Swenta ay machʼa ya jnaʼbeytik sba ta lek, ya skʼan ya jnaʼtik te bintik juʼem yuʼun spasele. Jaʼnix jich teme ya jkʼan ya jnaʼbeytik sba ta lek te Diose, ya skʼan ya jnaʼtik te bintik spasoje. Chajpnaxniwan ya xbajtʼ awil-a te jayebto lekilal jtaojtik ta swenta te bintik spasoj te Diose sok te snitojbey sba skʼoplal sok te bin ya jtatik ta pajel chaʼbeje.

Te Jehová jaʼ Mukʼul Jpaswanej kuʼuntik, te taleliletik yuʼun te ma chikanuk ta ilel, ya xchiknaj ta swenta «te yuʼel te sbahtel qʼuinal ay soc te bin utʼil stalel Dios stuquel, jamal chican ta ilel ta scuenta te bintic spasoj» (Romanos 1:20). Jaʼ «la spas ta yuʼel te lumqʼuinal, ta scuenta sbihil la yaʼbe yichʼ yip te bahlumilal soc ta scuenta spʼijil yoʼtan la slim bahel te chʼulchane» (Jeremías 10:12). Ta swenta te bintik kʼax tʼujbil spasoj te Jehová ya yakʼ kiltik te kʼax kʼuxotik ta yoʼtane.

Nopanax awaʼiy te jayebto ya jmulanbeytik yutsilal te jkuxlejaltik ta swenta te jich la spasotik te Jehová te bitʼil slokʼombae (Génesis 1:27). Ta swenta-abi, ya xjuʼ ya kakʼtik ta ilel te taleliletik yuʼun te ban kʼalal ya xjuʼ kuʼuntike. La yakʼbotik ta koʼtantik te ya jkʼan ya jnaʼbeytik sbae, jaʼ-abi ya skʼan ya yal te ya xjuʼ xkʼot ta koʼtantik te bin ya snop sok te mantaliletik yuʼune. Kʼalal ya kakʼ stojobtesotik-abi, ayxan stseʼelil koʼtantik sok ay swentail ya xkʼot te jkuxlejaltike. Jaʼnix jich ya xjuʼ ya kamigointik te Diose.

Kʼalal ya kiltik te bintik spasoj ta Balumilal te Jehová ya yakʼ jnaʼtik te kʼuxotik ta yoʼtane. Te Biblia ya yal: «Ma yuʼunuc ma la yacʼ ta naʼel te bitʼil ay stuquel te Diose, melel lec te bi ya spase. Ya yacʼ taluc jaʼal ta chʼulchan soc ya yacʼ sitinuc te cawal-jtsʼunubtique. Jich ya xnoj te jchʼujtʼique soc ya xbujtsʼnaj coʼtantic ta lec yuʼun» (Hechos 14:17, XCD). Te Diose ma jaʼuknax la yakʼbotik te bin ya xtuun kuʼuntike, jaʼnix jich la yakʼbotik spisil te bin  ya yakʼbey yutsilal te jkuxlejaltike. Pero aytoxan bayal te bintik ya skʼan ya yakʼbotike.

Te Jehová la spas te Balumilal yuʼun ya xkuxinik sbajtʼelkʼinal tey-a te ants winiketike. Te Biblia ya yal te «ha la yaʼbe te ants-winiquetic te lumqʼuinale» sok te «ma tojoluc la spas, ha la spas scuenta yuʼun ay machʼatic ya xnahinic tey a» (Salmo 115:16; Isaías 45:18). ¿Machʼatik ya xnainik tey-a sok jayeb kʼajkʼal? Te Biblia ya yal: «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmo 37:29).

Te Jehová la spas te Adán sok te Eva swenta ya xkuxinik ta sbajtʼelkʼinal. La yichʼik akʼel ta jun nichimal kʼinal yuʼun ya «xʼatʼej ta lumqʼuinal, soc ya me scanantay» (Génesis 2:8, 15, XCD). Jaʼnix jich ay bin kʼax tʼujbil akʼbotik spas yuʼun te Diose: «Sitinan soc pʼohla abahic, nojesahic ta swohlol te bahlumilal, soc tuhunahic te qʼuinale» (Génesis 1:28). Te lajuk skʼanike, kuxinik sbajtʼelkʼinal liʼ ta Balumilal sok stseʼelil yoʼtanik te jichuke. Pero mel-oʼtantik sba te bin la spasike, la skʼaxuntayik mantal sok la xchʼayik te «toj yoʼtanic» ya x-ilotik yuʼun te Diose sok te ya «yichʼic hilel te qʼuinale». Manchukme la skʼaxuntayik te mantale yame kiltik bael te maba jelon te skʼanojel yoʼtan Dios ta swenta te ants winiketik sok te Balumilale. Pero nail ya kiltik te binxan spasoj te Diose.

