1, 2. ¿Machʼatik-a te la stsa te Jehová yuʼun kʼot ta yamigotak?

¿MACHʼA ya atsa yuʼun ya awamigoin? Jaʼ te machʼa lek ya awil aba soke, te leknax yoʼtane sok te ya amulanbey te stalele.

² Te Jehová ay stsaoj chaʼoxtul ants winiketik jich bitʼil yamigotak. Jich bitʼil te Abraham amigoinot yuʼun te Jehová (Isaías 41:8; Santiago 2:23). Te ajwalil David jaʼnix jich la yamigoin sba sok te Diose. Te Jehová la yal te leknax yoʼtan ta stojol te Davide (Hechos 13:22). Te Jehová jaʼnix jich la yal te bayal skʼoplal ta yoʼtan te j-alwanej Daniel (Daniel 9:23).

3. ¿Bin yuʼun la yichʼik naʼbeyel sba bitʼil amigo yuʼun Jehová te Abraham, David sok te Daniel?

³ ¿Bin yuʼun la yichʼik naʼbeyel sba bitʼil amigo yuʼun Jehová te Abraham, David sok te Daniel? Te Jehová jich la yalbey te Abraham: «La achʼuhumbon te jcʼope» (Génesis 22:18). Te Jehová ya yamigoin te machʼatik pekʼel yoʼtanik sok te ya xchʼuunbot skʼop yuʼunike. Jaʼnix jich ya xjuʼ ya yamigoin jpam nasion. Jich la yalbey te nasion yuʼun Israel: «Chʼuhumbonic te jcʼope, hich Dioson awuʼunic ya xcʼohon soc haʼex pueblo cuʼun ya xcʼohex» (Jeremías 7:23). Swenta ya awamigoin te Jehová jaʼnix jich yame skʼan ya achʼuunbey te skʼope.

4, 5. ¿Bin-utʼil ya skoltay te yamigotak te Jehová?

⁴ Te Jehová ya sle bintik-utʼil «ya yaʼbe yip te machʼatic jun yoʼtanic ta stojol» (2 Crónicas 16:9). Ta Salmo 32:8, te  Jehová jich ya yalbey ta jamal te yamigotak: «Ya caʼbat anaʼ soc ya caʼbat awil te be te banti ya scʼan ya xbehenat; ya cacʼ jsit ta atojol».

⁵ Ay jtul jkontratik te bayal yuʼel te ma skʼan ya kamigointik te Diose. Pero te Jehová ya skʼan ya skoltayotik ta stojol te jkontratike (kʼopona Salmo 55:22). Jich bitʼil kamigoinej jbatik sok te Diose, sok spisil koʼtantik ya x-abatinotik ta stojol sok jun koʼtantik ta stojol manchukme ayotik ta tulan wokolil. Jich smukʼul koʼtantik ta stojol Dios te bitʼil te David te jich la stsʼibay: «Te bin utʼil ay ta jwaʼel, ma ba ya xyucʼoton» (Salmo 16:8; 63:8). ¿Bin ya spas te Satanás yuʼun ya smakotik ta yamigoinel te Jehovae?

6. ¿Bin ya yal ta jtojoltik te Satanase?

⁶ Te Satanás la sle ta kʼop te Jehová jich bitʼil la jnoptik ta kapitulo 11 soknix la yal te jaʼ jpas lote. Jaʼnix jich la yal te maba la yakʼ ta libre te Adán sok te Eva yuʼun jaʼ ya staik te nopel te bin lek ta pasel sok te bin ma lekuke. Te libro yuʼun Job ya yakʼ jnoptik te jaʼnix jich ya sle jmultik te Satanás te bitʼil ya jkʼan ya kamigointik te Diose. Te Satanás ya yal te jaʼnaxlaj ya kichʼtik ta mukʼ Dios ta swenta te bintik ya yakʼbotike, malaj jaʼuk yuʼun te kʼux ta koʼtantike. Jaʼnix jich ya yal te machʼauklaj ya xjuʼ ya yakʼ te ya skontrain te Diose. Kiltik bin ya xjuʼ ya jnoptik ta swenta te bin kʼax ta skuxlejal te Job sok bin-utʼil koltayot yuʼun te Jehová.

