1, 2. ¿Banti ya xjuʼ ya jtatik koltayel ta ora ini?

NOPA awaʼiy te ya xlokʼat ta beel ta jun kʼajkʼal te mero kʼepele, pero ta repentenax ya xmajk tal te kʼinale, ya xjajch ta chiknajel tsantsewal sok ya xjajch chawuk. Ta jtsʼin-nax ya xtal te jaʼale, jich yuʼun ya ale banti ya anakʼ aba yuʼun ya akʼases te jaʼale. ¿Mabal jichuk te bujtsʼanax kʼinal ya awaʼiy te kʼalal ya ata jun lugar banti ya anakʼ abae?

² Jichnix ta ora ini, ta skaj te yak ta bolobelxan stalel te ants winiketik, ya skʼan ya jletik banti ya jnakʼ jbatik kʼoem yuʼun ma xyutsʼinotik-a te wokoliletike. Jich yuʼun yaniwan ajojkʼoybey aba: «¿Banti ya xjuʼ ya jta koltayel?». Jtul j-abat yuʼun Dios te la stsʼibay jun salmo jich la yal: «Hich me ya calbe te Jehová: Haʼat ahnibalat cuʼun soc toyol tsʼahcat cuʼun, Diosat cuʼun te smucʼulinejat coʼtan» (Salmo 91:2). Ta melel, te Jehová ya xjuʼ ya skoltayotik ta sitintayel te wokoliletik te ya jtatik ta ora ini. Jaʼnix jich ya yalbotik ta jamal te bin kʼax tʼujbil snopoj ya yakʼbotik ta pajel chaʼbeje.

3. ¿Bin ya skʼan ya jpastik yuʼun anibal ya xkʼot kuʼuntik te Jehová?

³ ¿Bin-utʼil ya xjuʼ ya xkʼot ta anibal kuʼuntik te Jehová? Te Jehová ya xjuʼ ya skoltayotik ta sitintayel biluk wokolil te ya xtal ta jtojoltike. Jaʼnix jich jaʼ bayalxan yuʼel te bitʼil te machʼatik ya skʼan ya yutsʼinotike. Sok teme ay bin chopol ya xkʼot ta pasel ta jtojoltik te ya yutsʼinotik jilele, te Jehová yame xjuʼ ya schajpan ta pajel chaʼbej. Te Biblia jich ya stij koʼtantik ta spasel: «Junuc me awoʼtanic xʼayinex ta stojol te scʼuxul yoʼtan Dios» (Judas 21). Swenta ya skoltayotik te Jehová ta sitintayel te jwokoltike, ya skʼan te spisil-ora kamigoinej jbatik soke. Pero, ¿bin ya skʼan ya jpastik swenta jich ya xkʼot ta pasel?

4, 5. ¿Bin-utʼil yakʼoj ta ilel Jehová te kʼuxotik ta yoʼtane?

⁴ Swenta spisil-ora ya kamigointik te Jehová ya skʼan ya jnaʼtik te mero kʼuxotik ta yoʼtane. Nopa awaʼiy te jayebto bintik spasoj ta jtojoltike. La yakʼbotik te Balumilal te jaʼ jun tʼujbil lugar te nojel ta tʼujbil teʼetik sok chambalametik. Jaʼnix jich la yakʼbotik bayal bujtsʼan weʼelil sok bayal jaʼ swenta ya jtuuntestik. Te Jehová jaʼnix jich yakʼojbotik ta naʼel ta Biblia bin sbiil sok bin yilel stalel. Pero te skʼuxul yoʼtan te kʼax chikanxan ta ilel ta jtojoltike, jaʼ te la stikun tal te sNichʼan yuʼun ya yakʼ sba ta lajel ta jtojoltik (Juan 3:16). Ta swenta-abi, ay bintik tʼujbil ya xjuʼ ya jmaliytik ta pajel chaʼbej.

