Nopa awaʼiy ini: kʼalal yak ta stijel skarro te David la yil te ma snaʼbey sba te lugar te banti aye. Kʼalal la yilbey sbiil te kayeetik sok te mukʼul naetike la yil te chʼayemixe. Yuʼun-niwan ma la yil te la stsak yan bee.

¿Binwan ya apas te jaʼukat te Davide?

Ay chaʼoxchajp te bin ya xjuʼ ya apase:

1. Jaʼ te ay machʼa ya ajojkʼoybey te banti ya akʼan ya xkʼoate.

2. Jaʼ te ya atuuntes jun mapa o GPS yuʼun ya yakʼ ta ilel te banti ya xkʼoate.

3. Jaʼ te ya atijxan bael te karro yuʼun ya awil teme ya ata ta leel te be.

Te bin ya yal te numero 3, mananix ya skoltayat-a.

Te bin ya yal te numero 2, jaʼ lekxan te bitʼil numero 1: melel teme awichʼoj te mapa o GPS, jaʼme ya stojobtesat.

Jichme ya skoltayat-euk te Bibliae.

 Te libro kʼax bayal chonbile yame xjuʼ:

• Ya yakʼbat tojobtesel kʼalal ya asitintay wokolil.

• Ya skoltayat ta snaʼel te bin ay ta awoʼtan sok ta slekubtesel te atalele.

• Ya yakʼbat anaʼ bin-utʼil lek ya xkuxinat.

Kʼalal ya jnaʼtikix kʼop-ae ya xjajchotik ta spasel jojkʼoyeletik:

• ¿Bin yuʼun te yax sbonil te chʼulchane?

• ¿Bintik pastiklanbil-a te ekʼetike?

Patil ya xjajch jojkʼoytik ta swenta te kuxlejalile:

• ¿Bin yuʼun te bayal bintik chopol ya xkʼax ta jtojoltike?

• ¿Bin yuʼun te ya xlajotike?

¿Anaʼojbal te ya yakʼbey sujtib te Biblia te jojkʼoyeletik-abi?

Bayal ta tul ants winiketik ya yalik te nojel ta lotil aʼiyejetik te Bibliae, te jaʼlaj jun libro te antiguoixe o te kʼax tulanlaj ta nopele. Pero, ¿melelbal-abi? ¿Jichnixbal-a te bin ya yal te ants winiketik ta swenta te Bibliae? ¿Jaxan teme ma jichuk te bin ya yalike?

Jich bitʼil ya skuyik te jaʼnix te Biblia ya yal te jaʼ ay ta skʼab Dios te balumilale. Pero, ¿snujpʼbal te jich ya yichʼ alele? Te balumilale kʼax nojel ta bintik chopol. Bayuknax ya kiltik mel-oʼtan, wokolil, chamel, lajel, meʼbail sok te bintik ya xlajinwan jilele. ¿Jaʼbal smul te Dios te kʼuxotik ta yoʼtane?

¿Yabal akʼan ya anaʼ machʼa swentainoj te balumilale? Yan-naxniwan ya awil-a te sujtib ya yakʼ te Bibliae.

Spisil te tsitsel ay ta foyeto ini lokʼesbil ta Biblia. Te stestigotak Jehová kʼoem ta yoʼtanik te ya yakʼ lekil tojobtesel te Bibliae, melel «spisil te bin tsʼihbabil hilel ta Shun hich nix la scʼan Dios te ya yichʼ tsʼihbayel, soc ya xtuhun scuenta nohptesel, tsitsel, tojobtesel soc yaqʼuel ta nopel bin stojil ta pasel» (2 Timoteo 3:16, 17). Ya jkʼankotik te ya akʼopon te libro ini manchukme kʼax antiguoix, ya xtuun kuʼuntik ta kʼajkʼal ini.