Te bin ya xkʼot ta pasel ta pajel chaʼbej
¿Aybal ajojkʼoybeyoj aba te bin ya xkʼot ta pasel ta pajel chaʼbej? Te Biblia ya yal te ay bin nopolix ya xkʼot ta pasel te maʼyuk banti jich kilojtik-ae.
Te Jesús la scholbey skʼoplal te bin-utʼil ya xjuʼ ya jnaʼtik kʼalal «nopol ya xtalix te cuentahinel yuʼun Dios» (Lucas 21:31). Jaʼnix jich la yal te ya xjajch mukʼul guerraetik, tulan nijkel, wiʼnal sok chamel. Ta kʼajkʼal ini ya kiltik te jich yakix ta kʼoel ta pasele (Lucas 21:10-17).
Te Biblia jaʼnix jich ya yalbey skʼoplal te ya yakʼik ta ilel te kʼax chopol stalelik te ants winiketik kʼalal nopolix-a te «slajibal cʼahcʼal» yuʼun te ajwaliletik ta balumilal. Kʼopona te 2 Timoteo 3:1-5. a ¿Mabal jichuk ya awil te yuʼun-nix jich stalelik-a sok te jich yakik ta spasel te ants winiketik ta kʼajkʼal ini?
¿Bin ya skʼan ya yal-abi? Te Wentainel yuʼun Dios nopolix ya xbajt yakʼ tal lekilal liʼ ta Balumilal banti leknax ya xkʼot te jkuxlejaltike (Lucas 21:36). Te Diose jamal yaloj ta Biblia te ya xbajt slekubtes te Balumilal, soknix ya spas te bin lek ta stojol te ants winiketike. Kiltik cheʼoxebuk ejemplo.
LEKIL GOBIERNO
Te Jesús «aʼbot yaʼtel ta cuentahinwanej, aʼbot yutsilal soc te banti ya xcuentahinwan, scuenta yuʼun spisil pueblohetic, nacionetic soc cʼopiletic ya yacʼ sbahic ta aʼbatinel yuʼun; sbahtel qʼuinal te yaʼtel ta cuentahinwanej, mayuc bin ora ya xcʼax bahel; soc te banti ya xcuentahinwan mayuc bin ora ya yichʼ jinel» (DANIEL 7:14).
Te bin ya skʼan ya yal. Jaʼ te tseʼelnax koʼtantik ya xkuxinotik kʼalal ya xmantalaj te Jesús te jaʼ Ajwalil tsabil yuʼun te Diose.
MAʼYUKIX CHAMEL
«Mayuc machʼa [...] hich ya yal: Ayon ta chamel» (ISAÍAS 33:24).
Te bin ya skʼan ya yal. Maʼyuk bin-ora ya stsakotikix chamel o te ya jtatik wokolil ta jkuxlejaltik. Yame xkuxinotik ta sbajtelkʼinal.
LAMALKʼINAL
«Jcʼaxel ya yacʼ quehchajuc guerrahetic cʼalal ta stiʼil bahlumilal» (SALMO 46:9).
Te bin ya skʼan ya yal. Spisil-ora lamalkʼinal ya xkuxinotik sok maʼyukix bin-ora ya xbajt jtatik wokol ta skaj te guerrae.
TE BALUMILAL YA XNOJ TA LEKIL ANTS WINIKETIK
«Nopol ya xchʼay bahel te machʼa chopol; [...] te machʼatic manso yoʼtanic ya me yichʼic hilel te qʼuinal» (SALMO 37:10, 11).
Te bin ya skʼan ya yal. Maʼyukix chopol ants winiketik, jaʼnax ya xkuxinik jilel te machʼatik ya schʼuunbeyik smantal te Diose.
YAME XKʼATPʼUJ TA NICHIMAL KʼINAL SWOLOL TE BALUMILAL
«Ya spasic nahetic soc ya xnahinic tey a, ya stsʼunic tsʼusubiltic soc ya sloʼbeyic sit» (ISAÍAS 65:21, 22).
Te bin ya skʼan ya yal. Ta swolol te Balumilal ya xkʼatpʼuj ta tʼujbil nichimal kʼinal. Te Dios yame skʼotes ta pasel te bin yakotik ta skʼanbeyel: Jaʼ te yakuk yichʼ pasel «ta bahlumilal» te bin ya skʼan yoʼtane (Mateo 6:10).
a Ya xjuʼ ya akʼopon te Biblia ta pajina yuʼun Internet www.pr418.com..
Yaniwan amulan-euk sk'oponel ini
JOJKʼOYELETIK TA SWENTA TE BIBLIA
¿Bin ya xbajt spas te Wentainel yuʼun te Dios?
Ilawil te bin ya xbajt spas te Wentainel yuʼun te Dios te kʼalal ya xjajch ta swentainel te Balumilale.