⁵ Te Jehová la yakʼ jajchukix ta aʼtel te Wentainel yuʼun te Mesías ta chʼulchan. Te Wentainel ini, nopolme ya slajin spisil te wokolil sok ya skʼatpʼun ta nichimal kʼinal swolol te Balumilal te banti ya x-ayin lamalkʼinal kuʼuntik sok tseʼel koʼtantik ya xkuxinotik ta sbajtelkʼinal (Salmo 37:29). Yanxan te bin-utʼil ya yakʼ ta ilel skʼuxul yoʼtan te Jehová, jaʼ te ya yakʼ jnoptik bin ya skʼan ya jpastik yuʼun lek ya xkuxinotik. Jaʼnix jich ya yalbotik te yakuk jkʼopontike sok spisil-ora ya skʼan ya yaʼiy te jkʼoptike. Chikan ta ilel te jpisiltik kʼuxotik ta yoʼtan te Jehová ta smelelil.

6. ¿Bin ya xjuʼ ya apas yuʼun ya awakʼ ta ilel te ya awalbey wokol te Jehová te kʼuxat ta yoʼtane?

⁶ ¿Bin ya xjuʼ ya apas yuʼun ya awakʼ ta ilel te ya awalbey wokol te Jehová te kʼuxat ta yoʼtane? Jaʼ teme ay skʼoplal ta awoʼtan spisil te bin spasoj ta atojole. Mel-oʼtantik sba te jteb ma spisiluk te ants winiketik ta ora ini ma snaʼik yalel wokol, jichnix bitʼil ta skʼajkʼalel te Jesuse. Ta jun buelta te Jesús la slekubtes lajuntul winiketik te yichʼojik kʼaʼel chamel, pero jtulnax te machʼa albot wokol yuʼune (Lucas 17:12-17). Te joʼotike ya jkʼantik te jichukotik bitʼil te winik ini, te ya kakʼbeytik yil Jehová te bayal skʼoplal ta koʼtantik te bin spasoj ta jtojoltike.

7. ¿Bin-utʼil la yal Jesús te ya skʼan kʼux ta koʼtantik te Jehová?

 ⁷ Jaʼnix jich ya skʼan ya kakʼtik ta ilel te kʼux ta koʼtantik te Jehová. Te Jesús la yalbey te jnopojeletik te kʼuxuk ya yaʼiyik te Jehová sok spisil yoʼtanik, skuxlejalik sok spʼijilik (kʼopona Mateo 22:37). ¿Bin ya skʼan ya yal ini?

8, 9. ¿Bin-utʼil ya kakʼbeytik yil te Jehová te kʼux ta koʼtantike?

⁸ ¿Tikʼbal-a te ya kaltik te kʼux ta koʼtantik te Jehová? Maʼuk. Teme kʼux ta koʼtantik sok spisil koʼtantik, jkuxlejaltik sok jpʼijiltik, yame xchiknaj ta ilel sok yaʼtelul (Mateo 7:16-20). Te Biblia jamal ya yakʼ ta nopel te ya jchʼuunbeytik smantal te Jehová teme kʼux ta koʼtantike. ¿Wokolbal ta pasel-abi? Te Biblia ya yal te «ma ba wocol ta chʼuhunel te mandariletic» yuʼun te Jehová (kʼopona 1 Juan 5:3).

⁹ Te kʼalal ya jchʼuunbeytik skʼop te Jehová yame x-ayin stseʼelil koʼtantik sok ayme swentail ya xkʼot te jkuxlejaltike (Isaías 48:17, 18). Pero, ¿bin ya skoltayotik yuʼun spisil-ora ya kamigointik te Jehová? Akʼa kiltik.

10. ¿Bin yuʼun ma skʼan ya akom aba ta snaʼbeyel sba ta lek te Jehová?

¹⁰ Te kʼalal la anop te Biblia, jich la anaʼbey sba te Jehová sok jich la awamigoin, ¿mabal jichuk? Te yamigoinel te Jehová, jaʼ jich kʼoem bitʼil kʼajkʼ te ya skʼan akʼbeyel siʼul swenta ma xtupʼ. Teme ya akʼan ya awamigoin ta spisil-ora te Jehová, jaʼnixme jich ay bin ya skʼan ya apas, jaʼ te ma xa akom aba ta snaʼbeyel sba ta leke (Proverbios 2:1-5).

