TE MACHʼA ay yaʼtel ta yilel te ya xtal tulan yikʼal jaʼal, spisil-ora ya yil ta lek swenta ya snaʼ bin lugar ya xjuʼ sjin jilel. Ta swenta te ay skʼoplal ta yoʼtan te ants winiketike, ya yaltiklanbey kʼalal mato xkʼot-a te wokol swenta ya schajpan sbaik.

Jaʼnix jich te Jehová, yak ta yakʼbeyel snaʼ te ants winiketik te yak ta talel jun tulan wokol te jaʼ tulanxan-a te bitʼil tulan yikʼal jaʼale. ¿Bin-utʼil ya yakʼ ta naʼel? ¿Bin yuʼun ya jnaʼtik te ya yakʼbey tiempo te ants winiketik swenta ya schajpan sbaik? Swenta ya jnaʼtik, kiltik cheʼoxeb ejemplo te bitʼil la yakʼ ta naʼel ta namey te Jehovae.

Ta namey, te Jehová bayal buelta la yakʼ ta naʼel te ya yakʼbey kastigo te machʼatik yoloj ya skʼaxuntaybeyik te smantale (Prov. 10:25; Jer. 30:23). Te kʼalal la yakʼix ta naʼel-ae, ma orauknax la yakʼ tal te kastigoe, la yaltiklanbey bin ya skʼan ya spasik swenta lek ya x-ilotik yuʼun (2 Rey. 17:12-15; Neh. 9:29, 30). Swenta ya stijbey yoʼtan te ants winiketik ta sjeltayel te stalelike, te Dios bayal buelta la stuuntes te j-abatetik yuʼun swenta ya yaltiklanbey te kastigo ya yichʼik teme maba la sujtes yoʼtanik ta oranaxe (Amós 3:7).

Jtul j-abat te la stuuntes te Jehová, jaʼ te Noé. Ta bayal jaʼbil sok yip yoʼtan la yakʼbey snaʼ te chopol ants winiketik te ya xtal Pulemale (Gén. 6:9-13, 17). Jaʼnix jich la yaltiklanbey te bin ya skʼan ya spasik swenta ya xkolik. La spas tulan ta yakʼel ta naʼel, jaʼ yuʼun la yichʼ naʼbeyel sba te jaʼ la «yalbe scʼoblal te bin toj ta pasel» (2 Ped. 2:5).

Manchukme te Noé bayal buelta la yalbey te ants winiketike, maba la yakʼik ta ilel schʼuunel yoʼtanik, maba la schʼuunik te bin albotik yuʼun te Diose. Jaʼ yuʼun lajik te kʼalal «tal te puhlel» (Mat. 24:39; Heb. 11:7). Maba juʼ la yalik te maba la yichʼik albeyel yuʼun te Diose.

Ta yantikxan buelta, te Jehová la yalbey te ants winiketik te ya yichʼik kastigo kʼalal jtebxanix tiempo ya skʼan-ae. Pero la yakʼ tiempo swenta ya xjuʼ ya sujtes yoʼtanik. Jich la spas kʼalal la yakʼ tal te lajunchajp wokolil ta Egipto. Kiltik bin kʼot ta pasel ta sjukebal wokolil te jaʼ kʼalal la yakʼ tal te bate. Te Jehová la stikun te Moisés sok te Aarón ta yakʼbeyel snaʼ te Faraón sok te j-abatetik yuʼune. Te bitʼil junxanix kʼajkʼal ya skʼan ya yakʼ tal te bate, ¿aytobal tiempo yuʼun ya sle banti ya snakʼ sbaik? Te Biblia ya yal: «Te aʼbatetic yuʼun faraón te la xiʼic te scʼop Jehová la yotsesic ta na te aʼbatetic soc te chambahlametic yuʼunique. Pero te machʼa ma ba la yichʼic ta cuenta te scʼop Jehová, la yacʼ hiluc ta aquiltic te aʼbatetic soc te chambahlametic yuʼunique» (Éx. 9:18-21). Chikan ta ilel te la yakʼ tiempo te Dios swenta ya schajpan sbaik. Jich yuʼun, te machʼatik la schʼuunik kʼope maʼyuk bin chʼay yuʼunik.

