1. ¿Bin yuʼun jaʼnax te Jehová ya skʼan ichʼel ta mukʼe?

JAʼNAX te Jehová te machʼa ya skʼan ichʼel ta mukʼ, melel jaʼ la spasotik sok jaʼ la yakʼbotik jkuxlejaltik (Apoc. 4:11). Manchukme kʼux ta koʼtantik sok ay skʼoplal ta koʼtantik te Jehová, ay bintik ya yikʼ koʼtantik spasel te jich ya smakotik yuʼun jaʼnax stukel ya kichʼtik ta mukʼ. Swenta ma jichuk ya jpastik, ya skʼan ya xkʼot ta koʼtantik bin-utʼil ya xkʼot ta pasel ini. Pero ta nail, kiltik bintik smakojbey skʼoplal te jaʼnax stukel ya kichʼtik ta mukʼ te Diose.

2. Jich bitʼil ya yal Mateo 4:10, ¿bin ma jpastik teme jaʼnax stukel ya kichʼtik ta mukʼ te Jehovae?

² Te Biblia ya yal te snitojbey sba skʼoplal te skʼuxul koʼtantik ta stojol Jehová sok te jaʼnax stukel ya kichʼtik ta mukʼe. Ma xkakʼtik te ay machʼa o ay bintik ya smakotik ta yakʼbeyel yil te skʼuxul koʼtantike (kʼopona Mateo 4:10).

3. ¿Bin skoltayojotik swenta jaʼnax ya kichʼtik ta mukʼ te Jehovae?

³ Te bintik jnopojtik ta stojol te Jehová jaʼ skoltayojotik yuʼun jaʼnax ya kichʼtik ta mukʼ. Kʼax tʼujbil ya kiltik te taleliletik yuʼune. Ya jnaʼtik te bin ya smulan sok te bin ma smulane sok ay skʼoplal ta koʼtantik. Kʼoem ta koʼtantik te bin-a te skʼanojel yoʼtan ta jtojoltike sok ay skʼoplal ya kiltik kʼalal ya jpas ta jkuxlejaltik te smantale. Kʼax lek ya kaʼiy jbatik yuʼun te ya yakʼ kamigoin jbatik soke (Sal. 25:14). Spisil te bin ya jnoptik ta stojol te Jpaswanej kuʼuntike ya skoltayotik yuʼun ya xnoptsajotikxan ta stojol (Sant. 4:8).

4. 1) ¿Bin ya stuuntes te Satanás swenta ya smakotik te jaʼnax ya kichʼtik ta mukʼ te Jehovae? 2) ¿Bin ya kiltik ta artikulo ini?

⁴ Te Satanás jaʼ ajwalil yuʼun te balumilal ini sok ya stuuntes swenta jaʼuk ya jmulantik spasel te bintik ya skʼan koʼtantike  (Efes. 2:1-3; 1 Juan 5:19). Jaʼ ya skʼan te yan bintik kʼux ta koʼtantik swenta ma jaʼuknax kʼux ta koʼtantik te Jehovae. Ya kiltik chaʼchajp te bin ya stuuntese. Sbabial, ya stij koʼtantik ta sleel kʼulejalil. Schebal, ya sle bin ya spas swenta jaʼuk ya jtsatik te bin chopol ya jkʼasestik kʼajkʼal-ae.

5. ¿Bin yuʼun ya skʼan ya jtsajtay jbatik te manchuk ya xbikʼtaj koʼtantik yuʼun te takʼine?

⁵ Ta jpisiltik ya jkʼantik te ayuk jweʼeltik, jkʼuʼ jpakʼtik sok te lekuk te banti ya xnainotike. Pero ya skʼan ya jtsajtay jbatik te manchuk ya xbikʼtaj koʼtantik yuʼun te takʼine. Ta kʼajkʼal ini, bayal ants winiketik «xbiqʼuet ta yoʼtanic taqʼuin» sok te bintik ya xjuʼ ya smanik-ae (2 Tim. 3:2). Te Jesús snaʼoj-a te ya xjuʼ xchʼaybot yoʼtanik te jnopojeletik teme jich ya spasike, jaʼ yuʼun jich la yal: «Mayuc machʼa ya xhuʼ ya yacʼ sba ta aʼbatinel yuʼun cheb ajwaliletic; como ya me yihlay te jtuhle soc cʼux ta yoʼtan te yane, o jun yoʼtan ta stojol te jtuhle, soc ya spʼaj te yane. Ha nix hich, ma xhuʼ yac awacʼ abahic ta aʼbatinel yuʼun Dios soc yuʼun te cʼuhlejalile» (Mat. 6:24). Te machʼa yichʼoj ta mukʼ te Dios, pero jaʼnix jich ya spas tulan ta sleel te kʼulejalile, jich kʼoem te yak ta abatinel ta stojol chaʼtul ajwalil. Ma jaʼuknax yak ta yichʼel ta mukʼ te Jehová.

