¿Yabal amulan te ya xkuxinat ta sbajtʼel kʼinale? Bayal ants winiketik yaniwan yalik te yake, jaʼukmeto yaniwan yalik te ma xpastaje. Ya yalik te yuʼun-nanix jich stalel-a te ya xlajotike sok te tey ya xlaj skʼoplal-a te jkuxlejaltike.

Jaʼukmeto teme ya jeltik te jojkʼoyele, ¿yabal akʼan te ya xlajat ta ora ini? Teme lek ay te jkuxlejaltike maba jkʼan ya xlajotik. Manchukme ay bayal jwokoltik jpisiltik ya jkʼan ya xkuxinotik. Te Biblia ya yal: «La yaʼbe snaʼ ta yoʼtan te ants-winiquetic te bintic scuenta sbahtel qʼuinal» (Eclesiastés 3:11). Jaʼ yuʼun-abi, te Dios la spas te ants winiketik yuʼun ya smulanik te kuxlejalile.

Ta melel, yuʼun-nix ma jaluk-a te jkuxlejaltike. Jaʼ yuʼun, ¿bin-a te maba lek kʼot ta pasele? ¿Aybal bin spasoj Dios yuʼun ya schajpan te kʼope? Te sujtib ya yakʼ te Biblia ya yakʼ smukʼul kʼinal kaʼiytik, melel jaʼ swenta te kʼax swokol sok laj te Jesuse.

Te sbabial kʼalal ta yoxebal kapitulo yuʼun te sjun Génesis ya scholbey skʼoplal te bitʼil la yichʼik japbeyel yuʼun Dios te sbabial ants winik te ya xjuʼ xkuxinik ta sbajtʼel kʼinale, sok la yichʼik albeyel te bin ya skʼan ya spasik yuʼun jich maba ya xlajik. Jaʼnix jich ya scholbey skʼoplal te bitʼil chʼay yuʼunik te kuxlejalil-abi ta skaj te la skʼaxuntaybeyik smantal te Diose. Maba chujkʼul te bitʼil ya scholbey skʼoplale, jaʼ yuʼun ay machʼatik ya skuyik te tojol aʼiyejetiknaxe. Jaʼukmeto jich bitʼil te libroetik yuʼun Evangelio, te bin ay ta sjun Génesis yichʼoj spisil te bintik tsʼibaybil ta namey te ya xjuʼ ya schʼuun koʼtantike. *

¿Bintik wokolil chiknaj ta skaj te la skʼaxuntay mantal te Adane? Te Biblia ya yakʼbey sujtib: «Ha yuʼun hich te bin utʼil och mulil ta bahlumilal ta scuenta jtuhl winic [Adán] soc te och lajel ta scuenta mulil, hich cʼoht lajel ta stojol spisil ants-winiquetic ta scaj te spisilic stahoj smulic» (Romanos 5:12). Te Adán la sta smul te kʼalal la skʼaxuntay mantal. Jich la schʼay te kuxlejalil sbajtʼel kʼinale, kʼunkʼun meʼel mamalub, ta patil laj bael. Ta skaj te jaʼ jtsʼumbaltike jpisiltik jmulawilotik. Ta swenta-abi, ya stsakotik chamel, ya xmeʼel mamalubotik sok ya xlajotik. Ta kʼajkʼal ini, jaʼ pajal te bitʼil ya yichʼ cholbeyel skʼoplal ta swenta te ay bin kichʼojtikix tal te kʼalal  ya x-ayinotike. Akʼa kiltik te bin-utʼil la yakʼbey schajpajibal Dios te wokolil jtaojtike.

Te Jehová ay bin la spas yuʼun ya yichʼ tael yan buelta te bin la schʼay te Adane sok ya schaʼyichʼ akʼbeyel skuxlejal sbajtʼel kʼinal te stsʼumbale. ¿Bin-utʼil la spas?

Te Biblia ya yal: «Como te stojol te mulil, ha te lajele» (Romanos 6:23). Jaʼ yuʼun ya xjuʼ ya kaltik te ya xlajotik ta skaj te mulile. Laj te Adán ta skaj te smule. Jichnix-euk te joʼotike ya xlajotik ta skaj te mulile. Jaʼukmeto ta swenta te bitʼil ma jaʼuk jmultik te jmulawil ayinotike, te Diose la snaʼ yoʼbolil jbatik jaʼ yuʼun la stikun tal te sNichʼan, jaʼ te Jesucristo yuʼun tal «stojbotik» te jmultike. ¿Bin-utʼil la stoj?

Ta skaj te la skʼaxuntay mantal te Adán te tojil winik-ae, la skʼasesbey jilel te mulil sok te lajel spisil te ants winiketike, jaʼ yuʼun la skʼan te ayuk yan tojil winik te ya schʼuun mantal jaʼto te kʼalal ya xlaj swenta ya stojbotik te jmultike. Te Biblia jich ya scholbey skʼoplal ini: «Hich te bin utʼil ta scuenta te la scʼaxuntay mandar te jtuhl winic te hich jmulawiletic cʼoht spisilic, ha nix hich ta scuenta schʼuhunel mandar te jtuhl winic te tsobolic ya xʼilotic te toj ayique» (Romanos 5:19). Te «jtul winik» ya yalbey skʼoplale, jaʼ te Jesús te la yijkʼitay jilel te chʼulchane, jaʼ tojil winik * te laj ta jwentatike. Jaʼme ya yakʼ te toj ya xkʼootik ta sit te Dios sok jich ya xjuʼ ya jtatik te kuxlejalil ta sbajtʼel kʼinale.

