Chola kaʼiytik te akuxlejal te kʼalal chʼiat tal.

Ayinon ta 1979 ta Estados Unidos. kʼalal aytonax oxeb kaʼbilal-ae, te jmejtate la yijkitay sbaik. Te jmamae la schʼijteson jaʼ jich te bitʼil costumbre yuʼun te judioetike, spisil-ora boon ta escuela yuʼun judioetik te sbiilinejik yeshivás. Kʼalal ay 7 kaʼbilal-a bootik ta nainel ta Israel, te escuela te banti boone ay ta jun kibutz, jaʼ jich ya yichʼ naʼbeyel sba te coloniaetik te banti ya yaʼiyik tsʼunbajel. Ta jun jaʼbil ta patil bootik ta México.

Manchukme maʼyuk nopol jun sinagoga te banti ay jnae, ya jtsʼun te jvela te ta sabadoetike, yato jpas-a te bintik nojptesbilon ta spasele, ya jkʼopon te Torá, te jaʼ jun libro te chʼultesbil yuʼun te judioetike sok te kʼalal ya jpas oración, ya jtuuntes te sidur te jaʼ jun libro yuʼun oracionetik. Ya jmulanbey yalbeyel te joʼtak ta clase te bitʼil te jreligione jaʼ mero original. Te joʼone maʼyuk bin-ora jkʼoponoj te Achʼ Testamentoe te jaʼ ya scholbey skʼoplal te bitʼil la schol skʼop Dios sok nojpteswan te Jesucristoe. Te jmamae la yalbon te manchuk ya jkʼopone, melel ya xiʼ te ya sjelontesbonik te bin jchʼuuneje.

¿Bin yuʼun la anop la akʼopon te Achʼ Testamento?

Kʼalal tsʼakaj te 17 kaʼbilal, sujton bael ta Estados Unidos yuʼun bajt jlajin spasel estudiar. Jtul kamigo la yalbon te maba tsʼakal ay te jkuxlejal teme maba ya jchʼuun te Jesuse.

La kalbey: «Te ants winiketik te schʼuunejik te Jesuse loʼlaybilik ta jkʼaxel».

La sjojkʼoybon: «¿Aybal bin-ora akʼoponoj te Achʼ Testamentoe?»

«Maʼuk» la kut.

«Jich yuʼun, ¿Bin yuʼun te jich ya awale? Maba lek te ay bin ya kaltik teme ma jnaʼbeytik swentail, ya kakʼtik ta ilel te maʼyuk bin ya jnaʼtik»

Te bin la yalbone chajpnax la kaʼiy-a, melel jaʼ jich ya jnop-euk. Kʼexawon yuʼun, jaʼ yuʼun la jtsakbey te sBibliae sok la kichʼ bael ta jna yuʼun ya jkʼopon te Achʼ Testamentoe.

¿Bin yilel la awil te bin la akʼopone?

Ta sjajchibal yan sba la kaʼiy-a te la jnaʼ stojol te Achʼ Testamentoe la stsʼibay judioetik. Soknix te kʼalal yakon bael skʼoponele, jajch kil te Jesús jich bitʼil jtul winik te ay yutsil yoʼtan, te pekʼel yoʼtan, te ya skʼan ya skoltay te ants winiketike, ma jaʼuk te ya skʼan ya yutsʼinlane. Jaʼnix jich boon ta biblioteca bajt jlokʼes tal cheb oxeb libroetik te ya yalbey skʼoplal te Jesuse. Pero maʼyuk la skoltayon swenta yuʼun ya xkʼot ta koʼtan te yuʼun-nix jaʼ Mesías te Jesuse. Ay chaʼoxtul ya yalik te jaʼ laj Dios te Jesuse, pero jaʼ ini ma la schʼuun koʼtan. Ya jnop, ¿machʼa ya skʼopon te Jesús kʼalal ya spas oración? ¿Jabal ya skʼopon sba stukel? Jaʼnix jich te Jesús laj stukel, pero te Biblia ya yal ta swenta te Dios: «Te mero ma xlajat atuquele». *

¿Bin la apasix-a?

