Nopa awaʼiy ini: ta mal kʼajkʼal yuʼun miércoles, te Geoff ayix 17 yaʼbilale, lajix yoʼtan ta spasel starea sok yorailix te ya skux jtebuk yoʼtane. ¡Snupʼ te jich ya spase! Jich yuʼun la stiles te telebision sok la swayan sba ta siyon.

Och tal te stat te maba bujtsʼan kʼinal ya yaʼiye.

¿Binwan la apas te jaʼukat te Geoff swenta ma jichuk kʼot ta pasel-abi?

Teme makal la ata te carretera kʼalal yakat ta stijel karroe ya ale yan be. Jaʼnix jich lea te bin-utʼil ya xkʼopojat sok te ameʼ atate.

 JICH BITʼIL:

Te Leah la yal: «Kʼax wokol ya kaʼiy te ya xkʼopojon sok te jtate. Ay baeltik te kʼaxix bayal tiempo-a te ya sutbon te jkʼope, jich ya yal: “Pasa perdon, ¿binlaj-a te la awalbone?”».

OXCHAJP TE BIN YA XJUʼ YA SPAS TE LEAH

1. Tulan ya skʼopon te state.

   Te Leah tulan ya skʼopon te state: «¡Aʼiybon te jkʼope, bayal skʼoplal!».

2. Maba ya yalbeyxan skʼoplal.

   Te Leah maba ya yalbeyix te stat te kʼop yuʼune.

3. Ya sle bin-ora ya xkʼopoj sok te state.

   Te Leah yanto buelta ya yalbey te stat te kʼop yuʼune o ya stsʼibaybey jun karta te banti ya scholbey yaʼiye.

¿Banti ta yoxebal ya awalbey te ya xjuʼ ya spas te Leah?

NOPA AWAʼIY INI: Te stat Leah bayal bintik yak ta snopel sok jkʼaxel chʼayem yoʼtan. Te jaʼuk ya spas Leah te bin ya yal te numero 1 te tulan ya xkʼopoje, maniwan ya xkʼot ta yoʼtan te stat bin yuʼun jich ya spase. Maniwan ya x-aʼiybot te skʼope. Jaʼnix jich maba yak ta yichʼel ta mukʼ te state (Efesios 6:2). Maʼyuk bin lek ya xlokʼ yuʼun ta schebalik.

Manchukme jaʼ kʼun ta pasel te bin ya yal te numero 2, ma jaʼuk lekxan ta pasel. ¿Bin yuʼun? Melel teme ya skʼan ya schajpan te kʼop yuʼun te Leah, ya skʼan ya skʼopon te state. Jaʼnix jich te state ya skʼan ya snaʼ te bin yak ta kʼaxel ta stojol te Leah yuʼun ya skoltay. Teme maba ya skʼan ya xkʼopoje maʼyuk bin ya xlokʼ-a.

Yan teme jaʼ ya spas te bin ya yal te numero 3, jich ya yakʼ ta ilel te maʼyuk bin ya xmakot ta skʼoponel te state. Jich yuʼun ya sle bin-ora ya xkʼopoj sok. Teme ya skʼan ya stsʼibaybey jun kartae lekniwan ya yaʼiy sba te Leah.

Yaniwan xkoltayot ta scholel ta lek te bin yaʼiyel ya yaʼiy sba te Leah kʼalal ya stsʼibaybey jun karta te state. Kʼalal ya skʼopon karta te state, jich ya xkʼotxan ta yoʼtan te bin yak kʼaxel ta stojol te Leah. Te bin ya yal te numero 3 jaʼ lek bin ya xlokʼ yuʼun-a te Leah sok te state. Teme ya xkʼopoj sok te stat o ya stsʼibaybey karta, jaʼ yak ta spasel te bin ya yal te Biblia te ya skʼan ya «jtʼuntic bin utʼil ya xlahmaj qʼuinal» kuʼuntike (Romanos 14:19).

¿Bintikxan ya xjuʼ ya spas te Leah?

Nopa awaʼiy teme ay yan bin ya xjuʼ ya spase sok te bin ya xlokʼ-ae.

Juluk ta awoʼtan ini: ma spisiluk-ora ya stsak sba akʼop sok te ameʼ atate.

JICH BITʼIL:

Te ameʼ atate ya sjojkʼoybatik bin yuʼun te maba bujtsʼan kʼinal ya awaʼiye. Pero jich ya awalbey: «Ma jkʼan ya kalbeyex awaʼiyik».

Pero ayniwan jich ya xkʼot ta yoʼtan te ameʼ atat ini: «Maʼyukix lek smukʼul koʼtan ta stojol te jmeʼ jtate. Jich yuʼun te bintik yak ta kʼaxel ta jtojole, jaʼ ya kalbey yaʼiy te kamigotake».

Nopa awaʼiy te ayuk ya ata tulan kʼop te ya skʼan ya skoltayat te atat o te ameʼe, pero teme jich ya awalbeye: «Ma xa amel awoʼtan, ya jchajpan jtukel».

• ¿Binwan ya xkʼot ta yoʼtan te ameʼ atate?

• ¿Bin-utʼil lek ya asutbey te skʼope?