¿Bin yuʼun te puersa la skʼan yakʼ sba ta lajel te Jesús swenta jich ya jtatik-a te kuxlejalil-abi? ¿Mabal juʼuk yuʼun Dios te lajuk yakʼ jun mantalil te ya xjuʼ xkuxinik sbajtʼel kʼinal te stsʼumbal Adane? Manchukme ya xjuʼ yuʼun spasel-abi, jaʼukmeto te jichuk la spase jaʼnix la skʼaxuntay te smantal te banti la yal te jaʼ stojol mulil te lajele. Sok ma jaʼuk jun mantalil te ya xjuʼ ta lajinbeyel skʼoplal o te ya xjuʼ ta jeltayel te kʼalal ya skʼan koʼtantike. Jaʼ jun mantalil te mukʼ skʼoplal yuʼun jich ya yichʼ akʼel ta ilel te bin stojil ta pasele (Salmo 37:28).

Te lajuk slajinbey skʼoplal te bin stojil ta pasel te Diose, ma xnaʼbaj teme yato spasxan te bin stojil ta pasel te jichuke. Jich bitʼil, ¿labal yakʼ ta ilel stojil yoʼtan te lajuk stsa te machʼatik stsʼumbal Adán te ya  xkuxinik ta sbajtʼel kʼinale? ¿Labal skʼotes ta pasel spisil te bintik yaloj ta jamale? Te bitʼil la skʼotes ta pasel Dios te mantalil te jaʼnix yakʼoj ta swenta jkoleltike, ya xjuʼ ya jnaʼtik te spisil-ora jaʼ ya spas te bintik stojile.

Te bitʼil la yakʼ sba ta lajel te Jesuse, jaʼ la skʼan Dios te yakuk xjuʼ xkuxin yan buelta te ants winiketik ta nichimal kʼinal. Te Jesucristo jaʼnix la yal: «Como hich cʼux ta yoʼtan Dios te bahlumilal te la sticon tal te hip jtuhl Snichʼan, scuenta yuʼun spisil te machʼatic ya schʼuhunic ma ba ya xchʼayic, ay scuxlejalic sbahtel qʼuinal yuʼun» (Juan 3:16). Te slajel te Jesuse, ma jaʼuknax ya yakʼ ta ilel stojil yoʼtan te Diose soknix la yakʼ ta ilel te skʼuxul yoʼtan ta jtojoltike.

Jaʼukmeto mato kakʼojbeytik sujtib te jojkʼoyel ini: ¿Bin yuʼun te kʼax swokol sok te xiʼbantik sba te bitʼil la yichʼ milel te Jesuse? Te bitʼil jun yoʼtan la schʼuunbey smantal te Dios jaʼto te kʼalal laje, la yakʼ ta ilel te lotil te bin la yal te Pukuj te maba jun yoʼtan ya yakʼ sbaik ta stojol Dios te ants winiketik te kʼalal ya xtal wokolil ta stojolike (Job 2:4, 5). Te kʼalal juʼ yuʼun sloʼlayel te sbabial winike, jich yilel te smelelil te bin la yal te Pukuje. Te Jesuse tojil winik-euk, jaʼukmeto la schʼuunbey smantal te Dios manchukme la sta tulan wokolil (1 Corintios 15:45). Jich la yakʼ ta ilel te lajuk schʼuunbey smantal Dios-euk te Adane, juʼ yuʼun te jichuke. Jaʼnix jich la yakʼ jilel kiltik te ya xjuʼ kuʼuntik stʼunbeyel stalel te Jesuse (1 Pedro 2:21). Te Dios la smajtʼantes te sNichʼan ta skaj te la schʼuun mantal te kʼalal la yakʼbey skuxlejal ta chʼulchan te maʼyuk bin ora ya xlaj.

Yuʼun-nix kʼot ta pasel-a te slajel te Jesuse jich jam jilel sbelal te kuxlejalil ta sbajtʼel kʼinale. Jaʼ yuʼun ya jchaʼjojkʼoytik: ¿Yabal amulan te ya xkuxinat ta sbajtʼel kʼinale? Te Jesús jich la yal jilel te bin ya skʼan ya jpastik yuʼune: «Hich ay te cuxlejal sbahtel qʼuinal: ha te ya snaʼbat aba, te haʼat mero Diosat atuquel, soc te ya snaʼbe sba te Jesucristo te ticombil tal awuʼune» (Juan 17:3).

Te machʼatik ya spasik te revista ini, ya stijbat awoʼtan te ya anaʼbey sba te Jehová te smelelil Dios soknix te sNichʼan, jaʼ te Jesucristoe. Te stestigotak Jehová te ay ta alumal sok stseʼelil yoʼtanik ya skoltayat. Jaʼnix jich yame atabeyxan skʼoplal ta pajina kuʼunkotik ta Internet ta jw.org.