La jnopbeytikix skʼoplal chaʼoxchajp te bin ya skoltayotik ta snaʼel te machʼa-a te Diose. La kiltikix te ya yal te Biblia te Jehová sbiil te Diose sok te talelil yuʼun te mukʼxan skʼoplale jaʼ te kʼuxul oʼtanile. Jaʼnix jich la jnoptikix te bintik spasoj sok te bin ya xbajtʼ spas ta stojol te ants winiketike. Pero te snaʼbeyel sba te Diose bayaltoxan bintik smakoj, jaʼ yuʼun yaniwan ajojkʼoybey aba teme ay bin lek ya jtatik yuʼune.

Te Jehová yalojbat ta jamal teme ya alee ya yakʼ sba ta leel (1 Crónicas 28:9). Teme ya apas tulan ta snaʼbeyel sba te Jehová yame ata tʼujbil majtʼanil, jaʼ te jun awoʼtan ya xkʼoat soke (Salmo 25:14). ¿Bin lekilal ya ata teme jun awoʼtan aba soke?

Yame ata stseʼelil awoʼtan. Te Biblia ya yal ta swenta te Jehová te jaʼ «Dios te tseʼel yoʼtane» (1 Timoteo 1:11, TNM). Teme ya apas tulan te ya xnoptsajat ta stojol sok te ya akʼayinbey te ejemplo yuʼune ya ata stseʼelil awoʼtan, jich lek ya xkʼot akuxlejal, apensar sok lek ya awaʼiy aba (Salmo 33:12). Jaʼnix jich ya xjuʼ ya skoltayat ta spʼajel te bin chopol, te ya xkʼayat ta spasel bintik lek soknix te lek ya awil aba sok te yantike. Jaʼnixme jich ya awaʼiy aba-euk te bitʼil la yal te salmista: «Lec te nopol ayon ta stojol Dios» (Salmo 73:28).

Te Dios ya skanantayat. Te Jehová jich jamal ya yalbey te yamigotake: «Ya cacʼ jsit ta atojol» (Salmo 32:8). Jaʼ-abi ya skʼan ya yal te ya skanantay ta jujuntul te j-abatetik yuʼun sok te ya yakʼbey te bin ya xtuun yuʼunike (Salmo 139:1, 2). Te kʼalal ya stsakxan yip te bitʼil awamigoinej te Jehová, yame awil te spisil-ora ya skoltayate.

Ya ata lekilal ta pajel chaʼbej. Te Jehová ma jaʼuknax ya skoltayat ta stael stseʼelil awoʼtan ta ora ini, jaʼnix jich ya sjapbat lekilal ta pajel chaʼbej (Isaías 48:17, 18). Te Biblia ya yal: «Hich ay te cuxlejal sbahtel qʼuinal: ha te ya snaʼbat aba, te haʼat mero Diosat atuquel, soc te ya snaʼbe sba te Jesucristo te ticombil tal awuʼune» (Juan 17:3). Te bin ya yakʼ jmaliytik te Jehová jich kʼoem te bitʼil ankla yuʼun barko «te stalel ay soc ma syucʼ sba» te ya skoltayotik ta yorail tulan wokolil (Hebreos 6:19).

Te bin la kiltikixe jaʼ chaʼoxchajp lekilal te ya xjuʼ ta tael kʼalal ya jnaʼbeytik sba ta lek te Dios sok te ya kamigointike. Teme ya akʼan ya anaʼbeyxan skʼoplale kʼopojan sok jtul testigo yuʼun Jehová o ya xjuʼ x-ochat ta pajina kuʼunkotik ta Internet ta www.pr418.com/tzh.