7, 8. 1) ¿Bin la yal te Jehová ta stojol te Job? 2) ¿Bin la yal te Satanás ta stojol te Job?

⁷ ¿Machʼa-a te Job? Jaʼ jtul lekil winik te ayix 3,600 jaʼbil te kuxine. Ta yorail-abi, te Jehová la yal te maʼyuk machʼa jich pajal sok te Job ta Balumilale. Te Job la yichʼ ta mukʼ te Jehová sok jkʼaxel la spʼaj te bintik chopole (Job 1:8). Te Jehová la yamigoin ta smelelil te Jobe.

⁸ Te Satanás la yal te la yichʼ ta mukʼ Dios te Job ta skajnax  te bintik ya x-akʼbot yuʼune. Te Satanás jich la yalbey te Jehová: «¿Ma bal ajoytayej soc te machʼatic ay yuʼun soc te bintic ay yuʼune? Awaʼbeyej bendición spisil te yaʼtel, ha yuʼun te bayel pʼohlem te bintic ay yuʼun ta qʼuinal. Pero te yacuc ahach acʼab yoʼtic ta spojbeyel spisil te bintic ay yuʼune, ya me awil teme ma ba ya sbohlcʼoptayat ta atojol» (Job 1:10, 11).

9. ¿Bin-a te maba komot ta spasel te Satanás yuʼun te Jehová?

⁹ Te Satanás la slebey smul te Job, la yal te jaʼnaxlaj ya yichʼ ta mukʼ Dios yuʼun te bintik ya x-akʼbot yuʼune. Sok la yal te yalaj xjuʼ ya schebajtesbey yoʼtan te Job yuʼun ya yijkitay ta yichʼel ta mukʼ te Diose. Manchukme ma jichuk snopoj Jehová ta stojol te Job jich bitʼil ya yal te Satanase, la yakʼ ta pasel ta prueba te Jobe. Jich ya xchiknaj ta ilel teme sok skʼuxul yoʼtan yak ta yichʼel ta mukʼ Dios te Jobe.

10. 1) ¿Bin-utʼil akʼbot swokol yuʼun Satanás te Jobe? 2) ¿Bin la spas te Jobe?

¹⁰ Te sbabial wokolil akʼbot yuʼun Satanás te Job, jaʼ te la yichʼ elkʼanbeyel te schambalame, te jayebxan jile la yakʼ lajukik. Ta patil, tikunbot ta milel jteb ma spisil te j-abatetik yuʼune. Spisil la yichʼ lajinel te bintik ay yuʼune. Te slajibal wokolil la yakʼ te Satanás, jaʼ te la smilbey te lajuntul snichʼnab ta jun tulan ikʼ. Pero jun yoʼtan la yakʼ sba ta stojol Jehová te Jobe. Te Biblia jich ya yal: «Ta spisil ini ma ba la sta smul te Job soc ma ba la yaʼbe smulin te Diose» (Job 1:12-19, 22).

11. 1) ¿Binxan wokolil akʼbot yuʼun Satanás te Job? 2) ¿Bin la yal te Job?

¹¹ Te Satanás mananix la skom sba-a. Jich la yalbey te Diose: «Ehchantesbeya sbaquel soc sbaqʼuetal, ya me awil teme ma ba ya sbohlcʼoptayat ta atojol». Jich yuʼun te Satanás la yakʼbey tulan chamel te Jobe (Job 2:5, 7). Te Job jun yoʼtan la yakʼ sba ta stojol Dios yan buelta. Jich la yal: «¡Ha to cʼalal ya xchamon ya cal te jun te coʼtane!» (Job 27:5).

12. ¿Bin-utʼil la yakʼ ta ilel Job te jpaslot te Satanase?