6. ¿Bin ya yakʼ jnoptik te bin la yalbey Jesús te kongregasion ta Laodicea?

⁶ Ta slajibalix bael te sbabial siglo, te jchʼuunjeletik ta kongregasion ta Laodicea, la stoy sbaik yuʼun te ay skʼulejalike, ta melel yuʼun-nix kʼulejik-a sok ay yuʼunik spisil te bin ya xtuun yuʼunike. Pero ta sit te Jehová sok te Jesús maʼyuk bin ay yuʼunik, kʼux oʼbol sbaik, pobreik sok maʼyuk skʼuʼ spakʼik. Te Jesús maba la yakʼbey tsitsel yuʼun te ay skʼulejalike, jaʼ ta swenta te yak ta pejkʼajel te schʼuunel yoʼtanik ta stojol te Jehová ta skaj  te kʼux ta yoʼtanik te skʼulejalike (Apoc. 3:14-17). Teme ya kaʼiytik te ya xjajch ta chʼiel ta koʼtantik te sleel kʼulejalile ya skʼan ya jlokʼestik ta oranax (1 Tim. 6:7, 8). Teme ma jichuk ya jpastike, maba jun koʼtantik ta stojol te Jehová sok maba ya yichʼ ta wenta te bitʼil ya kichʼtik ta mukʼe, melel te Biblia jich ya yal: «Cʼux me xawaʼiy ta awoʼtan te Cajwaltic Dios ta spisil awoʼtan» (Mar. 12:30). ¿Binwan ya yakʼ te jaʼ ya xbajt ta koʼtantik te takʼine?

7-9. ¿Bin ya yakʼ jnoptik te bin kʼax ta stojol jtul ansiano te David sbiile?

⁷ Kiltik te bin kʼot ta stojol jtul ansiano te David sbiil te ay ta Estados Unidos. Jaʼnix ya yal te ya snaʼ spasel ta lek te yaʼtele. Ta empresa te banti yak ta aʼtel-ae, la yichʼ toybeyelxan te yaʼtele sok la yichʼ naʼbeyel sba ta lek ta skaj te ya snaʼ spasel ta lek te yaʼtele. Jich ya yal: «La jnop te jaʼ bendision yuʼun Jehová te bitʼil la stoybonik te kaʼtele». Pero, ¿jichnixbal-a?

⁸ Te David la yil te kaj ta pejkʼajel te schʼuunel yoʼtan ta skaj te yaʼtele. Jich ya schol: «Te kʼalal ayon ta tsoblejetik sok ta scholel skʼop Dios baem jpensar ta kaʼtel. Bayal ya jpas ganar-a, pero tenbil ya kaʼiy jba-a sok jajch kʼop kuʼun sok te kiname».

⁹ Te David la sta ta ilel te ya skʼan ya yil ta lek bin-a te mukʼ skʼoplal ta yoʼtane. Jich ya yal: «La kakʼ ta koʼtan te ya jeltay te bin ya jpase». Jich yuʼun la snop te ya sjeltay te jayeb ora ya x-aʼteje, patil la yalbey te spatrone, pero lokʼesot ta yaʼtel. ¿Bin la spasix-a? Jich ya schol: «Ta yan kʼajkʼal-abi, la jnojes jsolisitud yuʼun ya x-ochon ta prekursor auksiliar». Swenta ya staik te bin ya xtuun yuʼunike, kaj ta aʼtel sok te yinam ta skusel naetik. Ta patil, te David och ta prekursor regular, ta patilxan bael och ta prekursora-euk te yiname. La staik jun aʼtelil te maʼyuk machʼa ya smulane, pero ma jaʼuk mukʼ skʼoplal ta yoʼtanik-abi. Manchukme jtebnax  ya spasik ganar, spisil-ora ay yuʼunik te bin ya xtuun yuʼunike. Jaʼ ya skʼanik te jaʼuk mukʼ skʼoplal ya xkʼot ta skuxlejalik te Jehová sok yilojik te spisil-ora ya skanantay te machʼa jaʼ nail ya yakʼ ta skuxlejal te Wentainel yuʼune (Mat. 6:31-33).

