Te lekil amigo jaʼ te machʼa ya xjuʼ ya jkʼanbeytik koltayel te kʼalal ayotik ta wokol. Jaʼ yuʼun bayal machʼatik ya yalik te ma jaʼuk kamigotik te Diose, melel ya yalik te mala ayuk bin ya spas ta jtojoltik. Pero bayal bintik spasojix ta jtojoltik sok nopol ya xbajt schajpan te kʼopetik kuʼuntik sok ya slajinbey skʼoplal te jwokoltike. ¿Bin ya xbajt spas te Diose?

Te Dios yame slajin te bintik ya yakʼ wokolile. Te Biblia ya yakʼ ta naʼel te machʼa-a te ya yakʼ wokolil: «Ay ta skʼab swolol balumilal te Satanás» (1 Juan 5:19). Kʼalal la yalbey skʼoplal Jesús «te ajwalil yuʼun te balumilal ini» jaʼ yak ta yalbeyel skʼoplal-a te Pukuje (Juan 12:31). Jaʼ ta swenta te Pukuj te ay bayal swokol te ants winiketike. ¿Bin ya xbajt spas te Dios ta swenta-abi?

Te Jehová nopol ya xbajt stuuntes te sNichʼan swenta ya slajin «te machʼa swentainoj te lajele, jaʼ te Pukuje» (Hebreos 2:14; 1 Juan 3:8). Jaʼnix jich te Biblia ya yal te snaʼoj te Pukuj «te maʼyukix bayal tiempo yuʼune», melel ya yichʼ lajinel (Apocalipsis 12:12). Te Dios jaʼnix jich ya xbajt slajin te chopol ants winiketike (Salmo 37:9; Proverbios 2:22).

Kʼalal te Jpaswanej kuʼuntik la slajinix-a te bintik chopole, yame skʼotes ta pasel te skʼanojel yoʼtan ta stojol te ants winiketik sok te Balumilale. ¿Binwan yilel ya xkʼot te kuxinele?

Spisil-ora lamalkʼinal sok maʼyuk xiwel. «Yan te machʼatic manso yoʼtanic ya me yichʼic hilel te qʼuinal soc ya me smulanic bayel lamal qʼuinal» (Salmo 37:11).

Bayal lekil weʼelil. «Ayuc me bayel trigo ta lumqʼuinal, ta baba witsetic» (Salmo 72:16).

Tʼujbil naetik sok aʼtelil te ya yakʼ tseʼel-oʼtanil. «Ya spasic nahetic soc ya xnahinic tey a, ya stsʼunic tsʼusubiltic soc ya sloʼbeyic sit. [...] Te machʼatic tsabilic cuʼun, ya me yaiybe yutsilal te yatʼel scʼabique» (Isaías 65:21, 22).

¿Yabal amulan te jichuk ya xkuxinat ta Balumilal? Spisil-abi nopolme ya xkʼot ta pasel.

Ta ora ini, jpisiltik ya stsakotik chamel sok ya xlajotik, pero nopol ya xchʼayix bael. Wokolayal te la yakʼ sba ta lajel te Jesús, te Jehová nopolme ya skʼotes ta pasel ini: «Te machʼa ya yakʼ schʼuunel yoʼtan ta stojole maba ya yichʼ lajinel, yame sta skuxlejal sbajtelkʼinal» (Juan 3:16). ¿Binwan yilel te kuxinel-abi?

Ya xlaj skʼoplal te chamele. «Mayuc machʼa te nahinem ta Sión te hich ya yal: Ayon ta chamel, te xchihe. Ya xpasbot perdón yuʼun smulic te machʼatic nahinemic tey a» (Isaías 33:24).

Maʼyukix lajel. «Ya me slajin scuenta sbahtel qʼuinal te lajele, te Cajwaltic Jehová ya scusticlambe yaʼlel sitic ta spisilic» (Isaías 25:8).

Te ants winiketike ya xkuxinik ta sbajtelkʼinal. «Te majtanil ya yakʼ te Diose jaʼ te kuxlejalil sbajtelkʼinal ta swenta te Kajwaltik Cristo Jesús» (Romanos 6:23).

Ya xchaʼkuxajik te machʼatik lajemike. «Te ya xbajt ayinuk chaʼkuxajel yuʼun te machʼatik toj yoʼtanik sok te machʼatik maba toj yoʼtanik» (Hechos 24:15). Te machʼatik lajemikix ya staik lekilal-euk ta swenta te majtanil yuʼun te stojol kolele.

¿Bin ya xbajt spas te Dios swenta ya skʼotes ta pasel spisil-abi?

Te Dios yame skʼotes ta pasel te skʼanojel yoʼtan ta stojol te ants winiketik sok te Balumilal ta swentanax te Wentainel te ay ta chʼulchan te yakʼojbey ta skʼab te Jesuse (Salmo 110:1, 2). Jaʼnix te Wentainel-abi te la yalbey te yakuk skʼanik ta skʼoponel Dios te jnopojeletik yuʼun te Jesús, kʼalal jich la yal: «Jtatik te ayat ta chʼulchan [...]. Akʼa taluk te Wentainel awuʼune» (Mateo 6:9, 10).

Te Wentainel yuʼun Dios yame xmantalaj ta Balumilal sok yame slajin spisil wokolil sok te bin kʼuxe. Jaʼ-abi jaʼ lekil ajwalil te ya xjuʼ ya staik te ants winiketike. Jaʼ yuʼun kʼalal ayin ta Balumilal te Jesús la spas tulan ta scholel «te lek yachʼil kʼop yuʼun te Wentainel yuʼun te Diose» sok la spas ta mantal te jnopojeletik yuʼun te jichuk ya spasik-euke (Mateo 4:23; 24:14).

Ta swenta te kʼax kʼuxotik ta yoʼtan te Jehová, yaloj ta jamal te ya skʼotes ta pasel spisil te bintik sjapojbotike. ¿Mabal ya stijbat awoʼtan-abi ta snaʼbeyelxan sba sok te ya akʼan awamigoin? ¿Bintik lekilal ya xjuʼ ya ata teme jich ya apase? Jaʼ-abi yame kiltik ta yan artículo.