 ¹² Te Job jkʼaxel ma snaʼ-a te jaʼ yak ta lebeyel smul yuʼun te Satanase, ni jaʼuk te bin yuʼun bayal swokole. La skuy te jaʼ yak ta akʼbeyel swokol yuʼun te Diose (Job 6:4; 16:11-14). Manchukme jich la snop te Job, jun yoʼtan la yakʼ sba ta stojol te Jehová. Chiknaj ta ilel te smelelil yak ta yichʼel ta mukʼ Dios te Jobe, ma jaʼuk yuʼun te ay bin ya smaliy te ya x-akʼbot yuʼune. Te Job kʼux la yaʼiy ta yoʼtan te Diose, jaʼ yuʼun la yamigoin sba sok. Spisil te bintik la yal te Satanás ta stojol te Job, ma meleluk.

13. ¿Bin lekilal la sta te Job ta skaj te jun yoʼtan la yakʼ sba ta stojol te Diose?

¹³ Manchukme ma snaʼ te Job te bintik yak ta kʼoel ta pasel ta chʼulchane, jun yoʼtan la yakʼ sba ta stojol te Diose sok jich la yakʼ ta ilel te kʼax chopol te Satanase. Te Jehová la yakʼbey bendision te Job ta skaj te jaʼ jtul amigo te jun yoʼtan la yakʼ sbae (Job 42:12-17).

14, 15. ¿Bin yaloj te Satanás ta stojol spisil te ants winiketike?

¹⁴ Bayal bin ya xjuʼ ya jnoptik ta swenta te bin kʼax ta skuxlejal te Jobe. Te Satanás jaʼnix jich ya slebey smul te j-abatetik yuʼun Dios ta ora ini. Ya yal te jaʼnax ya x-abatinotik ta stojol Dios ta swenta te ay bintik ya yakʼbotike. Te Satanás jich la yal: «Spisil bintic ay yuʼun te winic ya yacʼ yuʼun te scuxlejale» (Job 2:4). Ma jaʼuknax la yal ta stojol Job te jaʼnax la yichʼ ta mukʼ Dios yuʼun te ay bintik akʼbot yuʼune, jaʼnix jich ya yal ta stojol spisil te ants winiketike. Manchukme ayix bayal ta cien jaʼbil slajel-a te Job, te Satanás maba la skom sba ta sbolkʼoptayel te Jehová soknix te j-abatetik yuʼune. Jich ya yakʼ ta ilel te Proverbios 27:11: «Jnichʼan, ayuc me spʼijil awoʼtan, hich me yac awacʼ tseʼejinuc coʼtan; hich ya xhuʼ ya jsuhtesbe scʼop te machʼa ya spʼajone».

¹⁵ Jaʼatnixme ya ata ta nopel teme ya akʼan ya awakʼ aba ta  abatinel ta stojol te Jehová sok te ya awamigoine. Jichme ya awakʼ ta ilel te jpaslot te Satanase. Ayniwan bayal te bintik ya skʼan ya ajel ta akuxlejal yuʼun ya awamigoin te Diose, jaʼ te bin kʼax mukʼ skʼoplal ya xjuʼ ya apase. ¿Bin yuʼun? Melel te Satanase ya yal te malaj xjuʼ awuʼun te jun awoʼtan ya awakʼ aba ta stojol Jehová te kʼalal ya xtal kʼop ta atojole. Jaʼnix jich ya sle bin-utʼil ya sloʼlayotik yuʼun ya jkʼaxuntaybeytik smantal te Diose. ¿Bin-utʼil?

16. 1) ¿Bintik ya stuuntes te Satanás yuʼun ya sloʼlay te ants winiketik yuʼun ma x-abatinik ta stojol te Jehová? 2) Jaxan te jaʼate, ¿bin-utʼil ya akuy te ya xjuʼ ya skomat te Diablo yuʼun ma x-abatinat ta stojol te Jehovae?