¿Bin yuʼun la yakʼbotik te Biblia te Jehovae? Ta sbabial, yuʼun jich ya jnaʼbeytik sba-a (Proverbios 2:1-5). Te Biblia ma xyakʼbotik sujtib spisil te jojkʼoyeletik ya jpasbey jbatik ta swenta te Diose, maʼyuk junuk libro te ya xjuʼ ya spase (Eclesiastés 3:11). Pero spisil te bin ya yalbotik te Bibliae ya skoltayotik yuʼun ya jnaʼbeytik sba te Diose. Te kʼalal ya jkʼopontike ya xjuʼ ya jnaʼtik te bin yilel ya yil te ants winiketike. Jich ya xjuʼ ya jnaʼtik te machʼatik lek ilbilik yuʼune (Salmo 15:1-5). Teyme ya jnoptik-a te bin-utʼil ya xjuʼ ya kichʼtik ta mukʼ te Diose, te bin lek sok te bin ma lek ta pasel sok te bin ya snop ta swenta te sleel jbiluktike. Jaʼnix jich te Biblia ya yakʼ jnaʼbeytik sba ta lek te Jpaswanej kuʼuntik ta swenta te bintik la yal sok te bintik la spas te sNichʼane, jaʼ te Jesucristoe (Juan 14:9).

Te schebal swentail te bin yuʼun yakʼojbotik te Biblia te Jehovae, jaʼ yuʼun te jich ya jtatik te stseʼelil koʼtantik soknix te ayuk swentail te jkuxlejaltike. Tey ya scholbotik-a te bin ya xjuʼ ya jpastik yuʼun ayuk stseʼelil koʼtantik sok te jfamiliatik, te lekuk ya kaʼiy jbatik sok te yakuk xkujch kuʼuntik te bin ya jmel koʼtantik yuʼune. Jich bitʼil ya kiltik bael ta patil, te Biblia ya yakʼbotik sujtib te jojkʼoyeletik te mukʼ skʼoplal ya jpasbey jbatike, jich bitʼil: ¿Bin yuʼun te ay bayal wokolile? ¿Bin ya jmaliytik ta pajel chaʼbej? Jaʼnix jich ya scholbotik te bin spasoj te Dios yuʼun ya xkʼot ta pasel te skʼanojel yoʼtane.

Ay bintikxan ya yakʼ kiltik te maʼyuk yan libro te pajal sok te Biblia sok te jaʼ lokʼem tal ta yoʼtan te Diose. Manchukme ayniwan 40 ta tul winiketik la stsʼibayik sok te jalajniwan ta tsʼibayel 1,600 jaʼbil, maba ya skontrain sba te bin ya yale, melel yuʼun-nix jaʼ lokʼem tal ta yoʼtan-a te Diose (2 Timoteo 3:16). Te Biblia ma pajaluk sok te yantik libroetik te antiguoixe, te bintik tsʼibaybil tey-ae maba jelonem manchukme kʼaxemix tal bayal jaʼbil, jich ya yakʼ kiltik te junetik yuʼun Biblia te yichʼoj tsʼibayel ta namey kʼinale. Jaʼnix jich, maʼyuk machʼa juʼem yuʼun slajinel manchukme ay machʼatik skomojik te ya yichʼ kʼasesel ta yan kʼopil, te ya yichʼ pukel sok te ya yichʼ kʼoponele. Ma jaʼuknax-abi, jaʼ jun libro te bayal yichʼoj chonel sok te bayal kʼopil kʼasesbil ta swolol te Balumilale. Te bitʼil ay kuʼuntik te Biblia ta ora ini ya yakʼ kiltik te yuʼun-nix jaʼ sKʼop-a te Dios te «stalel ay sbahtel qʼuinal» (Isaías 40:8).

