¿Bin ya yakʼ jnoptik te j-alwanejetik ta swenta te Diose?
Ta namey kʼinal, te Dios la stuuntes j-alwanejetik yuʼun ya yal kʼopetik te mukʼ skʼoplal ta stojol te ants winiketik. ¿Yabal yalbotik te Dios ta kʼopetik ini te bin ya skʼan ya jpastik yuʼun ya yakʼbotik te sbendision? Yak. Kiltik te bin ya snojptesotik ta swenta te bin la yalik oxtul j-alwanejetik.
TE J-ALWANEJ ABRAHAM (IBRAHIM)
Te Dios ma stsaawan sok ya skʼan ya yakʼbey bendision spisil te ants winiketik.
Te Dios la sjapbey te j-alwanej Abraham: «Haʼat ta acuenta ya me yichʼ bendición spisil ants-winiquetic ta bahlumilal» (Génesis 12:3).
¿Bin ya yakʼ jnoptik? Jaʼ te bayal ya skʼanotik te Diose sok te ya skʼan ya yakʼbey bendision spisil te machʼatik ay ta jun familia te ya xchʼuunbot skʼope.
TE J-ALWANEJ MOISÉS (MUSA)
Te Dios ya snaʼ yoʼbolil jbatik sok ya yakʼbey bendision te machʼatik ya spasik tulan ta snaʼbeyel sbae.
Te Machʼa spisil ya xjuʼ yuʼune la yakʼbey yuʼel te j-alwanej Moisés yuʼun ya spas milagroetik. Pero te Moisés jich la skʼanbey te Diose: «Aʼbon jnaʼ te bin ay ta awoʼtan, scuenta yuʼun ya jnaʼbat aba soc te lecuc ya xcʼohon ta atojol» (Éxodo 33:13). Bayal la smulan te Dios te bin kʼanbot yuʼun te Moisés, jaʼ yuʼun la yakʼbey spʼijil sok la skoltay yuʼun ya xnaʼbotxan te bin yilel stalel sok te bin ya spase. Jun ejemplo, Te Moisés la snop te jaʼ jtul Dios te «bayel scʼuxul yoʼtan soc te ay yutsil yoʼtan» te Jpaswaneje (Éxodo 34:6, 7).
¿Bin ya yakʼ jnoptik? Jaʼ te ya yakʼbotik bendision ta jpisiltik te Dios teme ya jpastik tulan ta snaʼbeyel sba ta leke. Ta sKʼop Dios ya yalbotik te bin-utʼil ya skʼan ya kichʼtik ta mukʼ sok te ya skʼan ya yakʼbotik bendisionetik.
TE J-ALWANEJ JESÚS (ISA)
Te Jesús la yakʼ ta ilel te ya snaʼbey yoʼbolil sba te yantike sok la slekubtes bayal ta chajp chameletik.
Te Dios ya yakʼbotik bendision sbajtelkʼinal teme ya jnoptik te bin la spas te Jesús sok te bin la yakʼ ta nopel.
Ta sKʼop Dios ya scholbotik te skuxlejal te Jesús sok te bin la yakʼ ta nopele. Te Dios la yakʼbey yuʼel te Jesús yuʼun jich ya xjuʼ ya spas milagroetik jich bitʼil, sjambeyel sit te machʼatik ma xyilik kʼinal, te machʼatik makal schikinik, te koxoetik soknix la chaʼkuxajtes chaʼoxtul ants winiketik te lajemikix-ae. Jich la yakʼ ta ilel te Jesús te bintik ya xbajt spas ta jtojoltik te Dios ta pajel chaʼbej. Te Jesús la scholbotik te bin ya skʼan ya jpastik yuʼun ya jmulantik te bendisionetik ini, jaʼ yuʼun jich la yal: «Hich ay te cuxlejal sbahtel qʼuinal: ha te ya snaʼbat aba, te haʼat mero Diosat atuquel, soc te ya snaʼbe sba te Jesucristo te ticombil tal awuʼune» (Juan 17:3).
Te Jesús la yakʼ ta ilel te ya snaʼbey yoʼbolil sba te yantik, te lek yoʼtan sok te ay skʼuxul yoʼtan. Jaʼ yuʼun ants winiketik te yanyantik yaʼbilalik la schʼuunik te ikʼel akʼbotik yuʼun te Jesús, kʼalal jich la yal: «Nopbonic coʼtan, como manso soc peqʼuel coʼtan, hich yac atahic cux-oʼtanil» (Mateo 11:29). Te Jesús lek la yil, kʼux ta yoʼtan sok la yichʼ ta mukʼ te antsetike, manchukme ta tiempo abi te winiketik maba ya yichʼik ta mukʼ te antsetike.
¿Bin ya yakʼ jnoptik? Jaʼ te kʼux ta yoʼtan te Jesús te ants winiketik sok la yakʼbotik jun lekil ejemplo te bin-utʼil ya skʼan ya kil jbatik ta jujuntule.
TE JESÚS MA JAʼUK DIOS
Ta sKʼop Dios ya snojptesotik «te junax Dios ay» sok te jaʼnax jkʼasesej kʼop stukel te Jesús (1 Corintios 8:6). Te Jesús la yal ta jamal te jaʼ toyolxan ay te Diose sok te jaʼ tikunot tal ta Balumilal yuʼun te Diose (Juan 11:41, 42; 14:28). *
^ parr. 17 Teme ya akʼan ya anaʼbeyxan skʼoplal ta swenta te Jesuse, ilawil te seksion 8 sok 9 yuʼun te foyeto La fe verdadera, la puerta a una vida feliz, te ay ta www.pr418.com.
