Te j-alwanej Moisés la yal te ya yakʼbotik bendision te Dios teme ya jchʼuunbeytik te mantaliletik yuʼune (Deuteronomio 10:13; 11:27). Maba ya jchʼuunbeytik skʼop te Dios ta skajnax te ya jxiʼtik te ya yakʼbotik kastigoe. Ya jchʼuunbeytik skʼop ta skaj te tʼujbil stalele, jaʼ yuʼun kʼux ta koʼtantik sok ma jkʼantik te ya kakʼbeytik smel yoʼtane, jichme «cʼux ta coʼtantic te Dios teme ya jchʼuhumbetic te mandariletic yuʼune» (1 Juan 5:3).

Pero ¿bintik bendision ya jtatik teme ya jchʼuunbeytik skʼop te Diose? Kiltik chebuk.

«Hoʼon Jehovahon, te Dioson awuʼun, te ya caʼbat anop te bin lec ya xcʼohat yuʼun, te ya jtojobtesat ta be te banti ya scʼan yac atʼun bahele» (ISAÍAS 48:17).

Te Jehová te Jpaswanej kuʼuntike, ya snaʼbotik jbatik ta lek sok ya yakʼbotik te tojobtesel ya xtuun kuʼuntike. Teme ya jkʼantik ya skoltayotik te tojobtesel yuʼun te kʼalal ay bin ya jnoptik spasele, ya skʼan ya jkʼopontik te sKʼop Dios yuʼun jich ya jnaʼtik-a te bin ya skʼan ya jpastik sok te yakuk jkʼotestik ta pasele.

«Ha bayel yutsil te machʼatic ya yaʼiyic te scʼop Dios soc te ya spasique» (LUCAS 11:28).

Ta ora ini, miyon ta tul ants winiketik te ya schʼuunbeyik skʼop te Diose ay stseʼelil yoʼtanik. Kiltik jun ejemplo: Jtul winik yuʼun España te oranax ya x-ilin, ya yutsʼin te yantike soknix te yiname. Ta jun buelta la skʼopon te bin la stsʼibay te j-alwanej Moisés ta swenta te tʼujbil talelil yuʼun te José te snichʼan Jacob. Te José chonot bael jich bitʼil moso sok la yichʼ otsesel ta karsel. Manchukme jich la yichʼ pasbeyel la yakʼ ta ilel te ay slamalil yoʼtan sok te ya snaʼbey yoʼbolil sba te yantike (Génesis, kapitulo 37 kʼalal ta 45). Te winik ini jich la yal: «Snopilanel ta koʼtan te stalel te José la skoltayon yuʼun ayuk slekil koʼtan ta stojol te yantike, te yakuk xkoltaywanon sok te manchuk ya x-ilinon ta orae. Kʼalal jich la jpas, la jta stseʼelil koʼtan sok te jfamilia».

Ta sKʼop Dios ya jtatikxan tojobtesel ta swenta te bin-utʼil ya skʼan ya kiltik te yantike. Kilbeytikxan skʼoplal ta yan artikulo.