Te binxan spasoj te Diose jaʼ te jamal la yal te ya skʼotes ta pasel te skʼanojel yoʼtan ta swenta jun majtʼanil te kʼax mukʼ skʼoplale. Jich bitʼil la kalbeytik skʼoplal ta sjajchibale, te Dios jaʼ la skʼan te yakuk xkuxinik sbajtʼelkʼinal te ants winiketik liʼ ta Balumilal. Pero la sta smulik te kʼalal la skʼaxuntaybeyik smantal Dios te Adán sok te Eva, la schʼayik te kuxlejalil ta sbajtʼelkʼinal sok jich kʼot ta stojolik-euk te yal snichʼnabike. «Ha yuʼun hich te bin utʼil och mulil ta bahlumilal ta scuenta jtuhl winic soc te och lajel ta scuenta mulil, hich cʼoht lajel ta stojol spisil ants-winiquetic ta scaj te spisilic stahoj smulic» (Romanos 5:12). Ta swenta te la skʼaxuntayik  mantale, jich yilel te ma xkʼotix ta pasel te skʼanojel yoʼtan te Diose. Pero, ¿bin la spasix-a te Jehovae?

Ay bin la spas te snujpʼ sba sok te stalele. La spas te bin stojile, la yakʼbey kastigo te Adán sok te Eva ta skaj te la skʼaxuntayik mantale, pero ta swenta te skʼuxul yoʼtan ay bin la spas yuʼun ay bin ya yakʼbey smaliy te ants winiketike. Te Jehová la stuuntes te spʼijil swenta ya schajpan te kʼop sok oranax la yal te bin-utʼil ya xbajtʼ schajpane (Génesis 3:15). Jaʼ te ya skoltayotik lokʼel yuʼun te mulil sok te lajel ta swenta te sNichʼane, jaʼ te Jesucristoe. ¿Bin smakojbey skʼoplal-abi?

Te Jehová la stikun tal ta Balumilal te Jesús swenta ya skoltay te ants winiketik ta skaj te la skʼaxuntay mantal te Adane, jichme ya yakʼbey snop te ants winiketik te be yuʼun kuxlejalil sok te ya «yacʼ sba ta lajel scuenta yuʼun ya xweht scolel bayelic» * (Mateo 20:28; Juan 14:6). Te Jesús juʼ yuʼun stojel te jkoleltik melel tojil winik jich bitʼil te Adane, pero te Jesuse spisil-ora la schʼuunbey smantal te Dios jaʼto te kʼalal laje. Ta skaj te ma snujpʼuk ya xlaje, te Jehová la schaʼkuxajtes sok la yakʼ te ya sujt bael ta chʼulchan. Juʼ yuʼun spasel te bin ma juʼ yuʼun te Adane: jaʼ te ya yakʼbey skuxlejal sbajtʼelkʼinal te ants winiketik te ya schʼuunik mantale. «Hich te bin utʼil ta scuenta te la scʼaxuntay mandar te jtuhl winic te hich jmulawiletic cʼoht spisilic, ha nix hich ta scuenta schʼuhunel mandar te jtuhl winic te tsobolic ya xʼilotic te toj ayique» (Romanos 5:19). Ta swenta te la yakʼ sba ta lajel te Jesús, te Dios ya skʼotes ta pasel te bin jamal yaloje: jaʼ te ya xkuxinik sbajtʼelkʼinal te ants winiketik liʼ ta Balumilal.

Te bin-utʼil la schajpan te kʼop te Jehovae, ya skoltayotik ta snaʼbeyelxan sba ta lek. Ya yakʼ jnoptik te maʼyuk bin ya xmakot yuʼun ya skʼotes ta pasel te skʼanojel yoʼtane, melel te skʼope yananix skʼotes ta pasel-a (Isaías 55:11). Jaʼnix jich ya yakʼ kiltik te kʼax kʼuxotik ta yoʼtane. «Hich la yacʼ ta ilel te cʼuxotic ta yoʼtan te Dios, ha te la sticon tal ta bahlumilal te hip jtuhl Snichʼan scuenta yuʼun ya xcuxajotic ta scuenta. Hich ay te scʼuxul-oʼtanile: Ma haʼuc te cʼux la jcaʼiy ta coʼtantic te Diose, ha te cʼux la yaʼiyotic ta yoʼtan stuquel soc te la sticon tal te Snichʼan yuʼun ya stojbotic jmultic» (1 Juan 4:9, 10).

Te Diose spasemal yoʼtan la yakʼ ta lajel ta jtojoltik te sNichʼane, jaʼ-abi ya yakʼ jnaʼtik te «ya yacʼbotic ta majtʼanil spisil» te bintik jamal yalojbotike (Romanos 8:32, XCD). ¿Bin-a te yaloj ta jamal te ya spas ta jtojoltike? Akʼa kiltik.