Bayal ants winiketik sjojkʼoybeyoj sbaik teme ay yichʼoj jelontesel te sKʼop Diose. Te j-alwanej Isaías la yal te «sbahtel qʼuinal» ay te bin tsʼibaybil ta sKʼop Diose (Isaías 40:8). ¿Bin yuʼun schʼuunej koʼtantik te maba yichʼoj jelontesel te bintik sjapoj te Dios ta pajel chaʼbeje?

Te Dios ay yuʼel yuʼun ya skanantay te sKʼope sok ma xyakʼ te ay machʼa ya sjelontes te bintik tsʼibaybil-ae. Ta namey kʼinal kʼalal la yichʼ lokʼtayel te chʼul libroetik, te machʼatik la stsʼibayike la yajtayik ta lek te jujun letra yuʼun jich ya yilik-a teme ay bin ya yotsesik, ya slokʼesik o ya sjelontesik. Ta skaj te jmulawil ants winikotik, ay chaʼoxtul te machʼatik la slokʼtayik te bin tsʼibaybile aynix te bintik maba lek jil yuʼunike, pero maba la sjelontesik te bin-nix yichʼoj tsʼibayel ta nailal-ae.

Ay bayal kopiaetik yuʼun te antiguo junetik yuʼun te sKʼop Diose. Teme ay bin ma pajaluk ya yichʼ tael ta jun kopiae, ya xjuʼ ya yichʼ pajaltayel sok yantik kopiaetik yuʼun jich ya yichʼ ilel-a teme ay bin maba lek tsʼibaybile (teme ya akʼan ya anaʼbeyxan skʼoplale, ochan ta jw.org sok kʼopona te artikulo «¿Se ha cambiado o manipulado la Biblia?»).

Jnop kaʼiytik ta swenta te antiguo Royoetik te la yichʼ tael ta mar Muerto ta jaʼbil 1947 ta jun chʼen ta stsʼeel te mar Muerto. Te antiguo junetik ini yichʼoj chaʼoxpajkuk te sKʼop Diose sok kʼaxemix ta dos mil jaʼbil te la yichʼ stsʼibayele. Te machʼatik la yilbeyik skʼoplale, la spajaltayik te royoetik te la yichʼ taele sok te sKʼop Dios te ay kuʼuntik ta ora ini. ¿Binwan la staik?

Te machʼatik la yilbeyik skʼoplal te sKʼop Diose, la yalik te maʼyuk bin la yichʼ jelel sok te jaʼnix tsʼibaybil-a te bin-nix yichʼoj tsʼibayel ta nameye. * Kʼalal la yichʼ ilbeyel skʼoplal yan buelta te antiguo junetike, la yakʼ ta naʼel te bin ya jkʼopontik ta sKʼop Dios ta ora ini, jaʼnix te la yakʼ ta tsʼibayel te Diose. Jich yuʼun, kʼalalto ta ora ini te Dios skanantayoj te sKʼop yuʼun maʼyuk machʼa ya sjel te bin tsʼibaybil tey-ae.

Jaʼ yuʼun schʼuunejuk koʼtantik te jaʼ smelelil te bin ya jkʼopontik ta sKʼop Dios. Ta swenta te bin la kilbeytikix skʼoplale, akʼa kiltik bin ya snojptesotik te j-alwanejetik ta swenta te Diose.