10. ¿Bin-utʼil ya xjuʼ ya jkanantaytik te koʼtantike?

¹⁰ Chikan teme ay o maʼyuk lek jtakʼintik, ya skʼan ya jkanantaytik te koʼtantike. ¿Bin-utʼil? Jaʼ te manchuk ayuk sbikʼtal koʼtantik yuʼun te kʼulejalil sok te ma jaʼuk mukʼxan skʼoplal kuʼuntik te kaʼteltik te bitʼil te abatinel ta stojol te Jehovae. Swenta ya jnaʼtik bin yilel ay te koʼtantike, jojkʼoybey jbatik ini: «¿Jaʼbal baem ta koʼtan te kaʼtel kʼalal ayon ta tsoblej o ta scholel skʼop Dios? ¿Spisilbal-ora ya jmel koʼtan yuʼun te takʼin ya xtuun kuʼun ta pajel chaʼbeje? ¿Aybal kʼop kuʼun sok te joy ta skaj te takʼin sok te biluketike? ¿Yabal jpas jun aʼtelil te ma smulanik spasel yantik yuʼun jich ya xjuʼ ya jpasbeyxan yaʼtel te Jehovae?» (1 Tim. 6:9-12). Kʼalal ya jpasbey jbatik te jojkʼoyeletik ini, akʼa juluk ta koʼtantik te kʼuxotik ta yoʼtan te Jehová sok te ay bin lek ya yalbey te machʼatik jun yoʼtan ya x-abatinik ta stojole: «Ma jaymehl ya jpihtesat; mayuc bin ora ya quihquitayat». Jaʼ yuʼun te jpuk-kʼop Pablo la yakʼ te tsitsel ini: «Ma me xbaht ta awoʼtanic sbicʼsitayel taqʼuin» (Heb. 13:5, 6).

11. ¿Bin-utʼil ya xjuʼ ya yutsʼinotik te bintik ya jkʼasestik kʼajkʼal-ae?

¹¹ Te Jehová ya skʼan te yakuk jmulanbeytik yutsil te jkuxlejaltik, te bintik ya jkʼasestik kʼajkʼal-ae ya xjuʼ ya skoltayotik ta stael-abi. Te Biblia ya yal te «mayuc bin yan xan lec ya spas te winic, ha nax te ya xweʼ ya xʼuchʼ soc te ya yaʼiybe yutsil te yaʼtele» (Ecl. 2:24). Pero jteb ma spisiluk te bintik ya skʼasesik kʼajkʼal-a te ants winiketik ya x-utsʼinwan, melel ya sjin te lekil talelile, ya stijbey yoʼtan te ants winiketik ta spasel te bintik chopol sok te lekuk ya yilik te bintik ma smulan te Diose.

12. Jich bitʼil ya yal 1 Corintios 10:21, 22, ¿bin yuʼun ya skʼan ya jtsatik ta lek te bin ya jkʼasestik kʼajkʼal-ae?

¹² Te bin ya jkʼantike, jaʼ te jaʼnax ya kichʼtik ta mukʼ te Jehová, jaʼ yuʼun ma xjuʼ ya xweʼotik ta «smesa te Cajwaltic soc ta smesa te pucujetique» (kʼopona 1 Corintios 10:21, 22). Te kʼalal ay machʼa jun ya xweʼotik soke ya yakʼ ta naʼel te jaʼ kamigo jbatik soke. Teme jaʼ ya jkʼasestik kʼajkʼal-a te bintik ya yakʼ ta ilel majtamba, espiritismo, spasel mulil o yantikxan te bintik ya smulan spasel te bakʼetalile, jich kʼoem te jun yakotik ta weʼel sok te skontratak  te Dios soknix te ya jweʼtik te bintik chajpanbil yuʼunike. Teme jich ya jpastike, joʼotiknix ya kutsʼin jbatik sok ya kutsʼintik te bitʼil kamigoinejtik te Jehovae.

