼil ya xwil te jaʼmal mutetike, yananix ata awokol-a. Jaʼ pajal sok teme ya akʼaxuntay te mantaliletik ta swenta te bintik chopol ta pasele, jich bitʼil te yalel ta mulil te smakojbey skʼoplal te sjokinel ta wayel te machʼa maba nujpunemat soke (1 Tesalonicenses 4:3).
¿Bintik wokolil ya yichʼ tael kʼalal ya yichʼ kʼaxuntayel te mantalil-abi? Te Biblia ya yal: «Te machʼa ya xyal ta mulile, jaʼ ya yacʼ ta qʼuexlal a te sbaqʼuetal te la spas mulil soque» (1 Corintios 6:18, Xchʼul Cʼop Dios ta Tzeltal). ¿Bin ya skʼan ya yal-abi?
Te bin tʼunbil skʼoplale ya yakʼ ta ilel te bayal jchʼieletik te yalik ta mulil kʼalal mato xnujpunik-ae ay staojik wokolil, jich bitʼil ini:
-
YA XLAJINOT YUʼUN TE YOʼTANE. Jteb ma spisiluk te jchʼieletik te yalik ta mulil kʼalal mato xnujpunik-ae la yalik te maba lek ya yaʼiy sbaike.
-
MAʼYUKIX SMUKʼUL YOʼTAN TA STOJOL TE SJOYE. Kʼalal yalemikix ta mulil-ae, ay chaʼoxtul ya sjojkʼoybey sbaik te machʼawan ay wayemix sok te sjoye.
-
YA SMEL YOʼTANIK YUʼUN. Te bin ya smulan te achʼixetike, jaʼ te ay machʼa ya xkanantayotik yuʼune, ma skʼanik te machʼa jaʼnax ya sle te bin ya skʼan stukele. Bayal keremetik maba ya smulanik te achʼixetik te oranax ya schʼuunik te bin ya yichʼik pasbeyele.
-
Ta slajibal: teme ya xyalat ta mulile, ya awakʼ ta chʼayel te bin kʼax mukʼ skʼoplale: Jaʼ te lek akʼoplale (Romanos 1:24). Te abakʼetale kʼax mukʼ skʼoplal, jich yuʼun mame xa akʼeban.
Ayuk yip awoʼtan sok mame xyalat ta mulil te kʼalal mato xnujpunat-ae (1 Tesalonicenses 4:3). Kʼalal nujpunematix-ae ya xjuʼ xwayat sok te ajoye, jichme ya amulan sjokinel ta wayel, maʼyuk bin ya amel awoʼtan yuʼun sok maba ya slajinat te awoʼtane, jaʼ-abi ma jichuk yaʼiy stukelik te machʼatik ya xyalik ta mulil kʼalal mato nujpunemik-ae (Proverbios 7:22, 23; 1 Corintios 7:3).
¿BIN YA ANOP YUʼUN?
-
Teme ay machʼa kʼuxat ta yoʼtane, ¿mabal jichuk te jaʼ ya skʼan te lek ayat sok te lek ya awaʼiy abae?
-
Teme ay machʼa yuʼun-nix ayat ta yoʼtan-ae, ¿yabal yakʼbat apas te bin maba lek ya yilat yuʼun te Diose? (Hebreos 13:4).
