Jaʼnix la yal te Diose: «¡Hoʼon Jehovahon, ha me te jbihile!» (Isaías 42:8). Te kʼalal la yichʼ tsʼibayel te Biblia ayniwan siete mil buelta ya xchiknaj tey-a te sbiil te Diose. Jaʼukmeto, te machʼatik la skʼasesik ta yan kʼopil te Biblia ay la sjeltayik ta Kajwal o Kajwaltik. Te Diose ya skʼan ya yamigoinat sok ya skʼan te yakuk awalbey te sbiile (Salmo 105:1).

Te bin-utʼil naʼbil sba. Te Biblia ya yal te Jehová naʼbil sba jich bitʼil: Dios, Spisil ya xjuʼ yuʼun, Jpaswanej, Tatil, Kajwaltik sok Mukʼul Dios. Jaʼnix jich ya yal te Biblia te bayal j-abatetik yuʼun Dios jich la yalbeyik te kʼalal la skʼoponike soknix la stuuntesbeyik te sbiile (Daniel 9:4).

 Te bin yilel. Te Diose jaʼ jun espiritu (Juan 4:24). Te Biblia ya yal te «Mayuc machʼa yiloj te Diose» (Juan 1:18). Jaʼnix jich ya yal te ya xkʼot ta yoʼtan te bin yaʼiyel ya kaʼiy jbatike. Te bin ya jpastike ya xjuʼ ya x-akʼbot stseʼelil yoʼtan o ya smel yoʼtan yuʼun (Salmo 78:40, 41; Proverbios 27:11).

Te tʼujbil taleliletik yuʼun. Te Diose lek ya yil spisil te ants winiketik chikan banti talemik o bin yilel stalelik (Hechos 10:34, 35). Jaʼnix jich ya snaʼ yoʼbolil jbatik, ay yutsil yoʼtan, slamalil yoʼtan, jun yoʼtan sok spisil-ora ya yal te bin smelelile (Éxodo 34:6, 7). Pero ay chaneb taleliletik yuʼun te kʼax chikanik ta ilele.

Te yuʼel. Jaʼ Dios te spisil ya xjuʼ yuʼun. Jaʼ ya skʼan ya yal te kʼax bayal yuʼel yuʼun ya skʼotes ta pasel te bin yaloj ta jamale (Génesis 17:1).

Te spʼijil yoʼtan. Maʼyuk machʼa ya spajbey spʼijil te Diose. Te Biblia ya yal te jaʼnax stukel te «ay spʼijil yoʼtan» (Romanos 16:27).

Te stojil yoʼtan. Te Diose spisil-ora ya spas te bin stojile. «Toj spisil te behetic yuʼune» sok «mayuc schopolil» (Deuteronomio 32:4).

Te skʼuxul yoʼtan. Te Biblia ya yal: «Jcʼuxul-oʼtanil stuquel te Diose» (1 Juan 4:8, XCD). Te Diose ma jaʼuknax ya yakʼ ta ilel kʼuxul oʼtanil, jaʼ jkʼuxul oʼtanil. Kʼax mukʼ te skʼuxul yoʼtan te ya xchiknaj ta spisil te bintik ya spase, jich bayal lekilal ya jtatik yuʼun.

Ya skʼan ya yamigoin te ants winiketik. Te Diose jaʼ jTatik te ay ta chʼulchan te bayal skʼuxul yoʼtane (Mateo 6:9). Teme ay schʼuunel koʼtantik ta stojole ya xjuʼ ya kamigointik (Salmo 25:14). Ta melel, bayal ya smel yoʼtan ta jtojoltik, jaʼ yuʼun ya skʼan te yakuk xnoptsajotik ta stojol ta swenta te orasion sok te yakuk kalbeytik yaʼiy spisil te jwokoltik melel ya smel yoʼtan ta jtojoltik (Santiago 4:8; 1 Pedro 5:7).

Te Jesús ma Diosuk. Maʼyuk machʼa ya xpajot yuʼun te Jesuse, melel jaʼ pasot yuʼun te Jehová. Jaʼ yuʼun te Biblia ya yal te jaʼ sNichʼan te Diose (Juan 20:31). Jaʼ sba sNichʼan te Jehová, patil la sjokin sba sok ta schajpanel te chʼulchan sok te Balumilal soknix spisil te bintik kuxajtike (Proverbios 8:30, 31; Colosenses 1:15, 16).

 Te Jesús maʼyuk bin-ora la yal te jaʼ Diose. La yal: «Como tey talemon a soc ha nix la sticonon tal [te Diose]» (Juan 7:29). Te kʼalal yak ta kʼop sok jtul ants te jaʼ jnopojel yuʼune, te Jesús jich la yal ta swenta te Jehová: «Te Jtat soc te Tatil awuʼunic» sok «te Dios cuʼun soc te Dios awuʼunic» (Juan 20:17). Kʼalal laj te Jesús, chaʼkuxajtesot yuʼun te Jehová yuʼun ya xkuxin ta chʼulchan, la yakʼ jujkajuk ta swaʼel-kʼab sok la yakʼbey mukʼ yaʼtel (Mateo 28:18; Hechos 2:32, 33).

Te Jesús ya xjuʼ ya skoltayat yuʼun ya xnoptsajat ta stojol Dios

Xtaluk ta Balumilal yuʼun ya snojptesotik bin yilel stalel te sTate. Te Jehová jich la yal ta stojol te Jesuse: «Ha Jnichʼan ini te bayel cʼux ta coʼtan; aʼiybeya awaʼiyic scʼop» (Marcos 9:7). Te Jesús jaʼ te machʼa ya snaʼbeyxan sba ta lek te Diose. Jich la yal: «Mayuc machʼa ya snaʼbe sba te Tatil, ha nax te Nichʼanil soc te machʼatic ya scʼan ya xʼaʼbot snaʼbeyic sba yuʼun te Nichʼanile» (Lucas 10:22).

La yakʼ ta ilel te bin-nix yilel stalel-a te Diose. Te Jesús la skʼayinbey ta lek stalel te sTate, jaʼ yuʼun juʼ te jich la yal: «Te machʼa yilojonix, ha nix yilojix te Tatile» (Juan 14:9). Te Jesús la skoltay te ants winiketik yuʼun ya xnoptsajik ta stojol te Dios, melel la yal sok la yakʼ ta ilel ta skuxlejal te kʼux ta yoʼtan te sTate. Te Jesús jich la yal: «Hoʼon te behon, hoʼon te smelelil-cʼopon, soc hoʼon te cuxlejalon; mayuc machʼa ya xtal ta stojol te Tatil teme ma haʼucon ta jcuenta» (Juan 14:6). La yalxan: «Te machʼatic smelelil ya yichʼic ta mucʼ, ya me yichʼic ta mucʼ te Tatil ta scuenta espíritu soc ta scuenta smelelil, como te Tatil yac slehbel te machʼatic hich ya xʼichʼot ta mucʼ yuʼune» (Juan 4:23) ¡Nopanax awaʼiy! Te Jehová yak ta sleel ants winiketik jich bitʼil te jaʼate, te machʼatik ya skʼan ya snaʼbeyik sba ta smelelile.