11. ¿Bin ya xkʼot ta pasel teme maba ya akom aba ta snopel te Bibliae?

¹¹ Teme maba ya akom aba ta snopel te Biblia ayme bayal bintik ya anop te ya xbajt stijbat awoʼtane. Ilawil bin-utʼil la yaʼiy sbaik chaʼtul jnopojeletik yuʼun Jesús kʼalal cholbot yaʼiyik bin swentail cheʼoxeb albilkʼopetik ta Biblia. Jich la yalik: «¿Ma bal ayuc yutsil cʼoht ta coʼtantic te cʼalal la scʼoponotic ta be soc te cʼalal la sjam caʼiytic te Shun Dios?» (Lucas 24:32).

12, 13. 1) Teme maba ya jkanantaytik te skʼuxul koʼtantik ta stojol te Jehová, ¿bin ya xjuʼ ya xkʼot ta pasel? 2) ¿Bin ya skʼan ya jpastik yuʼun spisil-ora kʼux ta koʼtantik te Jehová?

 ¹² Jich bitʼil te tijbot yoʼtanik te chaʼtul jnopojeletik te kʼalal la yichʼbeyik swentail te sJun Diose, bayalniwan yutsil la awaʼiy-euk te kʼalal kaj awichʼbey swentail te bin ya yal te Bibliae. Jich la anaʼbey sba te Jehová sok kʼux la awaʼiy ta awoʼtan. Ta melel, mananix ya akʼan-a te ya sikub te skʼuxul awoʼtan ta stojol te Jehovae (Mateo 24:12).

¹³ Jich bitʼil awamigoix te Jehová, ya skʼan te ya apas tulan yuʼun spisil-ora awamigoinej ta lek. Swenta jich ya xkʼot ta pasel ya skʼan ya anaʼbeyxan sba ta lek te Jehová sok te Jesuse. Jaʼnix jich ya skʼan ya anopilan ta awoʼtan te bin ya anop ta sKʼop Dios sok te bin-utʼil ya xjuʼ ya apas ta akuxlejal (Juan 17:3). Te kʼalal ya akʼopon o ya anop te Biblia, jichuk xa ajojkʼoybey aba: «¿Bin ya yakʼbon jnop ini ta stojol te Jehová? ¿Bin yuʼun ya skʼan te kʼux ta koʼtan te Jehová sok spisil koʼtan sok spisil jkuxlejal?» (1 Timoteo 4:15).

14. ¿Bin-utʼil ya skoltayotik te orasion swenta spisil-ora mero kʼux ta koʼtantik te Jehová?

 ¹⁴ Teme ay jtul awamigo, ¿mabal jichuk te spisil-ora ya xkʼopojat soke? Te kʼalal jich ya apase, lekxan ya awil abaik yuʼun. Teme spisil-ora jichnix ya jkʼopontik te Jehová yame kamigointik ta lek (kʼopona 1 Tesalonicenses 5:17). Te orasion jaʼ tʼujbil majtanil yakʼojbotik te jTatik ta chʼulchane. Yame skʼan te spisiluk-ora ya jkʼopontik yuʼun ya kalbeytik te bin ay ta koʼtantike (Salmo 62:8). Mame skʼan te jnopojtik ta memoria te bin ya kalbeytike, jaʼ ya skʼan ya kalbeytik te bin mero ya xlokʼ tal ta koʼtantike. Jich yuʼun teme maba ya jkom jbatik ta snopel te Biblia sok ta skʼoponel te Diose, spisilme-ora mero kʼux ta koʼtantik te Jehová.

15, 16. ¿Bin-utʼil ya skʼan ya awil te scholel skʼop Diose?

¹⁵ Swenta spisil-ora ya kamigointik te Jehová, jaʼnix jich yame skʼan ya kalbeytik yaʼiy yantik te bin schʼuunejix koʼtantike. Ta melel, bayal yutsil te ya jkoltaytik yantik ta snaʼbeyel sba te Jehová (Lucas 1:74, TNM). Ma jaʼuknax-abi, jaʼ jun aʼtelil te la yakʼ jilel te Jesús ta stojol te jnopojeletik yuʼune. Jich yuʼun yame skʼan ya kakʼbeytik snaʼ te ants winiketik te bintik kʼax tʼujbil ya xbajt spas te Wentainel yuʼun te Diose. ¿Jichbal yakatix ta spasel? (Mateo 24:14; 28:19, 20).

