Te Jpaswanej kuʼuntik ya skʼanotik sok ya smel yoʼtan ta jtojoltik
1. JAʼ YA YAKʼ TE YA XLOKʼ TE KʼAJKʼALE
Nopanax awaʼiy, ¿binwan yilel te kuxlejalil te manchuk ayuk te Kʼajkʼale? Ta swenta te ay te Kʼajkʼale, te teʼetik ya yakʼ yabenal, ay nichimetik, sit teʼetik sok tsʼunubiletik. Jaʼnix jich ya skoltay te teʼetik yuʼun ya yuchʼik jaʼ ta slojpʼik sok ya xmo bael kʼalal ta yabenal.
2. JAʼ YA YAKʼ TAL TE JAʼALE
Te jaʼale jaʼ jun mukʼul majtanil yuʼun te Dios. Ta swenta abi te lum ya yakʼ xchʼi weʼelil. Te Dios ya yakʼbotik jaʼal, ya yakʼ xpʼol te bin ya jtsʼuntik, ya yakʼ bayal weʼelil sok ya yakʼbotik stseʼelil koʼtantik.
3. JAʼ YA YAKʼBOTIK JWEʼELTIK SOK JKʼUʼ JPAKʼTIK
Bayal ta tul meʼil tatiletik ya smel yoʼtanik yuʼun ya sleik te weʼelil sok te kʼuʼul pakʼal te ya xtuun yuʼun te sfamiliaik. Te sKʼop te Diose jich ya yal: «llawil te mutetic ya xwihlic ta toyol, ma ba ya yaʼiyic awal, ma ba ya yaʼiyic cʼajoj soc ma ba ya stsobic ta yawil; pero ha macʼlimbilic yuʼun te Atatic ay ta chʼulchan. ¿Ma bal cʼaxuc to xan hich acʼoblalic a te bin utʼil te mutetique?» (Mateo 6:25, 26).
«Ilawilic te bin utʼil ya xcol te haʼmal nichimetic [...] pero ya calbeyex, spisil te yutsilal te [ajwalil] Salomón ma ba ya spajbe yutsilal junuc te nichime. Teme Dios hich ya yaʼbe yutsilal te haʼmal nichimetic [...] ¿ma bal cʼaxemuc to xan hich ay bin ya yaʼbeyex alapic [...]?»(Lucas 12: 27, 28).
Teme ya xjuʼ ya yakʼbotik jweʼeltik sok jkʼuʼ jpakʼtik te Diose, jaʼnix jich ya xjuʼ ya skoltayotik ta stael te binxan ya xtuun kuʼuntike. Kʼalal ya jpastik tulan ta spasel te bin ya smulan te Diose, ya yakʼbotik bendision ta stael te jweʼel kuchʼeltik o ya skoltayotik yuʼun ayuk jun kaʼteltik yuʼun jich ya xjuʼ jmantik-a te bin ya xtuun kuʼuntike (Mateo 6:32, 33).
Kʼalal ya kiltik te Kʼajkʼal, te jaʼal, te jamal mutetik sok te nichimetik, ¿mabal jichuk te bayal bin ya yakʼ te ayuk skʼuxul koʼtantik ta stojol te Diose? Ta yan artikulo ya xbajt kiltik bin-utʼil te Jpaswanej kuʼuntik la skʼopon te ants winiketike.