¹⁶ Te Satanás bayal bin ya spas yuʼun ma skʼan te ya kamigointik te Diose. Ay jich ya skʼan ya slajinotik «bitʼil león-choj te yac ta aw» (1 Pedro 5:8, TZOXCH). Jaʼ yuʼun mame yanuk ya awaʼiy te kʼalal te awamigotak, afamiliatak o yantik ants winiketik ya skʼan ya skomatik ta snopel te Biblia sok ta spasel te bin leke. Ayniwan ya awaʼiy te yakat ta utsʼinel ta swenta-abi (Juan 15:19, 20). * Sok ay «ya spʼis sba ta chʼul aʼbat yuʼun sacal qʼuinal» te Satanase. Ta melel, ya skʼan ya sloʼlayotik yuʼun ya jkʼaxuntaybeytik smantal te Jehovae (2 Corintios 11:14). Te yan bin ya spas te Satanás yuʼun ya skomotik ta abatinel ta stojol te Jehová, jaʼ te jich ya kaʼiy jbatik te ma xtuunotik ta stojol te Diose (Proverbios 24:10).

17. ¿Bin yuʼun ya jchʼuunbeytik smantal te Jehovae?

¹⁷ Kʼalal ya jchʼuunbeytik smantal te Jehová jich ya kakʼtik ta ilel te jpaslot te Satanase. ¿Bin ya skoltayotik yuʼun ya jchʼuunbeytik te smantale? Te Biblia jich ya yal: «Kʼuxme xa  awaʼiy ta awoʼtan te Jehová te Dios awuʼun sok spisil awoʼtan sok spisil akuxlejal, sok spisil te awipe» (Deuteronomio 6:5, TNM). Ya jchʼuunbeytik smantal te Jehová ta skaj te kʼux ta koʼtantike. Te kʼalal ya xmukʼubxan te skʼuxul koʼtantik ta stojole, jaʼme ya stij koʼtantik yuʼun ya jpas ta jkuxlejaltik te bin ya skʼanbotike. Jich la stsʼibay te jpuk-kʼop Juan: «Chican te cʼux ta coʼtantic te Dios teme ya jchʼuhumbetic te mandariletic yuʼune. Ma ba wocol ta chʼuhunel te mandariletic yuʼune» (1 Juan 5:3).

18, 19. 1) ¿Bintik-a te ya yal Jehová te ma lekuk ta pasele? 2) ¿Bin yuʼun ya jnaʼtik te maba ya skʼanbotik Jehová te bin ma xjuʼ kuʼuntik spasele?

¹⁸ Te Jehová ya yal te ay bintik ma lek ta pasele. Yame awil cheʼoxeb ejemplo ta rekuadro « Ilaya te bin ya yilay te Jehová». Te kʼalal ya awile ayniwan ya akuy te ma kʼax chopoluk ta pasele. Pero te kʼalal ya akʼopon tekstoetik yuʼun Biblia sok ya anopilan ta awoʼtane, yame xkʼot ta awoʼtan te bin yuʼun jaʼ lekxan te ya jchʼuuntik te leyetik yuʼun te Diose. Jaʼnix jich yaniwan ata ta ilel te ay bintik ya skʼan ya  ajel ta akuxlejale. Jaʼniwan te bin tulan ta pasele. Pero teme ya apase, yame xbajt amulan lamalkʼinal sok tseʼel-oʼtanil te jaʼnax ay yuʼunik te yamigotak te Jehovae (Isaías 48:17, 18). ¿Bin-utʼil ya jnaʼtik te ya xjuʼ ya jeltik te jkuxlejaltike?

