¿Bin-utʼil ya kakʼtik ta ilel skʼuxul koʼtantik ta stojol te yantike?
Jpisiltik talemotik ta stsʼumbal te sbabial winik, te jaʼ te Adán. Ya skʼan ya yal-abi te jpisiltik jfamilia jbatike. Manchukme ta jun familia ya skʼan te kʼuxuk ya yaʼiy sbaik sok te yakuk yichʼ sbaik ta mukʼe, ta melel ma jichuk yak ta kʼoel ta pasel. Pero te Dios ma smulan te jich yak ta kʼoel ta pasele.
¿BIN YA YAL TE SKʼOP DIOS TA SWENTA TE KʼUXUL OʼTANIL?
«Cʼux me xawaʼiy ta awoʼtan apat-axuhc hich te bin utʼil cʼux yac awaʼiy aba te haʼate» (LEVÍTICO 19:18).
«Cʼux me xawaʼiy ta awoʼtanic te acontra» (MATEO 5:44).
¿BIN-UTʼIL YA KAKʼTIK TA ILEL TE KʼUX TA KOʼTANTIK TE YANTIKE?
Ta 1 Corintios 13:4-7 te Dios ya yalbotik bin yilel te kʼuxul oʼtanil.
«Te cʼuxul-oʼtanil spisil ya xcuhch yuʼun, bayel yutsil yoʼtan».
Nopa ta swenta ini. ¿Bin yaʼiyel ya awaʼiy aba te kʼalal ay machʼa ay slamalil yoʼtan, lek yoʼtan sok ma x-ilin ta ora te kʼalal ay bin maba lek ya apase?
«Te cʼuxul-oʼtanil [...] mayuc sbicʼtal yoʼtan».
Nopa ta swenta ini. ¿Bin yaʼiyel ya awaʼiy aba te kʼalal ay machʼa maʼyuk smukʼul yoʼtan ta atojol sok te ya sbikʼtal oʼtantayate?
Te kʼuxul oʼtanil «ma stuqueluc nax ya sle te bila ya scʼan yoʼtane».
Nopa ta swenta ini. ¿Bin yaʼiyel ya awaʼiy aba te kʼalal ay machʼa ya yichʼ ta wenta te bin ya anop sok te ma jaʼuk ya spas te bin ya skʼan yoʼtane?
Te kʼuxul oʼtanil «ma xyacʼ ta yoʼtan te bin chopol ya xpasbot».
Nopa ta swenta ini. Te Dios ya yakʼbey perdon te machʼa ya sujtes yoʼtan yuʼun te smule. «Ma spisiluc ora ya yalbotic jmultic, soc ma ba stalel ya sqʼuej ta yoʼtan te yilimbahe» (Salmo 103:9). Lek ya kaʼiy jbatik yuʼun te kʼalal ya spasbotik perdon te machʼa ay bin ma lek la jpasbeytike, jaʼ yuʼun te joʼotik ya skʼan ya jpasbeytik perdon te machʼa ay bin ma lek la spasbotike (Salmo 86:5).
Te kʼuxul oʼtanil «ma tseʼeluc yoʼtan yuʼun te bin ma stojiluc».
Nopa ta swenta ini. Kʼalal ay bin ma lek ya xkʼax ta jtojoltik, ma jkʼantik te ay machʼa ya x-akʼbot stseʼelil yoʼtan yuʼune. Jaʼ yuʼun te joʼotik ma skʼan te ya yakʼbotik stseʼelil koʼtantik kʼalal ay machʼa ya xkʼax swokol, manchukme ay bin maba lek la spasbotik.
Teme ya jkʼantik te ya yakʼbotik bendision te Diose, ya skʼan te kʼuxuk ta koʼtantik te yantik manchukme yanyantik yaʼbilalik, slumalik o srelijionik. Jun te bin-utʼil ya xjuʼ ya kakʼtik ta ilel te skʼuxul koʼtantike, jaʼ te yakuk jkoltaytik te machʼatik yakik ta kʼaxel ta wokol.