13, 14. 1) ¿Bin-utʼil ya xjuʼ ya jpajbeytik skʼoplal te bin ya jkʼasestik kʼajkʼal-ae sok te weʼelile? 2) Jich bitʼil ya yal Santiago 1:14, 15, ¿bin yuʼun ma skʼan ya kakʼtik ochel ta joltik te bintik chopole?

¹³ ¿Bin-utʼil ya xjuʼ ya jpajbeytik skʼoplal te bin ya jkʼasestik kʼajkʼal-ae sok te weʼelile? Te kʼalal ya xweʼotike, ya jtsajtaytik ta lek te bin ya kotses ta ketike. Pero te kʼalal la jbikʼtikix koel-ae ya xkaj ta aʼtel ta jbakʼetaltik. Teme lek te bin ya jweʼtik maba ya stsakotik chamel, pero teme ma leke ya stsakotik chamel. Manchukme ma xyutsʼinotik ta oranax, ya yutsʼinotik ta patil.

¹⁴ Jaʼnix jich te kʼalal ya jtsatik te bin ya jkʼasestik kʼajkʼal-ae, ya jtsajtaytik te bin ya kakʼtik ochel ta joltike. Ta patil ya xkaj ta aʼtel ta jpensartik sok ta swenta te bin yaʼiyel ya kaʼiy jbatike. Teme lek te bin ya jkʼasestik kʼajkʼal-ae lek ya kaʼiy jbatik yuʼun, yan teme chopole yame yutsʼin te schʼuunel koʼtantike (kʼopona Santiago 1:14, 15). Maniwan ya xchiknaj ta ilel ta ora te ya yutsʼinotike, pero ya xchiknaj ta patil. Jaʼ yuʼun te Biblia jich ya yalbotik: «Ma me xaloʼloy abahic, Dios ma xhuʼ ta labanel, como spisil te bin ya stsʼun te winique, ha nix sit ya stsob. Te machʼa ya stsʼun ta scuenta spocoʼ-talel, ha nix ya stsobe sit te spocoʼ-talel te ya xjinawane» (Gál. 6:7, 8). Jaʼ yuʼun ya skʼan ya jpʼajtik ta jkʼaxel te bintik ya jkʼasestik kʼajkʼal-a teme ay bin chopol yichʼoj te ya yilay te Jehovae (Sal. 97:10).

15. ¿Bin majtanil yakʼojbotik te Jehovae?

¹⁵ Bayal j-abatetik yuʼun Jehová ya smulanik yilel te JW Broadcasting^®. Jtul ermana te Marilyn sbiil jich la yal: «Te Broadcasting skoltayejon swenta spisil-ora tseʼel koʼtan, maba puersa ya jtsa te bin ya kile, melel lek ta ilel spisil. Kʼalal chebajem koʼtan o jtukel ya kaʼiy jba, te diskursoetik o te yichʼel ta mukʼ Dios ta jujun sab te ya spasik ta Betele yakʼojbon smukʼul koʼtan. Jich nopolxan ya kaʼiy jba ta stojol te Jehová sok te organisasion yuʼune. Te JW Broadcasting, la sjeltaybon ta jkʼaxel te jkuxlejale». ¿Yakotikbal ta stuuntesel ta lek te majtanil ini te jaʼ yakʼojbotik te Jehovae? Ma jaʼuknax ya xjuʼ ya kiltik te programa te ya xlokʼ ta jujun ue, ya xjuʼ ya kiltik bideoetik ta biluk-ora, ya kaʼiytik grabasionetik ta audio sok te tʼujbil kʼayojiletik te ya yakʼ yip koʼtantike.

16, 17. 1) ¿Bin yuʼun ya skʼan ya jtsajtaytik te jayeb tiempo ya kakʼbeytik te bintik ya jkʼasestik kʼajkʼal-ae? 2) ¿Bin-utʼil ya xjuʼ ya jpastik?