¹⁹ Te Jehová maʼyuk bin-ora ya skʼanbotik te bin ma xjuʼ kuʼuntik spasele (Deuteronomio 30:11-14). Te Jehová jaʼ mero kamigotik stukel sok jaʼnax stukel te ya snaʼbotik jbatik ta leke. Ya snaʼ te bintik lekil talelil ay kuʼuntik sok te banti ya xchʼayotike (Salmo 103:14). Te jpuk-kʼop Pablo jich la yal: «Stalel jun yoʼtan ta jtojoltic te Diose, ma ba ya yacʼ te yac awichʼic tsajel te ma xcuhch awuʼunic, ha pajal ya yacʼ soc te tsajel te bin utʼil ya xhuʼ ya xloqʼuex ta stojol te tsajel, scuenta yuʼun ya xcuhch awuʼunic a» (1 Corintios 10:13). Ay smukʼul koʼtantik ta stojol Jehová te spisil-ora ya yakʼbotik kiptik yuʼun ya xjuʼ kuʼuntik spasel te bin stojile. Jaʼnix jich yame yakʼbat yip awoʼtan yuʼun ya xjuʼ awuʼun sitintayel spisil te wokolil ya xtal ta atojole (Colosenses 1:1). Te kʼalal kʼax ta tulan wokol te Pabloe, jaʼ koltayot yuʼun te Jehová.  Jaʼ yuʼun jich la yal: «Spisil ya xjuʼ kuʼun ta swenta te Machʼa ya yakʼbon yip koʼtan» (Filipenses 4:13, TNM).

20. ¿Bin taleliletik yuʼun Jehová ya skʼan ya jkʼayinbeytik sok bin yuʼun?

²⁰ Teme ya jkʼan ya kamigointik te Jehová, mame jaʼuknax ya skʼan ya kijkitaytik spasel spisil te bintik chopol ya yile. Aytomexan bin ya skʼan ya jpastik (Romanos 12:9). Te yamigotak te Diose jaʼ kʼux ta yoʼtanik-euk te bin kʼux ta yoʼtan te Diose. Ya skʼayinbeyik stalel sok ya yakʼik ta ilel «scʼuxul-oʼtanil, tseʼel-oʼtanil, lamal qʼuinal, ya xcuhch yuʼun, yutsil-oʼtanil, jun-oʼtanil, schʼuhunel-oʼtanil, manso-oʼtanil, soc ya xhuʼ yuʼun scomel sba» (Gálatas 5:22, 23). Swenta ya anaʼ bin yilel stalel te yamigotak te Diose, kʼopona te Salmo 15:1-5.

21. ¿Bin ya skoltayat yuʼun ya awakʼ ta ilel te taleliletik te ya smulan te Diose?

²¹ ¿Bin ya skoltay yuʼun ya awakʼ ta ilel te tʼujbil taleliletik-abi? Jaʼ te ya anop te bintik ya smulan te Diose. Jaʼ yuʼun ya skʼan ya akʼopon sok ya anop te Bibliae (Isaías 30:20, 21). Teme jich ya apase, bejbe ya xmukʼub te skʼuxul awoʼtan ta stojol te Jehovae. Sok jaʼme ya skoltayat yuʼun ya achʼuunbey te smantale.

22. ¿Bin ya jtatik teme ya jchʼuunbeytik skʼop te Jehovae?

²² Te sjeltayel te jkuxlejaltike jaʼ jich kʼoem te ya jlokʼestik te jpokoʼ jkʼuʼtik sok ya jlaptik te yachʼile. Te Biblia ya yal te ya skʼan ya jcholtik lokʼel te jpokoʼ jtaleltik sok jaʼuk ya jlaptik te yachʼil kuxlejalil (Colosenses 3:9, 10). Manchukme wokol ta pasel ini, te Jehová jamal yaloj te ay bin ya yakʼbotik teme ya jeltaytik te jkuxlejaltik sok teme ya jchʼuunbeytik te skʼope (Salmo 19:11). Chʼuunbeya smantal te Jehová sok skʼuxul awoʼtan, mame jaʼuk ta skaj te ay bintik ya yakʼbat ta pajel chaʼbeje. Teme jich ya apase, yame awakʼ ta ilel te jaʼ jpaslot te Satanás sok jichme ya awamigoin ta smelelil te Jehovae.