¹⁶ Te jpuk-kʼop Pablo kʼax bayal skʼoplal la yil te scholel skʼop Dios te jich la yil bitʼil «cʼuhlejalil» (2 Corintios 4:7). Te aʼtelil te mukʼxan skʼoplal ya xjuʼ ya apase, jaʼ te ya akoltay yantik ta snaʼel machʼa-a te Jehová sok bin-a te skʼanojel yoʼtane. Te kʼalal ya achol skʼop Dios yakatme ta abatinel ta stojol te Jehová sok bayalme skʼoplal ta yoʼtan te jich ya apase (Hebreos 6:10). Te kʼalal ya acholbey skʼop Dios te yantike, jichme ya akoltaylan yuʼun ya yamigoinik te Dios sok jich ya xnoptsajatxan ta stojol-euk te Jehovae. Ta spasel te aʼtelil ini yame xjuʼ ya ata akuxlejal ta sbajtelkʼinal soknix te machʼatik ya schʼuunik te bin ya acholbey yaʼiye (kʼopona 1 Corintios  15:58). ¿Aybal yan aʼtelil te ya xjuʼ ya yakʼbat bayal sbujtsʼ awoʼtane?

17. ¿Bin yuʼun ya skʼan te ya kaʼtelintik te scholel skʼop Diose?

¹⁷ Bayalme skʼoplal te ya kaʼtelintik scholel te skʼop Dios ta ora ini. Te Biblia jich ya yal: «Hala te scʼop Dios, aʼtelina spasel ta yorahil o teme ma yorahiluc» (2 Timoteo 4:2). Tulan skʼoplal te yakuk kakʼbeytik snaʼ te ants winiketik te lek yachʼil kʼop yuʼun te Wentainel yuʼun te Diose. Jaʼnix jich te Biblia ya yal te «¡nopolix te smucʼul cʼahcʼalel yuʼun Jehová!» sok te animal yak ta talele. Te slajibal «ma ba ya xhalaj» (Sofonías 1:14; Habacuc 2:3). Nopolme ya slajinix Jehová te chopol balumilal yuʼun te Satanase. Jich bitʼil te mato xkʼot ta pasele, akʼa kalbeytik yaʼiy te ants winiketik te jaʼuk ya yakʼ sbaik ta abatinel ta stojol te Jehovae.

18. ¿Bin yuʼun ya skʼan ya jtsob jbatik ta yichʼel ta mukʼ te Jehovae?

¹⁸ Jich bitʼil te smelelil j-abatotik yuʼun te Jehová ya skʼanbotik te ya jtsob jbatik ta yichʼel ta mukʼe. Te Biblia jich ya yal: «Acʼa jnoptic bin utʼil talel cʼaxel ya juc jbahtic ta cʼuxultaywanej soc ta spasel lequil aʼteliletic, ma me jquehchantic te ya jtsobilan jbahtic, hich te bin utʼil ay cʼahyemic ta spasel, talel cʼaxel acʼa jtsits jbahtic; soc cʼaxuc hich ay scʼoblal awuʼunic a, te bin utʼil yac awilic te yac ta talel te yorahil ya xtal te Cajwaltique» (Hebreos 10:24, 25). Jich yuʼun akʼa jpastik tulan yuʼun maba ya jchʼaytik ni junuk tsoblej. Kʼalal ya xbootik ta tsoblejetik talel kʼaxel ya kakʼbey jbatik smukʼul koʼtantik sok yip koʼtantik tey-a.

19. ¿Bin ya skoltayotik yuʼun kʼux ta koʼtantik te ermanoetike?

