Bayal ants winiketik ya yalik te schʼuunejik te ay Diose, pero kʼalal ya yichʼik jojkʼoybeyel machʼa-a te Diose, yanyantik sujtib ya yakʼik. Ay chaʼoxtul ya yalik te jaʼlaj jun chopol jues te ya smulan yakʼbeyel kastigo te ants winiketik ta skaj te smulike. Ay yantik ya yalik te jaʼlaj jun Dios te bayal skʼuxul yoʼtan sok te spisil-ora ya spasbotik perdon manchukme ya jpastik te bin chopole. Ay yantik ya yalik te jaʼlaj jun Dios te namal ay sok te maʼyuk skʼoplal ta yoʼtan te ants winiketike. Ta swenta te yanyantik-a te bin ya yalike, ayniwan bayal machʼatik ya snopik te maʼyuk bin-ora ya xjuʼ ya jnaʼbeytik sba te Diose.

¿Mukʼbal skʼoplal te ya jnaʼbeytik sba te Diose? Mukʼ skʼoplal. Teme ya anaʼbey sba ta lek te Diose ya xjuʼ ya yakʼbey swentail te akuxlejale (Hechos 17:26-28). Kʼalal ya xnoptsajatxan ta stojol te Diose, kʼuxatxan ta yoʼtan sok bayalxan ya skoltayat (Santiago 4:8). Ta melel, teme ya anaʼbey sba ta lek te Diose ya xjuʼ ya ata akuxlejal ta sbajtʼelkʼinal (Juan 17:3).

¿Bin-utʼil ya xjuʼ ya anaʼbey sba te Diose? Nopa awaʼiy ta swenta jtul awamigo te ya anaʼbey sba ta leke. ¿Bin-utʼil kaj anaʼbey sba? Ta melel, jaʼniwan nail la anaʼbey te sbiile, patil la awil te bin yilel stalel, te bin ya smulan sok te bin ma smulane, te bin spasoj sok te bin yato snop ya spase. Te kʼalal la anaʼ spisil-abi, la skoltayat yuʼun ya xnoptsajatxan ta stojol.

Jaʼnix jich ya xjuʼ ya anaʼbey sba te Dios teme ya alebey sujtib te jojkʼoyeletik ini:

• ¿BIN SBIIL TE DIOSE?

• ¿BIN YILEL STALEL?

• ¿BINTIK SPASOJ?

• ¿BIN YA XBAJTʼ SPAS?

• ¿BIN LEKILAL YA ATA TEME YA ANAʼBEY SBAE?

Te rebista ini la yichʼ chajpanel ta lek yuʼun ya yakʼbey sujtib ta Biblia te jojkʼoyeletik-abi. Te yantik artikuloetik ya xtale ya skoltayat ta snaʼel machʼa-a te Diose sok bin lekilal ya ata teme ya awamigoine.