Te bin smelelile maba ya skontrain sba stukel, jich yuʼun la kakʼ ta koʼtan te ya jle te bin smelelile. Jich yuʼun la jkʼopon te Dios sok spisil koʼtan sok yalel jsit sok ta sbabial buelta ma la jtuuntesix-a te jlibroe. Kʼalal laj jpas te oracione la stijbonik te jpuerta. Jaʼik chaʼtul testigoetik yuʼun Jehová. Kʼopojon sok, sok la yijkitaybonik jilel jun folleto. Te bin la jkʼopon ta folletoe sok te bin la scholbonik kaʼiy ta patile, jich kʼotxan ta koʼtan-a te yuʼun-nix lokʼem tal ta Biblia-a te bin schʼuunejike. Jun ejemplo, te Testigoetike ya yalik te Jesuse ma jaʼuk jun Dios te oxeb ayike, jaʼ «te Snichʼan Dios» * sok «te shahchibal te bintic pasticlambil yuʼun Dios». *

Ta patil bael sujton bael ta México sok te la jnopxan-a sok te Testigoetik te bin albil skʼoplal ta swenta te Mesías. ¡Kʼax bayal! Pero ayto bin ma schʼuun koʼtan-a. Jich ya jojkʼoybey jba: «¿Jaʼnaxbal stukel te Jesús te la skʼotes ta pasel te bin yaloj te j-alwanejetike? O ¿jaʼnaxbal te la skuy sba ta Mesías yuʼun ya sloʼloy-a te ants winiketike?».

¿Bin-utʼil la schʼuun lek awoʼtan?

Te Testigoetik la yakʼbon kil ta Biblia te bintik altiklanbil skʼoplal te maʼyuk machʼa jichnax-a juʼ yuʼun skʼotesel ta pasel ta stukelnaxe. Jun ejemplo, aytoxan skʼan 700 jaʼbil xkʼot ta pasel-a, te Miqueas yalojbeyix skʼoplal- a te Mesías te ya x-ayin ta Belén. * ¿Machʼa ya xjuʼ yuʼun tsael te banti lugaril ya x-ayine? Te Isaías la stsʼibay te Mesiase ya yichʼ milel jich bitʼil jun j-elekʼ, pero te ya yichʼ mukel ta yolil jkʼulejetik. * Spisil te bin albil skʼoplale kʼot ta pasel ta stojol te Jesuse.

Pero te prueba te la yakʼbon schʼuun koʼtane jaʼ te banti lijk tal stsʼumbal te Jesuse. Te Biblia ya yal te Mesiase ya xlijk tal ta stsʼumbal ajwalil David. * Te judioetike stsʼibayojik jun registro te banti ya yal te banti lijkem tal stsʼumbalike, jaʼ yuʼun te manchuk lijkemuk tal ta sfamilia David te Jesuse, te skontratake la spukik ta alel te jichuke, pero ma juʼ yuʼunik, melel chikan ta ilel te jaʼ te lijk tal stsʼumbal-ae. Jaʼnix jich te ipal ants winiketik la yalik ta aw «te snichʼan David». *

37 jaʼbil ta patil-a te kʼalal laj te Jesús ta jaʼbil 70, te soldadoetik yuʼun Roma la slajinik te Jerusalén, jaʼ yuʼun spisil te registroetik chʼayik o la yichʼik lajinel. Jaʼ yuʼun swenta ya yichʼ naʼel-a te banti lijkem tal stsʼumbale, ya skʼan chiknajemix tal-a te ta jaʼbil-abi.

¿Bin la ata ta nopel?

Ta Deuteronomio 18:18, 19, te Dios la yal te ya yakʼ chiknajuk tal ta Israel jtul j-alwanej te pajal sok te Moisés sok jich la yal: «Pero machʼayuk a te ma ya xyichʼ ta cuenta te jcʼop ya yal ta scuenta te jbihile, yame quichʼ ta cʼop yuʼun». Te kʼalal la jnop ta lek spajkal te Bibliae, kʼot ta koʼtan te Jesús yuʼun Nazaret jaʼ te j-alwanej-abi.