¹⁶ Ma jaʼuknax ya skʼan ya jtsajtaytik te bin ya jkʼasestik kʼajkʼal-ae, jaʼnix jich ya skʼan ya jtsajtaytik te jayeb tiempo ya kakʼbeytike, teme maʼuke ya xjuʼ te jaʼ bayalxan tiempo ya kakʼbeytik te bitʼil spasbeyel yaʼtel te Jehovae. Bayal machʼatik tulan ya yaʼiyik spasel. Jtul ermana te Abigail sbiil te 18 yaʼbilal jich ya yal: «Te kʼalal lujbenon yuʼun te kaʼtele, leknax ya kaʼiy jba te ya xnajkajon ta yilel telebision. Teme maba ya jtsajtay jbae ya xjuʼ bayal ora ya xkʼax kuʼun ta telebision». Jtul jchʼiel kerem te Samuel sbiil jich ya yal: «Ay baeltik ya kiltiklan bideoetik ta Internet te komiknaxe. Kʼalal ya xlaj jun bideo ya kil yan, te kʼalal ya kile jalajonix ta yilel oxeb o chaneb ora».

¹⁷ ¿Bin-utʼil ya xjuʼ ya jtsajtaytik te jayeb tiempo ya kakʼbeytik te bintik ya jkʼasestik kʼajkʼal-ae? Nail ya skʼan ya kiltik jayeb tiempo ya kakʼbeytik. Ya xjuʼ ya jtsʼibaytik ta jun kalendario te jayeb ora ya xkʼax kuʼuntik ta jun semana ta yilel telebision, ta Internet o bideojuegoetik ta selular o tablet. Teme la kiltik te bayal tiempo yakotik ta yakʼbeyele, ya skʼan ya jpastik jun programa. Jaʼ nail ya kakʼtik te bintik mukʼ skʼoplale, patil jtsʼibaytik jayeb  tiempo ya kakʼbeytik te bintik ya jkʼasestik kʼajkʼal-ae. Ta patil, akʼa jkʼanbeytik te Jehová te yakuk skoltayotik ta spasel te bin la jtsʼibaytike. Jichme ay jtiempotik sok kiptik ta spasel te estudio personal, yichʼel ta mukʼ Dios ta sjunal na, tsoblejetik, scholel skʼop Dios sok ta snojptesel te ants winiketike. Teme jich ya jpastike, lek ya kaʼiy jbatik te kʼalal ya kakʼbeytik jtebuk tiempo te bintik ya jkʼasestik kʼajkʼal-ae.

18, 19. ¿Bin-utʼil ya kakʼtik ta ilel te jaʼnax yakotik ta yichʼel ta mukʼ te Jehová?

¹⁸ Te kʼalal la stsʼibay te jpuk-kʼop Pedro ta swenta te slajibal te balumilal yuʼun Satanás sok ta swenta te achʼ balumilal ya xtale, jich la yal: «Quermanotac te cʼuxex ta coʼtan, te bin utʼil yaquex ta smahliyel ini, oʼtantayahic me te hichuc ya stahex a te Dios te mayuc awaʼbaquilic soc mayuc bin ya stijex ta cʼop yuʼun, soc te lamaluc qʼuinal» awuʼunik (2 Ped. 3:14). Kʼalal ya jchʼuuntik te tsitsel ini sok te ya jpastik ta jkuxlejaltik te bintik lek sok te lekuk ay te schʼuunel koʼtantik, jichme ya kakʼtik ta ilel te jaʼnax yakotik ta yichʼel ta mukʼ te Jehová.

¹⁹ Te Satanás sok te balumilal yuʼun yame spasikxan tulan swenta ma jaʼuk mukʼ skʼoplal ya xkʼot ta jkuxlejaltik te Jehovae (Luc. 4:13). Pero chikan te bin wokolil ya jsitintaytike, ma xkakʼtik te ay machʼa o ay bintik ya smakotik ta yakʼbeyel yil te skʼuxul koʼtantike. Kakʼoj ta koʼtantik te ya kakʼbeytik te bin snujpʼ ya yichʼ akʼbeyele, jaʼ te jaʼnax ya kichʼtik ta mukʼe.