Te Faraón sok te j-abatetik yuʼune, jaʼnix jich nail akʼbot snaʼik yuʼun Dios te slajunebal wokolile. Pero maba la schʼuunik (Éx. 4:22, 23). Jaʼ yuʼun laj te ba-alal yuʼunike. ¡Kʼax mel-oʼtantik sba! (Éx. 11:4-10; 12:29). ¿Akʼbotikbal tiempo swenta ya schajpan sbaik? Akʼbotik. ¿Bin-utʼil ya jnaʼtik? Te Moisés la yalbey te israeletik te ya xtal te wokolil-abi sok la yaltiklanbey bin ya skʼan ya spasik swenta ma xlajik-a te ba-alal yuʼunike (Éx. 12:21-28). ¿Jaytul la schʼuunik te kʼope? Ya yichʼ alel te oxeb millón ta tul ants winiketik kolik ta kastigo sok lokʼik tal ta Egipto.  Te israeletik te lokʼik tale, jaʼnix jich jokinbilik yuʼun bayal ta tul yantik ants winiketik sok egipsioetik (Éx. 12:38).

Jich bitʼil la kiltikixe, te Jehová spisil-ora la yakʼbey tiempo te ants winiketik swenta ya schajpan sbaik sok ya sjeltay te stalelike (Deut. 32:4). ¿Bin yuʼun te jich ya spas te Jehovae? Te jpuk-kʼop Pedro la yal te yuʼun «ma scʼan te ay machʼa chʼayel ya xbaht, ha ya scʼan te yacuc suhtes yoʼtanic spisilic» (2 Ped. 3:9). Yuʼun-nix jich-a, te Dios ay ta yoʼtan te ants winiketike. Jaʼ la skʼan te yakuk sujtes yoʼtanik sok te yakuk spas ta skuxlejalik te mantaliletik yuʼun kʼalal mato yakʼoj tal-a te kastigoe (Is. 48:17, 18; Rom. 2:4).

Jaʼnix jich ta ora ini, spisil te ants winiketik ya skʼan ya schʼam yaʼiyik te bin yak ta yalel te Dios ta swolol Balumilal. Kʼalal ay ta Balumilal-a te Jesuse, la yal te ya yichʼ lajinel te balumilal ini kʼalal ya xtal te tulan wokolile (Mat. 24:21). La yal jun albilkʼop banti la scholbey skʼoplal te bin ya staik ta ilel sok te bin ya xkʼax ta stojolik te jnopojeletik kʼalal nopol ya xtalix-a te tulan wokole. La yal te ay bintik chajpnax ya xkʼot ta pasel ta swolol Balumilal te yakotikix ta yilel ta ora ini (Mat. 24:3-12; Luc. 21:10-13).

Jich bitʼil ya yal te albilkʼop ini, te Jehová ya yalbey spisil te ants winiketik te yakuk x-abatinik ta stojol sok te yakuk schʼuunbeyik te skʼope. Te bin ya skʼane, jaʼ te spisil te machʼatik ya schʼuunik mantale yakuk smulanik jun lekil kuxlejal ta ora ini sok te yakuk yichʼik bendision ta achʼ balumilal (2 Ped. 3:13). Swenta ya schʼuunik te ants winiketik te bintik sjapoje, te Jehová yakʼoj te «lec yachʼil cʼop yuʼun te cuentahinel yuʼun» swenta ya sta skolelik-a. Te Jesús la yal te ya «xpuhc ta halel ta swohlol bahlumilal [...] scuenta testigo-cʼop ta stojol spisil nacionetic» (Mat. 24:14). Te Dios schajpanoj ta lek te j-abatetik yuʼun swenta ya spukik ta alel te lek yachʼil kʼop ini kʼaxem ta 240 nasionetik sok territorioetik. Jaʼ ya skʼan te spisiluk te ants winiketik ya schʼam yaʼiyik te bin yak ta yalel swenta ma xkʼot ta stojolik te tulan wokolil kʼalal ya yakʼ tal te kastigoe (Sof. 1:14, 15; 2:2, 3).

Jnaʼojtik te spisilnanix-ora ya yakʼ tiempo-a te Dios yuʼun ya schʼuunik te ants winiketik, melel jich yakʼoj ta ilel. Jich yuʼun, te bin tulanxan skʼoplal jaʼ teme ya schʼuunik spasel te bin ya yal ta mantal te Dios te bitʼil ayto tiempoe. Jaʼ yuʼun, te jcholkʼopotik yuʼun te Diose, akʼa jpastikxan tulan ta skoltayel te ants winiketik swenta ya sta skolelik kʼalal ya yichʼ lajinel te balumilal ini.