¹⁹ Te kʼalal ya xbaat ta tsoblejetik yame ata lekil awamigotak. Jaʼme ya skoltayatik ta abatinel ta stojol te Jehová. Yame anaʼbey sba ermanoetik te yanyantik stalelik sok te yanyantik bin kʼaxem ta skuxlejalik te jaʼnix jich yakik ta spasel tulan ta abatinel ta stojol te Jehová. Pero mame xchʼay ta awoʼtan te jmulawiletik-euke, jich yuʼun yame xchʼayik-euk. Te kʼalal jich ya xkʼot ta pasele, naʼame spasel perdon (kʼopona  Colosenses 3:13). Pasa tulan te jaʼuk ya xbajt ta awoʼtan yilel te lekil taleliletik yuʼun te ermanoetike. Teme jich ya apase, jaʼme ya skoltayat yuʼun kʼux ta awoʼtan te ermanoetik sok yame awamigoinxan ta lek te Jehovae.

20, 21. ¿Bin-a te smelelil kuxlejalile?

²⁰ Te Jehová jaʼ ya skʼan te bayaluk yutsil skuxlejal te yamigotake. Te Biblia ya yal te ya xjelon ta jkʼaxel te kuxlejalil ta pajel chaʼbej, jkʼaxel ma jichukix bitʼil ta ora ini.

²¹ Ta pajel chaʼbej ya xbajt kuxinukotik ta sbajtelkʼinal, ma jaʼuknax 70 ni 80 jaʼbil. Yame jmulanbeytik yutsil te ya xkuxinotik ta sbajtelkʼinal ta tʼujbil nichimal kʼinal te banti ya x-ayin lamalkʼinal, tseʼel-oʼtanil sok jkʼaxel ma stsakotikix chamel. Jaʼ te smelelil kuxlejalil ya yal te Bibliae. Te Jehová jamal yaloj te ya skʼan ya yakʼbotik te smelelil kuxlejalile, joʼotikxanix ay ta jwentatik spasel tulan ta stael (1 Timoteo 6:12, 19).

22. 1) ¿Bin ya skʼan ya jpastik yuʼun ya jtatik te smelelil kuxlejalile? 2) ¿Bin yuʼun ma xjuʼ ya jtatik te kuxlejalil ta sbajtelkʼinal ta swentanax kaʼteltik?

²² ¿Bin ya skʼan ya jpastik yuʼun ya jtatik te smelelil kuxlejalile? Ya skʼan ya jpastik «te bin lec» sok te jaʼuk jkʼulejaltik «te lequil aʼteliletic» (1 Timoteo 6:18). Te bin ya skʼan ya yal ini, jaʼ te ya jpas ta jkuxlejaltik te bin ya jnoptik ta Bibliae. Manchukme tulan ya x-aʼtejotik ta stael te kuxlejalil ta sbajtelkʼinale, ma xjuʼ kuʼuntik smanel ta swenta te kaʼteltike. Jaʼnax ta swenta «yutsil yoʼtan» te Jehová ya yakʼbey ta majtanil te j-abatetik yuʼun te jun yoʼtanik ta stojole (Romanos 5:15). Te jTatik Dios ta chʼulchan yuʼun-nix ya skʼan ya yakʼbey-a te j-abatetik yuʼun te tʼujbil majtanil ini.

23. ¿Bin yuʼun tulan skʼoplal te ya apas ta ora ini te bin ya smulan te Diose?

²³ Ta ora ini yame skʼan te jich ya ajojkʼoybey aba: «¿Yakonbal ta yichʼel ta mukʼ te Dios jich bitʼil ya smulan stukele?». Teme ya ata ta ilel te ay bintik ya skʼan ya ajel ta akuxlejale, pasame ta oranax. Te kʼalal ya smukʼulin koʼtantik te Jehová sok ya jpastik tulan yuʼun ya jchʼuunbeytik te skʼope, jaʼ anibal  ya xkʼot kuʼuntik. Ta slajibal kʼajkʼal yuʼun te chopol balumilal ini, te Jehová yame skanantay te j-abatetik yuʼune. Ta patil, yame yakʼ xkuxinotik ta Nichimal Kʼinal ta sbajtelkʼinal, jich bitʼil yaloj ta jamal. Teme ya apas ta akuxlejal ta ora ini te bin ya smulan te Diose, yame xkuxinat ta sbajtelkʼinal.