Kʼalalto ta yorail te chiknaj te ants winiketik, te Jpaswanej kuʼuntike kʼopoj ta stojol te ants winiketik ta swenta j-alwanejetik sok chʼul-abatetik. Jaʼnix jich la yakʼ ta stsʼibayel te sKʼope sok te bintik jamal yaloj ya spase. Te Dios yalojbotik ta jamal te ya x-ayin stseʼelil koʼtantik ta pajel chaʼbej, pero yaniwan jojkʼoybey jbatik: «¿Banti ya jtatik te bintik yaloj ta jamal ya spase?».

Te bin ya yalbotik te Diose ay ta Biblia (2 Timoteo 3:16). ¿Bin-utʼil la stuuntes Dios te j-alwanejetik yuʼun ya yakʼ ta stsʼibayel te sKʼope? Te Dios la yakʼbey ta spensarik te bintik la stsʼibayik te winiketike (2 Pedro 1:21). Kaltik jun ejemplo: Teme ay jtul te machʼa yichʼoj mukʼ yaʼtel ta jlumaltik te ya skʼanbey te sekretario yuʼun te ayuk bin ya spasbey sjunal, te bin la stsʼibay te sekretarioe ma jaʼuk yuʼun, melel jaʼ lokʼem tal ta yoʼtan te machʼa mukʼ yaʼtele. Jaʼnix jich kʼoem te bin la spas te Diose manchukme la stuuntes winiketik yuʼun la stsʼibayik te sKʼope, spisil te bin la yichʼ tsʼibayele jaʼ lokʼem tal ta yoʼtan.

Te sKʼop Dios kʼax mukʼ skʼoplal, jaʼ yuʼun te Dios ya skʼan te spisiluk ants winiketik ya skʼoponik sok te yakuk xkʼot ta yoʼtanike. Ta ora ini, ants winiketik ta «spisil nacionetic, tsʼumbaliletic, cʼopiletic soc pueblohetic» ya xjuʼ ya staik te «lec yachʼil cʼop scuenta sbahtel qʼuinal» te talem ta stojol te Dios (Apocalipsis 14:6). Ta swenta yuʼel te Dios, te sKʼop Dios yichʼoj kʼasesel ta spajkal o ma spajkaluk ta yantik kʼopiletik, kʼaxemtoxan-a te bitʼil te yantik libroetike.