Te Diose yakʼbeyojotik jun mukʼul majtanil, jaʼ te ya xjuʼ ya jkʼopontik sok te ya kalbeytik te bin-utʼil ya kaʼiy jbatike. Te j-alwanej David (Daud) jich la yalbey te Diose: «Haʼat yac awaʼiybe scʼop te machʼa ya scʼoponat, spisilic ya xtalic ta atojol» (Salmo 65:2). Pero ¿bin-utʼil ya xjuʼ ya jkʼopontik te Dios yuʼun ya yaʼiybotik te jkʼoptik sok te ya yakʼbotik te sbendisione?

Te salmo 62:8 jich ya yal: «¡Halbeyahic bin ay ta awoʼtanic!». Kʼalal ya jkʼopontik te Dios ya xjuʼ ya kalbeytik te bin ay ta skʼubulil koʼtantik. Te Machʼa spisil ya xjuʼ yuʼune bayal skʼoplal ya yil te kʼalal ya jkʼopontik sok spisil koʼtantik.

Te Dios bayal te bin-utʼil ya yichʼ albeyel jich bitʼil, Jpaswanej, te Machʼa ya snaʼ yoʼbolil jbatik sok te Machʼa lek yoʼtane, pero jun-nax te sbiile. «¡Hoʼon Jehovahon, ha me te jbihile!» (Isaías 42:8). Te sbiil te Dios te jaʼ Jehová kʼaxem ta siete mil buelta ya xchiknaj ta sKʼop Dios. Bayal ta tul j-alwanejetik la stuuntesbeyik te sbiil kʼalal la skʼoponik. Te j-alwanej Abraham jich la yal: «Jehová, [...] awokoluk, aʼiybonxan te jkʼope» (Génesis 18:30, TNM). Jaʼnix jich te joʼotik, te kʼalal ya jkʼopontik te Dios ya skʼan ya jtuuntesbeytik te sbiil, te jaʼ Jehová.

Te Dios ya snaʼ te bin ya jnoptik sok te bin yaʼiyel ya kaʼiy jbatik chikan biluk kʼopil ya jtuuntestik. Te sKʼope ya yalbotik ta jamal: «Mayuc machʼa nax tsahbil yuʼun Dios, ta spisil nacionetic lec yoʼtan yuʼun te machʼa yichʼoj ta mucʼ soc te toj bin ya spas» (Hechos 10:34, 35).

Jaʼukmeto, yuʼun ya yakʼbotik bendision te Diose maba tikʼuknax-a te ya jkʼopontike. Ta yantik artikulo ya xbajt jnoptik binxan ya skʼan ya jpastik.